airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Angerlarsimaffimmi atuartitsinerni isumassarsiat - atuartitsisunut

Atortussiaq nutserneqarlunilu allanngortinneqarpoq allaatigisamit EMU, Danmarks læringsportal-imiit.
Allaatigisaq pillugu
Allaatigisaq ungasissumit atuartitsinerup (fjernundervisning) atuartuni nukarlerni, akullerni angajullernilu atuartitsinerni qanoq aaqqissuunneqarsinnaaneranut naammassineqarsinnaaneranullu isumassarsisitsisinnaasunik imaqarpoq. Aamma atuartut qarasaasiamut qarasaasiarluunniit atorlugu naapittarfinnut iseriaannaat iseriaannaanngitsullu - imaluunniit atuartut qarasaasiamik digitaliusunillu atuinermut piginnaasakinnerusut qanoq atuartinneqarsinnaanerinut isumassarsisitsisinnaasunik imaqarpoq.

Atuarfimmi atuartitsinermit, atuartut tamarmik najuuffigisaannit, allaanerusumik atuartitsinermi, tassa ungasissumit atuartitsinermi, ilikkartitsiniarnermut atuartitsinermullu tunngasut isumaliutigineqarnissaat pingaaruteqarpoq. Ungasissumit atuartitsinemi atuartitsinerup qanoq ingerlanneqarnissaanik aalajangersaaneq aaqqissuussinerlu, atuartunik malittarinninneq aamma atuartut suliaat pillugit oqaaseqarfiginninnerit pingaaruteqarput.

Allaatigisaq uani atuaruk
Ilikkartitsiniarnermut tunngasunik isumaliutiginninnerit
Ungasissumit atuartitsinermut pilersaarusiornermi eqqaamasariaqarpoq angajoqqaat amerla-nerpaat angerlarsimaffimminni sulisariaqartarnerat, atuartitsinissaminnut piginnaasaasa kil-leqarsinnaanerat aamma atuartitsinissaminnut piffissaqarpallaannginnerat. Taamaattumik atuartut namminneerlutik naammassisinnaanngisaannik suliassinneqannginnissaat pingaaruteqarpoq. Soorunami angajoqqaat meerartik suliassaminik nalornilluni aperippat ikiorsinnaassavaat, kisianni ajoqqaat meeqqaminnik atuartitsinissartik suliassaasa pingaarnersarinngilaat. Taamaattumik ungasissumit atuartitsinermi suliassat sungiusaatit aamma ullormut atuagassat angerlarsimaffinnilu atortorissaarutinut tulluartut suliassiissutigissallugit tulluarnerpaapput.

Nunatsinni atuartut tamarmik angerlarsimammata interneti atorlugu atuartitsilluni atortorissaarutit artorsartinneqarsinnaapput. Taamaattumik interneti atorlugu suliarineqartari-aqanngitsunik suliassiinissat pitsaaquteqarsinnaassaaq. Taamaaliornikkut atuartut interneti atorlugu atuartitsissutinut iserniarnerminni ajornartorsiunngikkaluarlutik suliassaminnik aallartitsisinnaanissaat qulakkeersinnaavat.
Suliarineqartut pillugit oqaaseqarfiginninnerit atuartitsinerullu aaqqissuussaanera
Atuartup suliai pillugit oqarasuaat, video imaluunniit interneti atorlugu allakkatigut oqaatsitigulluunniit oqaaseqarfiginnissinnaavutit. Assersuutigalugu suliassat qaqugu naammassineqarnissaannut piffissaliillutillu qaqugu "naapissinnaanissinnik" piffissaliisinnaavutit, taamaalillutik atuartut paasinartuliorfigineqarlutillu atuartitsissutigineqartussanut malinnaatinneqarsinnaassapput. Pingaartumik nukarlernut akullernullu atuartitsinerup aaqqissuussaalluarnissaa sapaatip-akunneratalu ulluini atuarfiusussani tamani skemaqartitsinissaq isumassarsiatsialaavoq.
Suleqatigiit pilersaarusioqatigiinnerat
Ungasissumit atuartitsinerup qanoq pilersaarusiornissaanut suleqatigiillusi isumaqatigiikkussi isumassarsiatsialaavoq. Taamaalillutik atuartut angajoqqaallu assigiinngitsunik atuartitsisoqarneranut paatsiveerutitinneqassanngillat. Aamma atuartut fagini assigiinngitsuni interneti atorlugu piffissap qanoq ilinerani ikiorneqartarsinnaanerat pilersaarusiorneqarsinnaavoq. Piffissap qanoq ilinerani oqaloqatigineqarsinnaanissinnik aamma attaveqaat qanoq ittoq atorlugu attavigineqarsinnaanissinnik ersersitsisumik skemaliorsinnaavusi.
Atuartut nukarliit
Atuartut nukarliit aammalu akullerni atuartut nukarliusut atuartinneqarnerini atuartut tunngaviusumik piginnaasassaat atuartitsissutigineqarpata isumassarsiatsialaassaaq. Atuarneq aamma kisitsineq oqimaaqatigiissinneqassapput, taamaattumillu taakkunani suliassiisoqarsinnaassaaq. Assersuutingalugu atuartut atuakkaminni suliassat ingerlassinnaavaat, iBog-iluunniit aqqutingalugu nittartakkakkut atuakkat atuarsinnaavaat sungiusaatilluunniit ingerlallugit. Suliassat aamma allakkatigut nassiunneqarsinnaapput, aamma takorluukkiat (skønlitteratur) atuakkiallu aalajangersimasunut tunngasut (faglitteratur) digitalimik pappialamulluunniit allanneqarsinnaassapput.

Atuartut matematikkimi atuakkaminni imaluunniit interneti atorlugu suliaqartarfinni suliaqar-nermikkut kisitsinermi piginnaasatik pigiinnarsinnaavaat. Taamaakkaluartoq suliassanik tamakkuninnga sivisuumik suliaqarneq atuartumut soqutiginarunnaarsinnaasarpoq. Taamaattumik angerlarsimaffimmi silamulluunniit anilluni uuttortarneqarlutillu kisinneqarsinnaasunik suliassat soqutiginarsarneqarsinnaapput.

Pingaartumik klassini nukarlerni ilinniartitsisut atuartullu attaveqaqatigiissinnaanerat ilungersunarsinnaassaaq. Ilinniartitsisut atuaqatigiillu videokkut naapeqatigiissinnaanissaat ilimanarpallaanngilaq, taamaattumik ilinniartitsisup atuartunut allakkatigut ullormut attaveqalaartarnissaa pitsaassaqaaq.

Suliassaq nutaaq pillugu atuartunut videomik nassiussisarneq isumassarsiatsialaasinnaavoq. Suliassaq pillugu nassuiaammik imalimmik videomik immiussiguit atuartup suliassap qanoq naammassineqarnissaanut paasinninnissaa qulakkeersinnaavat. Immiussanni atuartut suliassaminnik naammassinninnissaannut qanoq ilimasuffigineritit aamma atuartut suliassaminnik paasinninngitsuussagaluarpata qanoq iliorsinnaanerinik nassuiaasinnaavutit. Atuartut suliassaminnut nalornissuteqassagaluarunik video arlaleriarlutik takoqqissinnaavaat. Video immiussat YouTube-mut Vimeomulluunniit ilisinnaavat.

Atuartut ilaasa suliaminnik ilinnut nassiussinissartik sapernartuutittarsinnaavaat. Immaqa angajoqqaat ikiuunnissaat pisariaqarsinnaavoq, taamaattumik nassiussinissamut ilitsersuummik paasiuminartumik malikkuminartumillu suliaqartoqarsinnaavoq.

Pisariaqassappat angajoqqaanut atuartunullu piffissap qanoq ilinerani ilitsersuisinnaaninnik ilisimatitsisinnaavutit. Klassini nukarlerni oqarasuaat imaluunniit mobilimi video atorlugu attaveqarneq atorneqarpat pitsaassaaq. Taamaasiornikkut atuartut ataasiakkaartumik sapernatitaat akineqarsinnaapput.
Akullerni angajullernilu
Akullerni angajullernilu atuartut atortorissaarutinik digitaliusunik atuillaqqissereerajuttarput. Messengerimut iserneq misilereersimasarpaat videokkullu oqaloqatigiittareerlutik. Atuartut digitaliusunik suliaqarneq siornatigut misilereersimappassuk, taava klassimi atuartut ullormut ataasiarlutik naapeqatigiittarnissaat kajuminnarnerpaassaaq. Zoom programmiluunniit alla ataatsimoorluni oqaloqatigiiffiusinnaasoq atorlugu naapittoqarsinnaavoq. Illit ilinniartitsisutut ullup qanoq ingerlanneqarnissaanik, suliassat suut naammassineqarnissaannik aammalu atuartuutitit qanoq naatsorsuuteqarfiginerlugit videokkut oqaloqatigiinnissinni nassuiaasinnaavutit. Aamma naapinnermi suliassat nassuiarneqarsinnaapput atuartullu suliassat pillugit apeqquteqarsinnaallutik.

Atuartut internetimik atuisinnaanerat killeqarpat allagarsiassaannik ullormut ataasiarlutit nassiussisarsinnaavutit. Allakkatigut videokkulluunniit nassiussisarsinnaavutit. Akullerni angajullernilu atuartut suliaminnut akissutinik ilinniartitsisuminnut nassiussisarsinnaanerat aammalu video oqarasuaalluunniit atorlugit suleqatigiissinnaanerat naatsorsuutigineqarsinnaavoq. Taamaattumik atuartut akissutinik digitaliusunik ilinnut nassiussisarsinnaanerat pilersaarutigisinnaavat. Atuartut ataasiakkaarlugit eqimattakkaarlugilluunniit videokkut suliaat pillugit oqaaseqarfiginnissinnaavutit, taamaalillutik atuartuutivit suliaqaqqinnissaminnut suut eqqumaffigissanerlugit ilisimasassavaat.

Suleqatigiiususi ullormut klassimi susoqassanersoq pilersaarummik suliaqarsinnaavusi, taava atuartut tiiminut iseraangamik nalunaarsinnaasassagaluarput.

Ungasissumit atuartitsinermi assersuutitut skemaliarineqarsimasut quppernermi allerpaapput.
Ungasissumit atuartitsinermik naammassinninneq – iluarsiissutit digitaliusut
Ungasissumit atuartitsinermut atortut digitaliusut arlalissuupput. Kommunit ilaasa atortorissaarut aalajangersimasoq ilinniartitsisut atuartullu suliaqarfigisinnaasaat pigereersi-masinnaavaat. Taamaattumik atortorissaarut taanna atuartut atuisuuffigalugulu ilisimariigaata atorneqarnissaa pissusissamisuussaaq.

Interneti atorlugu suliaqarfigineqarsinnaasut atuartup atuisuunerminik pilersitsinissaanut piumasaqaateqarnerat eqqumaffigineqartariaqarpoq. Taama pisoqartillugu atuartup qarasaasiaani paasissutissat isumannaatsuutinneqarnissaannut unammilligassaqarsinnaavoq, taamaattumik kommunip atuarfiulluunniit nittartagaq atorlugu atuartitsinermut atortorissaarutit isumaqatigiissuteqarfigisimasaasa atorneqarnissaat innersuussutigineqarput. Nalornissuteqassaguit atuarfimmi aqutsisut qarasaasialerisulluunniit attaveqarfigisinnaavatit.
Ullup ataatsip qanoq issinnaaneranik assersuut

Interneti atorlugu atuartut naapissinnaavatit ullullu qanoq ingerlanneqarnissaanik ullormullu suliassat suunerinik nassuiaallutit, imaluunniit videomik ullormut suliassat susassallu pillugit nassuiaataasumik nassiussisinnaavutit. Aamma atuarnerup qanoq ingerlanneqarnissaanik erseqqinnerusumik nassuiaasoqarnissaa pisariaqartinneqarpat qarasaasianni skærmit atuartunit tamanit takuneqarsinnaalersillugu nassuiaasinnaavutit.

Atuartunut attaveqaraangavit susoqarnissaanut paasinartuliortarnissat qulakkeerniassavat:

  • Atuartut suna ilinniassaneraat, sooq taanna ilinniassaneraat aammalu qanoq suliassartaa naammassissaneraat oqaasertalissavat
  • Atuartut atuarfimmiinngikkaluarlutik siunnersorneqarsinnaanerat, ikiorneqarsinnaanerat ilitsersorneqarsinnaanerallu oqaatigissavat
  • Atuartut atuarnissaat, tusarnaarnissaat, allannissaat, suliassanik assigiimmik in-erneqartussanik (lukkede opgaver) aamma suliassanik assigiinngitsunik inerneqarsinnaasunik (åbne opgaver) suliaqarnissaat qulakkiissavat
  • Atuartut qaqugu suliatik pillugit oqaaseqarfigineqassanersut aamma oqaaseqarfiginninnermi qanoq iliortoqassanersoq oqarfigissavatit
  • Atuartut suliassanik sammisassanillu suliaqarsinnaapput suliamillu akissutaannik digitaliusunik nassiussisinnaallutik. Immaqa aamma interneti atorlugu ullup ingerlanerani atuartitsinermi oqaloqatigiittoqarsinnaavoq.

Atuartut suliaminnut akissutaat pillugit oqaaseqarfiginninnerit ilinniartitsisut atortorissaaru-taasigut allaganngorlugit imaluunniit internetikkut oqarasuaatikkulluunniit oqaasinngorlugit pisinnaapput.

Atuartut ullormut suliassatik suliaralugit nangissinnaavaat, illillu ilinniartitsisutut suliassat ataasiakkaat qanoq sivisutigisumik suliarineqassanersut imaluunniit suliarineqartut digitali-usumik tunniunneqassappata qaqugu tunniunneqassanersut aalajangersinnaavat.

Ilinniusiorfiup inniminniisarfia
Takuuk
Ilinniusianik atorit
Atorit
Fagit atuartitsinerlu
Takuuk
Ilikkagassatut pilersaarutit
Takuuk
Kingullermik nutarterneqarpoq: 16. november 2020