Atuartitsissummi kalaallisuumi GUX siunnersortissarsiorpoq
Atuartitsissummi siunnersorti tassaavoq ilinniarnertuunngorniarfiit arlaanni ilinniartitsisutut aalajangersimasumik atorfeqartitaalluni Ilinniartitaanermut Naalakkersuisoqarfimmut (IKIN) atassuteqarluni inuussutissarsiumminik ingerlatsisoq. Siunertaavoq ilaatigut ilinniartitseriaatsit tunngaviillu pillugit misilittakkat tunngavigalugit ilisimalersimasanik pitsanngorsaanissaq atorsinnaasunngortitsinissarlu, tamatumalu saniatigut ilinniarnertuunngorniarfimmi ilinniarnerup pitsaassusaata qulakkeernissaa.
Atuartitsissummi siunnersortitut atorfik pillugu:
Atuartitsissumi kalaallisuumi siunnersortip ilaatigut suliassarai:
- Danskit ministeriaqarfiini atuartitsissutini siunnersortinut attaveqaataaneq
- Sulinermi, ilinniartitsinermi atuartitsissutinilu unammilligassanik naammassinninneq taakkulu pillugit siunnersuineq.
- Misilitsinnissamut pilersaarusiornernik ineriartortitsinernillu ikorfartuussinissaq
- Atuartitsissummi kalaallisuumi ineriartortitsinermik atortussanngortitsinermi aamma nalilersuinermi ataqatigiissaarineq suliniummilu aqutsineq (ilitsoqqussaralugit oqaatsisut & pilerlaanut - aappaattullu oqaasilinnut).
- Atuartitsissut pillugu paasissutissanik nalilersuineq ilisimasanillu avitseqatigiinneq
- Kalaallisut allattarissani suliat akueralugillu pitsaassusiisa misissornissaat
Atorfimmi suliffissat ukiumut 365 tiimiupput. Tiimit atuarfimmi pineqartumi ukiumut suliassaatut ilaassapput.
Taamaammat qinnuteqaat fagimut siunnersortip /ilinniartitsisup ukiumut suliffissaanut tunngatillugu pineqartup aqutsisuanut ataqatigiissaarneqassaaq. Tassa qinnuteqartoqartinnagu ilinniarnertuunngorniarfimmi rektori isumaqatigiissuteqarfigineqassaaq.
Atorfinitsitsinermi misilittagaqassuseq, nutaaliorneq, suliassamik isumaginnissinnaaneq, ilinniartitsinermik piginnaasaqarneq aamma attaveqallaqqissuuneq pingaartinneqassapput. Ukiunut marlunnut isumaqatigiissusiortoqassaaq.
Qinnuteqaat CV ilanngullugu kingusinnerpaamik marlunngorneq ulloq 11. april 2023 uunga nassiunneqassaaq evmt@nanoq.gl.
Paasisaqarnerorusukkuit Eva Møller Thomassen maili qulaani allassimasoq aqqutigalugit attaveqarit.
