airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Tuluit oqaasiini misilitsinnerit

Atuartut atuarunnaartussat tamarmik Tuluit oqaasiini misilitsissapput pisinnaasatigut allattariarsornermilu. Saniatigut fagi oqaluttariarsorluni misilitsissutitut makitaasinnaavoq.
Pisinnaasatigut misilitsinnerit

Tuluit oqaasiini piginnaasatigut misilitsinnerit allattariarsornerupput akunnermillu ataatsimik sivisussuseqarlutik.

Misilitsinnermi piumasaqaatit atortorissaarutillu

Atuartup ilaatigut oqaatsinik eqqortumik atuisinnaanera oqaatsinillu paasisinnaanera misilinneqassaaq. Misilitsinnermi atuartup ordbogit atuakkallu ujarlerfiusinnaasut allat atorsinnaavai.

Misilitsinnerup ingerlanneqarnissaa

Atuarfiup pisortaata imaluunniit taassuma sinniisaata pappialanik ilinniartitsisumut naatsorsuussanik ilinniartsisumut misilitsitsinnermi atuaasussamut imaluunniit ilitsersuisussamut tunniutissavaat. Pineqartoq misilitsittunik nakkutilliisooqqusaanngilaq, inilu misilitsiffiusoq atuaareernerup imaluunniit ilitsersuereernerup kingorna qimassavaa. Nakkutilliisut nakkutigissavaat, misilitsinnerit pappialami ilinniartitsisumut naatsorsuussami ilitsersuutaasut naapertorlugit ingerlanneqarnersut.

Sungiusaatitut suliassat

Prepositions
Verbs
Reading comprehension - multiple choice
Syntax - multiple choice
Vejledning til demo-opgaver

Meeqqat atuarfianni inaarutaasumik naliliineq pillugu Namminersorlutik Oqartussat nalunaarutaanni atuarneqarsinnaavoq - kap. 8

Allattoriarsorluni misilitsinneq

Tuluit oqaasiini allattariarsorluni misilitsinneq akunnernik pingasunik sivisussuseqarpoq. Piffissap iluani annerpaamik akunnerup affaa oqaloqatigiinnermut atussaaq annikinnerpaamillu akunnerit marluk affarlu kisimiilluni akissutip allanneqarneranut atorneqassallutik.

Ilikkagassatut anguniakkanut naleqqiullugu atuartup nalorninani nikerarluartumillu akissuteqarsinnaassusia misilinneqassaaq.

Oqaloqatigiinneq

Atuartut suleqatigiinnut, misilitsinnissaq sioqqullugu katiterneqarsimasunut avissapput. Suleqatigiinni suliakkiussat atuarneqassapput, suleqatigiillu suliakkiussani ataasiakkaani imarisaasut, periarfissat piumasaqaatillu oqallisigissavaat. Allattoqarsinnaavoq, taakkulu tamatuma kingorna akissutip allanneqarnerani atorneqarsinnaallutik.

Misilitsinnerup ingerlanneqarnera atortorissaarutillu

Piffissaq oqaloqatigiilluni piareersarfiusoq naappat nakkutilliisut atuartut allataat katersussavaat, atuartullu inimut ataasiakkaarlutik misilitsiffissaminnukkassapput. Misilitsinnermi atuartup atortorissaarutit naleqquttut atorsinnaavai, piareersarnermi nalaani nammineq allatani ilanngullugit.

Meeqqat atuarfianni inaarutaasumik naliliineq pillugu Namminersorlutik Oqartussat nalunaarutaanni atuarneqarsinnaavoq - kap. 9, § 69.

Oqaluttariarsorluni misilitsinneq

Tuluit oqaasiini oqaluttariarsorluni misilitsinnermut ilaapput piareersarneq aamma saqqummiussineq. Tamanna atuartumit ataatsimit imaluunniit suleqatigiinnit amerlanerpaamik atuartunik pingasunik inuttaqartunik ingerlanneqassaaq.

Misilitsinneq tuluttut ingerlanneqassaaq, oqaluttariarsorluni saqqummiussinermi piginnaasat aamma allaaserisanik nalunaaruteqariaatsinillu allanik suliaqarsinnaaneq, allaaserisanik misissueqqissaarsinnaassuseq, allanut sanilliussuisinnaassuseq suliassiissummillu naliliisinnaassuseq misilinneqassapput. Pingaartinneqassaaq atuartup nattaqqallisaanngitsumik oqariartuuteqarsinnaanera.

Pisassiissutit

Oqaluttariarsorluni misilitsinnermut pisassiissutigineqassapput quppernerit nalinginnaasut 50-60-it, ukuninnga imallit:

· Takorluukkiat
· Takorluukkiaanngitsut
· Nalunaaruteqariaatsit allat

Suliassiissutini aallaavigineqassapput ilikkagassatut anguniakkat taakkunaniillu tamatigoortumik imaqassallutik. Misilitsinnermi suliassiissutit ataasiakkaat tassaassapput tuluit oqaasii atorlugit allatat aamma/imaluunniit oqaluinnarluni saqqummiussat, assilissanik taputartuussanik ilaqartinneqarsinnaasut. Suliassiissutit atuartitsinermi atorneqarsimassanngillat.

Misilitsinnerup ingerlanneqarnera atortorissaarutillu

Kisimiilluni misilitsinnermi piareersarnermut minutsit 20-40-t atorneqassapput; suleqatigiillu misilitsinnermi minutsit 40-60-it. Saqqummiussinermut naliliinissamullu minutsit 20-40-t atorneqassapput.

Atuartoq piareersarnermi nalaani allataqarsinnaavoq namminerlu allatani ordbogillu atorsinnaallugit. Allatat saqqummiussinermi nassarneqarsinnaapput.

Misilitsinnerup ingerlanerani atuartup imaluunniit suleqatigiit suliassiissutigineqartoq nassuiaateqarfigissavaat, tamannalu pillugu oqaloqatigiittoqarluni.

Meeqqat atuarfianni inaarutaasumik naliliineq pillugu Namminersorlutik Oqartussat nalunaarutaanni atuarneqarsinnaavoq - kap. 9, § 70.

Misilitsinnermut ilitsersuut

Tuluit oqaasiini atuartitsissummi misilitsissutinut ilitsersuutip uuma siunertaraa, meeqqat atuarfianni inaarutaasumik naliliinerit pillugit Namminersornerullutik Oqartussat nalunaarutaanni misilitsinnerni piumasaqaatit ersarissarnissaat itisilernissaallu.

Ilitsersuutip misilitsinnerni piumasaqaatit ersarissarneqarnerisa saniatigut Tuluit oqaasiini misilitsissutit suliarineqarnerinut imarisaannullu assersuutit arlallit kiisalu atuartitseriaatsit siunnersueriaatsillu inassutigineqartut imarivai.

Ilitsersuut

iPad allattariarsorluni misilitsinnermi 

Pages aamma Numbers misilitsinnerni allattariarsorfiusuni nal.ak. 3-ni 4-nilu atorneqassapput.

Pagesimut inissititerutit:

  • Standard dokumentformat
  • Allannerup qanoq ittuunera/Skrifttype: Calibri Regular
  • Qulequtaa allanneqassaaq naqinnerit angissusaat: 14 -16
  • Sinnerini naqinnerit angissusaat: 11-14
  • Titarnerit akuttussusiat/Linjeafstand: 1,2-1,5
  • Quppernerit allatsinneqassapput, ass. 1 af 2, 2 af 2

IPadi misilitsinnerup nalaani internetimut attaveqassanngilaq attavilerneqassananilu

Taamaattumik atuarfiup pisortaata inimi misilitsiffiusumi internetimut attavilertoqarsinnaannginnissaa qulakkiissavaa. Taamaattoqartillugu inimi misilitsiffimmi routerit/modemi/wi-fi qaminneqassaaq/-ssapput. IPadip ’Flytilstand’-imut aamma/imaluunniit ’wi-fi fra’ iPadimi nammineerluni inissinneri naammanngilaq.

Taamatullu aamma atuarfiup pisortaata misilitsinnissaq sioqqutingaarlugu atuartut nakkutilliisullu tamarmik Pagesimi aamma Numbersimi tigusinermut (modtage) aamma nuussinermut (eksporter) sungiussisimalluassasut qulakkiissavaa.

Nakkutilliisuutitap malitassaa

Akunnerni 3 -4-ni misilitsinnernut ilinniartitsisup nakkutilliisuutitallu malitassaat:

  • iPadi misilitsinnermi piffissaq tamaat internetimut attavilerneqarsinnaassanngilaq
  • iPadi oqaatsinik atuartitsissutini oqaloqatigiittoqareerpat aatsaat atorneqarsinnaalissaaq
  • Tastatur (naqitassat) atorneqarsinnaavoq atuartup tamanna kissaatigippagu piareersimasuuteqarunilu
  • Atuartut tamarmik Pages aamma/imaluunniit Numbers atussavaat
  • Pagesimiittoq kukkuniiaat aamma ordbogit App’it atorneqarsinnaapput
  • Misilitsinnermi piffissaq tamaat iPadinut ilisimasalimmik inimi misitsiffimmiittoqassaaq

1) Oqaloqatigiinnerup kingorna dokument sidehovedileriigaq1 tunniunneqassaaq (Airdrop/USB)
2) Dokument App’imi Pagesimi ammarneqassaaq
3) Atuartup sidehovedimi immersugassat immersussavai. Atuarfiup aqqa aamma GR normua immersuiffissami allassimariissapput
4) Atuartup atussavai:
- Standard dokumentformat
- Allannerup qanoq ittuunera/Skrifttype: Calibri Regular
- Qulequtaanut naqinnerit angissusaat: 16
- Sinneri naqinnerit angissusaat: 12-14
- Titarnerit akuttussusiat/Linjeafstand: 1,2-2,0
- Quppernerit taaneqartassapput ass. 1 af 2, 2 af 2
5) Naatsorsukkat il.il. Numbersimi suliarineqarsimasut Pagesimi dokumentimut ilineqassapput
6) Atuartup suliani naammassippagu akissutaa PDF-formatinngorlugu Pagesimit nakkutilliisumut nuunneqassaaq (eksporter). (Airdrop/USB)
7) Akissut anillatsinneqassaaq malittarisassallu atuuttut malillugit censorimut nassiunneqarluni
8) Akissut atuartup nakkutilliisullu iPadiannit peerneqassapput (slettes)

Arlaatigut iPadi ajornartooruteqalissappat atuartup pappiala qaqortoq atussavaa allaallu piiarneqarsinnaanngitsoq (kuglepenni) atorlugu allalluni. Misilitsinnerup sivisussusaa piffissaliussat sinnerlugit sivitsorneqassanngilaq.

Sidehovedimi piareeriigaq

Atuarfik normualu / Skolens navn og GR-nr:

 

Ulloq / Dato:

Atuartup aqqa / Elevens navn:

Inuup-normua / CPR-nr:

 

 Fagi / Fag:

Immikkoortua / Disciplin:

 

Nakkutilliisup aqqa / Tilsynsførendes navn:

 

iPad allattariarsorluni misilitsinnermi

Hent Pages iPadskabelon til skriftlig prøve her (brug iPad): 

 

Ilikkagassatut pilersaarutit
Takuuk
Allattoriarsorluni misilitsinnerit 2021
Takuuk
Oqaluttariarsorluni misilitsinnerit 2021
Takuuk
Censoreqarneq karakteriliinerlu
Takuuk
Kingullermik nutarterneqarpoq: 7. april 2021