Nalunaarut 1. oktober pillugu

Paasissutissanik tutsuiginartunik tunngavissaqarnerup ineriartortinneqarnissaa oktobarip aallaqqaataani nalunaarusiortarnermi siunertarineqarpoq. Nalunaarusiortarnerup kommunit aamma Namminersorlutik Oqartussat peqatigiillutik sinaakkutissanik pitsaasunik meeqqallu suli atualinngitsut aamma meeqqanut suli atualinngitsunut immikkoortortaqarfimmi sulisut atugaannik pitsaasunik aalajangiisarnissaat qulakkiissavaa.

Nalunaarutit Ilinniartitaanermut Aqutsisoqarfiup kommunillu meeqqat suli atualinngitsut pillugit ingerlatsivinnik nakkutiginnillutik sulinerannut sunniuteqarluassapput, meeqqanullu suli atualinngitsunut immikkoortortaqarfiup piujuartitsinermik tunngaveqarluni ineriartortinneqarneranut qulakkeerinneqataassapput.

Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisissaanni paasisaqarnerugit – §4, imm. 3

Ulluunerani neqeroorutit pillugit paasissutissat katersorneqarsimasut makku ilagaat:

• Aqutsineq - katiterneqarneq pisortatullu atorfiit
• Meeqqat amerlassusiat - Ukioqqortussutsinut agguarneqarsimasut
• Sulisut - ilinniagaqarneq, katiterneqarneq, agguarneqarneq aamma oqaatsitigut piginnaasaqarneq
• Amerlassusilersuineq - sulisut agguarneqarnerat meeqqallu inini amerlassusissaat, amerlassusilersuinermik sulisunillu ataatsimut takusassiaq

Angerlarsimaffinni paaqqinnittarfiit pillugit paasissutissat katersorneqarsimasut makku ilagaat:

• Angerlarsimaffinni paaqqinnittarfiit kommuninit namminersortunilluunniit ingerlanneqartut
• Meeqqat amerlassusiat
• Meeqqat oqaatsitigut piginnaasaat

Ulluunerani neqeroorutinik suliaqarnermi pisortaasut angerlarsimaffinnilu paaqqinnittarfiit oktobarip aallaqqaataani nalunaarusiap immersornissaanut akisussaasuupput.

Kommunimi ulluunerani neqeroorutinut ingerlatsivik oktobarip aallaqqaataani naalunaarutinik kommunip meeqqeriviineersunik angerlarsimaffinnilu paaqqinnittarfiineersunik katersuinissaminut taakkulu Ilinniartitaanermut Aqutsisoqarfimmut nassiunnissaannut akisussaasuuvoq. Aammattaaq paasissutissat katersorneqarsimasut eqqortuunersut qulakkiissallugu ingerlatsiviup akisussaaffigaa.

Ilinniartitaanermut Aqutsisoqarfiup paasissutissat katersiorneqarsimasut suliarissallugit Kalaallit Nunaannilu meeqqanut suli atualinngitsunut immikkoortortaqarfiup ineriartornera malinnaavigissallugu akisussaaffigaa. Paasissutissat katersorneqarsimasut aqutsisoqarfiup nunami namminermi meeqqanut suli atualinngitsunut immikkoortortaqarfiup ineriartortitseqqilluni sulinissaanut tunngavissaassapput.