Danmarkimi efterskolertumut angajoqqaajuneq

Efterskolerneq angajoqqaat efterskolillu namminneq akunnerminni susassaqarfigaat.

Efterskolip angajoqqaallu akornanni isumaqatigiissutinut Danmarkimi inatsisit nalinginnaasumik malittarisassaat atuupput. Pingaartuuvoq efterskolilu allakkatigut isumaqatigiissutit assilerneri angajoqqaanit toqqorneqartarnissaat.

Atuarnissami isumaqatigiissut tassaavoq atuartup efterskolernissaa pillugu angajoqqaat efterskolillu akornanni allakkatigut isumaqatigiissut. Isumaqatigiissummi ilaatigut allassimassaaq, ukioq atuarfiusoq naatinnagu atuarnerup unitsinneranut akiliut qanoq annertutiginersoq. Isummaqatigiissummi aamma allassimassapput qularnaveeqqusiinermut tunngasut aamma efterskolip malittarisassaasa maleruarneqarnissaannut tunngasut.

Pingaartuuvoq efterskolernerup meeqqassinnut ilissinnullu qanoq kinguneqarumaarnera pillugu ilissi angajoqqaatut oqaloqatigiinnissarsi.

Kalaallit Nunaanni peroriartortutut atuartut amerlanersaasa ulluinnarisaq, kulturi oqaatsillu Danmarkimi efterskolernerminni sungiunniagassaminnit allaanerusut sungiusimavaat. Atuartut sungiusimavaat pinngortitaq nipaassuserlu, immaqalu ukioqatiminnut qallunaanut naleqqiullugu sorpassuit persuarsiutiginnginnerusarlugit. Immaqa aamma ulluinnarisaq Danmarkimisut pilersaarusiorluaqqissaagaanngitsoq sungiusimavaat. Tamakku pillugit angajoqqaat meeqqaminnik oqaloqateqarnissaat pingaartuuvoq - efterskolernissaq sioqqullugu efterskolernerullu ingerlanerani.

Qinnuteqaateqarneq naammassippat meerarsilu efterskolernissaminut akuerisaappat piareersaatit ingerlalissapput. Angajoqqaatut meerarsi Danmarkimi ukiinissaanut pitsaanerpaamik piareersaaqataaffigissavarsi.

Meeqqassi Danmarkimi efterskolernermini pitsaanerpaanik atugassaqarnissaanut naleqqiullugu, ilissi angajoqqaatut annertuumik sunniuteqarsinnaavusi – naak ungasikkaluaqalusi.

Meerarsi efterskolerluni aallartippat ilissinniillu ungasissorsuarmut nuulluni, angajoqqaatut inissisimanersi allanngussaaq. Ilaatigut misigissavarsi pisarnissitut meeqqassi inuuneranut malinnaasinnaajunnaarlusi.

Meeqqap ’iperarnissaa’ ajornakusoorsinnaagaluaqisoq pingaartuuvoq meeqqamik tapersersuinerup ersersinnissaa aamma meeqqassi efterskolimini misigisaanut nutaanut pissanganartunullu naleqqiullugu ilalersuillusilu tapersersuinissarsi. Tamanna atuuppoq meerarsi ulluni nuannersuni nuannaarfiusunilu oqaloqatigigaangassiuk aamma ulluni meeqqasi aliasukujullunilu angerlarsilaarfigisaani.

Tatigisariaqarpat efterskolip, ilaqutariit attaveqaataasartut meeqqassilu sapernavianngikkaat. Efterskolit atuartut nutaat aallartilluaqqullugit ikiornissaannik misilittagaqarluartarput taamatullu atuartut angerlarsertut qanoq pissuseqarfiginissaat misilittagaqarfigilluartarlugit.

Soorunami angajoqqaat meerarlu efterskolernissaq pillugu isumalluartaqaat qilanaarisarlugulu, tassami ukioq tassaassaaq ineriartorfiusoq nuannerluinnartunik ataatsimooqatigiiffiusoq misigisaqarfiusorlu. Ilutigisaanik ilisimasariaqarpoq efterskolerneq unamminarsinnaammat meeqqamullu sukataarnarsinnaalluni.

Ulluinnarisamit toqqissisimasumik inuuneqarfiusumiit efterskolimi inuunermut ilisimanngisamut ikaarsaariarneq allanngoriarnerusinnaavoq annertoorujussuaq, taamaammallu meeqqassi efterskolernermini puullaaqinartunik unamminartunillu misigisaqartarnissaa pissusissamisuuginnarpoq.

Meerarsi ajornartoornernik, angerlarsernernik aliasunnernilluunniit misigisaqassappat pitsaanerpaamik ikiorsersinnaavarsi paasinnillusi tapersersuinissigut. Eqqaamallugu efterskolernerup pingaarnertut ilagimmagu meeqqassi nammineernissaminik ilinniarnissaa.

Pingaartuuvoq eqqaamassallugu inersimasunik efterskoliniittoqarmat, taakkorpiaallu meeqqat ataasiakkaat nalorninerini, aliasunnerini ajornartoorneriniluunniit ikiuuttarmata.
Angajoqqaatut inersimasut efterskoliniittut tatigisariaqarpasi, taakkuami inuusuttunik sullissinermik annertuumik misilittagaqartuupput - aamma ilissi iliuuserisartakkassinnik allaanerusumik immaqa iliuuseqartaraluarlutik.

Meerarsi aliasuttoq malugisinnaagussiuk efterskoli/ilinniartitsisoq attaveqaataasoq attavigeriaannaavarsi, taakkualu meerarsi qaangiinissaanik ikiussavaat.
Meerarsi artornartorsiortoq misigigussiuk efterskolip attaviginissaa utaqqitippallaarniaqinagu - meerarsi pilertortumik ikiorserneqarlunilu taperserneqaruni qaangiipallannerusinnaavoq.

Meerarsi ingerlanerliortoq malugisinnaagussiuk Kalaallit Illuanni ilinniarnermut ilitsersuisartoq attaveqarfigisariaqarparsi, taakkua suliamut akuliunnissaat pisariaqarpat imaluunniit ilinniartitsisup attaveqaataasartup allalluunniit oqaloqatigineranni oqalutseqarnissaq pisariaqartinneqarpat.

Meeqqassi efterskolertup maqaasinera inuttaanut eqqartoqinagu ikinngutisi ilaquttasiluunniit oqaloqatigisigit. Meeqqassi maqaasinersi tusaruniuk angerlarsernera annertuneruliinnarsinnaavoq imaluunniit meeraq nammineq pisuusutut misigilersillugu. Angajoqqaatut assersuutigalugu eqqarsaatigisinnaavarsi siunertamut naapertuuttuunersoq meeqqamut allassagaanni: ”Maqaasivakkit”, tamatuma meeqqap angerlarsernera annertusaannarsinnaammagu.

Aamma eqqarsaatigisiuk ullup unnuallu qanoq ilinerani meerarsi oqaloqatigisassanerlugu. Innarfissaq sioqqutilaarlugu oqaloqatigiinneq immaqa tamanut naapertuulluartutut isigineqarsinnaagaluarpoq – kisianni meeqqap sinilinngitsiarnermini ilaquttaminik oqaloqateqarnerata angerlarsernera annertusaannarsinnaavaa - taamaammat pitsaanerusinnaavoq ullup qiteqqunnerani oqaloqatigiittarnissap toqqarnissaa.

Meeqqassi maqaasinera ukiup atuarfiusup aallartinnerani meeqqassilu aallarnikuuneranik sungiussiniarnissinni immaqa annertunerpaasinnaavoq.