MIIM 3 / MIIM 5

Misissuutit aamma siunertaraat, Meeqqeriviit periarfissaqalissasut meeqqanik immikkut pisariaqartitsisunik siusinaartumik takunninnissaannut, taamaasillutik meeqqat atukkamikkut ikiorneqarlutillu ikorfartorneqassammata.Meeqqeriviit inatsisitigut pisussaaffigisaminnik meeqqat tamaasa pillugit makkuninnga qulakkeerinninnissaannut misissuutit ikiuutaasussaapput:

• toqqissillutik alliartussasut atugarissaarlutillu ineriartussasut
• piginnaassutsiminnik tamakkiisumik ineriartortitsissasut
• pitsaasumik atuartuulluarnissaat naligiissumik periarfissinneqassasut - tamanna timikkut, tarnikkut inoqatinullu attaveqarluarsinnaanikkut atualernissamut piareersaanikkut qulakkeerneqassaaq
• peqqissuullutik inersimasunngussasut inuiaqatigiillu ineriartornerannut pitsaasumik sunniuteqassasut

MALUGIUK! Misissuutit misiligutaanatillu suussusersiniutaanngillat.

Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisissaattut siunnersuut nr. 16, 3. december 2012-meersumi §5, imm. 6-imi paasisaqarnerugit.

Misissuinikkut paasisat pillugit allattukkat qajassuunneqarnissaat isumannaatsumillu toqqorneqartarnissaat pingaaruteqarpoq. Tamanna meeqqerivimmi pisortaasup qulakkiissallugu akisussaaffigaa:

• Perorsaanermik suliaqartut misissuutit eqqortumik atussavaat, aamma misissuinikkut paasisat eqqortumik allattassavaat
• Misissuinikkut paasisanik allattukkat isumannaatsumik toqqortaatigineqassapput, taamaaliornikkut inuit susassaqanngitsut toqqortaatinik taakkuninnga pissarsisinnaannginnissaat qulakkeerneqassaaq
• Misissuinikkut paasisanik allattukkat meeqqap meeqqerivimmut allamut nuunnerani isumannaatsumik meeqqerivimmut allamut tunniunneqassapput

Ulluunerani meeqqanut suli atualinngitsunut neqerooruteqarnermi sullissisut  MIIM 3 aamma MIIM 5 - nut immersugassat uani aasinnaavaat, imaluunniit Ilinniartitaanermut Aqutsisoqarfiup mail-ia aqqutigalugu imatut paasissutissiillutik piniarsinnaapput:

• Meeqqeriviup aqqa
• Adresse illoqarfillu
• MIIM 3-t aamma 5-it qanoq amerlatigisut allatsinneqarusunnersut
• MIIM 3-mik inniminniinermi normorivaa: 1198-04
• MIIM 5-imik inniminniinermi normorivaa: 1198-05

Emailikkut allakkami ”Lager-ermiunut” qulequtarineqassaaq, ukununngalu tamanut nassiunneqassalluni: ila@nanoq.gl aamma ipet@nanoq.gl.