airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Paasisassarsiorluni angalanernut aningaasaliissutit

Atuartuutivit paasisassarsiorlutik angalanissaannut tapiiffigineqarnissaannut qanoq iliorlutit qinnuteqarsinnaanerlutit uani atuarsinnaavat. Aningaasaliissutit paasisassarsiorluni angalanernut, suliffeqarfinnut pulaarnernut kiisalu suliffiusinnaasut siunissamilu atuartut Kalaallit Nunaanni ilinniarfissatut periarfissaat pillugit atuartitsinernut atorneqarsinnaapput.

Qinnuteqarnissamut piffissarititaq killeqanngilaq. Qaquguluunniit qinnuteqartoqarsinnaavoq.

Ilinniartitaanermut Aqutsisoqarfik 2021-mi atuartunut paasisassarsiorlutik angalaniartunut aningaasaleeqqissinnaanngilaq, 2022-mili aningaasaliissutissanut atuarfiit qinnuteqarsinnaapput.

Aningaasaliissutit pillugit

2016-imi upernaakkut Inatsisartut ataatsimiinneranni meeqqat atuarfiini akullerni angajullernilu siunnersuinermik suliniuteqartoqarnissaa akuersissutigineqarpoq. Suliniut aningaasaliissutinik agguagassiisarfittut paasisassarsiorluni angalanernut, suliffeqarfinnut pulaarnernut kiisalu siunissami atuartut Kalaallit Nunaanni ilinniarfissatut suliffissatullu periarfissaannut atatillugu atuartitsisoqarnissaanut kommuninit qinnuteqarfigineqarsinnaasunngorlugu aaqqitaavoq.

Paasisassarsiorluni angalanissaq meeqqat atuarfiini atuartunik akullernik angajullernillu ilinniartitaaneq inuussutissarsiornerlu pillugit pinngitsoorani siunnersuisussaanermut ilaatinneqassaaq.

Paasisassarsiorluni angalanissanut nalinginnaasunut aningaasaliissutinik qinnuteqartoqarsinnaanngilaq.

Aningaasaliissutinut qinnuteqartut paasisassarsiorlutik angalanissaminnut pilersaarusiornissaminnik angalanermillu sunik imaqarnissaanik namminneerlutik akisussaasuupput.


Kikkut qinnuteqarsinnaappat?
Nunaqarfinni isorliunerusunilu ilinniarnikkut suliffissaqarnikkullu periarfissakinnerusuni aammalu angallannikkut atugassarititaasut pissutigalugit paasisassarsiorluni angalanissamut atatillugu aningaasartuuteqarfiunerusartuni atuartunut paasisassarsiorlutik angalaniartunut pingaartumik tapiissuteqartoqartarpoq.
Aningaasartuutissanut sorlernut tapiissutinik qinnuteqartoqarsinnaava?
  • Angalanissamut aningaasartuutivinnut – timmisartumut/umiarsuarmut billetinut angalanermilu aningaasartuutinut allanut, soorlu bussinut taxanulluunniit aningaasartuutinut
  • Nerisaqarnermut – atuartumut ataatsimut ullormut 200 kronit. Aallaqqaammut kommunit aningaasartuuteqassapput, taava kingornagut kommunip aningaasartuutigisimavai utertinneqassapput.
  • Ineqarnermut – pilersaarutaasut malillugit unnuinerit ilanngullugit. Angalanerup nalaani sapinngisamik akikinnerpaamik unnuisoqartassaaq.

Atuartut angalanerminni aningaasanik kaasarfimmiussaannik qinnuteqartoqarsinnaanngilaq.


Qinnuteqartunut piumasaqaatit

Qinnuteqaatit ukuninnga imaqassaaq:

  • Paasisassarsiorluni angalanermi siunertarineqartoq pillugu allaatigisaq
  • Angalanissamut pilersaarutitut siunnersuut
  • Paasisassarsiorluni angalanermi ilinniarfiit suliffeqarfiillu pulaarneqartussat allattorsimaffiat. Suliffeqarfinnut ilinniarfinnullu pulaarnerit saniatigut aaqqissuussanut paasisassarsiornermut naleqquttunut, soorlu Uddannelseskaravanimut (ilinniarneq pillugu paasissutissiiniarluni aaqqissuussamut), suliffiit pillugit saqqummersitsinernut allanullu peqataasoqarsinnaavoqAaqqissuussanut taamaattunut peqataanissamut atatillugu aningaasartuuteqassagaanni tapiiffigineqarnissamut qinnuteqartoqarsinnaavoq.
  • Atuartut ilinniartitsisullu peqataasussat nalunaarsorsimaffiat:
    Peqataasussat tamarmik aqqi CPR-normuilu
    Inersimasut peqataasussat tamarmik emailii mobiliisalu normui
  • Angalanermut, nerisaqarnermut, ineqarnermut allanullu aningaasartuutissanut missingersuutit allattorsimaffiat peqqissaarullugu suliaq
    Aningaasartuutissatut missingersuutit allattorsimaffianni meeqqat inersimasullu billetii pisiarineqartussat qanoq amerlatiginersut erseqqissumik nalunaarneqarsimassaaq (meeqqat 12-inik ukioq aleraangamik inersimasutut billeteqalertarput).

Paasisassarsiorluni angalaneq naammassippat aningaasartuutigineqarsimasunut naatsorsuutit inaarutaasut Ilinniartitaanermut Aqutsisoqarfimmut nassiunneqartussat suliarineqassapput.


Qinnuteqarnermi periuseq
  1.  Qinnuteqarnissaq sioqqullugu atuarfiup pisortaanit kommunillu ilinniartitaanermut ingerlatsivianit akuersissummik pissarsisoqassaaq. Uppernarsaallu taanna qinnuteqaammut ilanngunneqassaaq.
  2.  Klassimi ilinniartitsisuusup/-sut aningaasaliissutinut qinnuteqaat suliarissavaa/-t.
  3. Qinnuteqaat ila@nanoq.gl-imut nassiunneqassaaq. Uppernarsaatit tamaasa ilanngutissallugit eqqaamassavat. Emailimi qulequttatut ’Paasisassarsiorluni angalanissamut aningaasaliiffigineqarnissamik qinnuteqaat’ allassavat.

Brita Toft Hyldgaard

(+299) 34 62 18

brth@nanoq.gl

Magdalene Møller

(+299) 34 61 57

mmol@nanoq.gl

Christian Jensen

Nakkutilliisuugaallartoq

(+299) 34 62 11

chrj@nanoq.gl

Fagit atuartitsinerlu
Takuuk
Ilikkagassatut pilersaarutit
Takuuk
Nittartakkat isumassarsiorfissat
Takukkit
Alloriarfinni inaarutaasumillu naliliineq
Takuuk
Kingullermik nutarterneqarpoq: 31. juli 2020