Danmarkimut tikereernermi isumagisassat

Efterskolernermut atatillugu atuartoq efterskolip adressia atorlugu Danmarkimi innuttaasut allattorsimaffiannut nalunaassaaq. Tamatuma kingorna atuartoq efterskolernermut qallunaat naalagaaffiata tapiissutigisartagaanik pisinnaalissaaq.

Danmarkimi innuttaasut allattorsimaffiannut nalunaarneq pissaaq, kommunimi nuuffigisami (kommuni efterskolip inissisimaffia) innuttaasunik sullissivimmut saaffiginninnikkut. Inassutigineqarpoq angajoqqaat efterskoli isumaqatigiissuteqarfigissagaat atuartoq innuttaasunik sullissivimmut saaffiginninnerani efterskolip sulisuinik qaniorneqaqqullugu nuunnerminillu nalunaarnerani ikiorlugu.
Atuartoq kinaanerminut uppernarsaat assiliartalimmik nassataqassaaq, ajornanngippat passimik. Tamatuma saniatigut meeqqat 18-it inorlugit ukiullit innuttaasut allattorsimaffiannut nuunnerminnik nalunaarsinnaanerminnut angajoqqaaminnit allakkatigut pisinnaatitsissummik nassataqassapput – tamatumunnga paarlaallugu efterskolip sulisui atuartup efterskolimi atuartussatut akuerisaaneranut uppernarsaammik nassarsinnaapput.

Makkua eqqumaffigikkit: Atuartup nuunnera Danmarkimut apuunnermiit kingusinnerpaamik ullut 5-t qaangiunneranni nalunaarutigineqassaaq. Nuunnerup nalunaarutigineranut atatillugu aammattaaq nakorsarisassamik toqqaasoqassaaq. Nuunnerup nalunaarutigineraniit ullut 14-it missaasa qaangiunneranni korti sungaartoq peqqinnissaqarfimmut atortagassaq (sundhedskort) tiguneqassaaq, taannalu assersuutigalugu nakorsiarnermi aamma kigutit nakorsaanukarnermi atorneqartassaaq.

Atuartoq innuttaasut allattorsimaffiannut Danmarkimi kommunimi allassimaleruni efterskolernermi nalaani kommuni taanna angerlarsimaffittut kommunerilissavaa. Tamatuma kingorna Danmarkimi kommuni kalaallimut inuusuttumut kommunimi inuusuttunut allatulli pisussaaffeqalissaaq.

Korti sungaartoq peqqinnissaqarfimmut atortagassaq taamaallaat Danmarkimi, Savalimmiuni Kalaallit Nunaannilu nakorsiarnermi atorneqarsinnaavoq. Kortimi takuneqarsinnaapput nakorsarisap najugaqarfia oqarasuaataatalu normua.

Napparsimalernissamut sillimmasernermut korti tungujortoq nunanut EU-mut ilaasunut angalanermi nassarneqartassaaq. Korti pisinnaatitsivoq nunami tikeraakkami innuttaasut assinginik peqqinnissaqarfimmit sullinneqarnissamut.

Efterskolit amerlasuut ukiup atuarfiusup ingerlanerani ataasiarlutik arlaleriarlutilluunniit nunanut allanut angalasarput, tamatumanilu atuartup napparsimalernissamut sillimmasernermut korti tungujortoq nunanut EU-mi atuuttoq nassartussaavaat. Korti uani piniarneqarsinnaavoq: borger.dk, tassungalu NemID atorlugu isertoqartarpoq aamma angajoqqaat atuartoq kortimik piniussinnaavaat uunga sianerlutik : +45 70 12 80 81.

Atuartoq efterskolernini naammassillugu Kalaallit Nunaannut uteruni, Kalaallit Nunaanni inunnik nalunaarsuisarfimmut nalunaarutigineqaqqissaaq.

Atuartoq efterskolip kommuniani innuttaasut allattorsimaffiannut nalunaareerpat nakorsiarnissaq peqqinnissaqarfimmullu saaffiginninnissaq periarfissaalissapput. Pisariunnginnerpaasarpoq nakorsamik efterskolimut qanittumik najugalimik toqqaanissaq.

Inassutigineqarpoq atuartoq Danmarkimut aallannginnermini kigutini misissortissagai.
Danmarkimi kigutinut nakorsiarneq akeqarpoq, kisianni meeqqat inuusuttullu 18-it inorlugit ukiullit kigutigissaasumukarnerat akeqanngilaq. Atuartoq efterskolip kommuniani innuttaasut allattorsimaffiannut allatsereeruni pisariaqalerfiatigut akeqanngitsumik kigutit nakorsaannukarsinnaavoq.

Atuartoq Danmarkimut apuuppat Nunatsinni mobilimik atuisuuffiup (mobilabonnement) Danmarkimi mobilimik atuisuuffimmik imaluunniit taletidskortimik taarsernissaa akikinnerujussuussaaq.

Mobilimik atuisuuffeqaraanni qaammammut aalajangersimasumik akiliisoqartarpoq tamatumanilu atuisuuffiup toqqakkap telefonikkut oqalunnissamut mobildatamillu atuinissamut killigititai tikillugit atuisoqarsinnaavoq. Amerlanertigut atuisuuffimmut qaammatini 6-ini pituttuisoqartarpoq.
Taletidskortit pisiniarfinni assigiinngitsorpassuarni pisiarineqarsinnaapput, taakkualu telefonikkut oqaluussinernik mobildatanillu atuinikinnerusunut naatsorsuussaapput.

Danmarkimi mobiltelefoneqarneq Kalaallit Nunaanniit akikinnerungaatsiarpoq teleselskabillu assigiinngitsut assigiinngitsunik nioqqutillit assigiinngitsunillu akeqartitsisut toqqarneqarsinnaallutik. Aalajangertinnani teleselskabit assigiinngitsut akigititaasa imminnut sanilliunnissaat akilersinnaalluarpoq.

Efterskolini sumiiffinnilu allarpassuarni akeqanngitsumik Wi-Fi-eqartarpoq.

Atuartut amerlanerit ilaqutariinnut attaveqaataasartunut angalaniaraangamik allamukarniaraangamilluunniit bussinik qimuttuitsunillu angalasarput.

Nittartakkami rejseplanen.dk -mi imaluunniit app-imi ”Rejseplanen”-imi Danmarkimi bussit qimuttuitsullu tamarmik aqqutaat takoriaannaapput. Pisisartutut nalunaaraanni aammattaaq bilitsisineq ajornanngilaq taannalu assersuutigalugu nammineq mobilikkut takutinneqarsinnaavoq.

Bussinik qimuttuitsunilluunniit angalaneq ajornannginnerpaamik akilerneqartarpoq ”Rejsekort” atorlugu. Taamaanngippat bussimi imaluunniit qimuttuitsut bussilluunniit unittarfiini automatini bilitsi pisiarineqarsinnaavoq – unittarfiit ilaannaanni kioskini bilitsisisoqarsinnaavoq.
”Rejsekort”-i atoraanni eqqaamasariaqarpoq bussinut aamma qimuttuitsunut ikilernerit taakkunanngalu niunerit tamaasa korti atorlugu nalunaarsortariaqarmat (tjek ind/tjek ud).

”Rejsekort”-i NemID atorlugu iseriarluni uani pisiarineqarsinnaavoq: www.rejsekort.dk. Malugiuk kortip pisiarineraniit tiguneranut ullut quliusinnaammata.
Aamma ”Rejsekort”-i qimuttuitsut unittarfiini ukunani toqqaannartumik pisiarineqarsinnaavoq: København (Hovedbanegården), Odense, Aarhus aamma Aalborg.
”Rejsekort”-i ”immerneqartarpoq” Kalaallit Nunaanni Tusassimik immiinertut ittumik.

Atuartut ilisimassavaat akiliisitaasinnaagamik (nakkutilliinermut akiliut), bussinut imaluunniit qimuttuitsunut ilaanerminni rejserkorti atunngikkunikku immaluunniit bilitsisisimanngikkunik. 16-inik ukioqalereersimagaanni pinerit tamaasa kr. 750-inik akiliisitaasoqartarpoq.

 

Angajoqqaanut, ilaqutariinnut attaveqaataasartunut imaluunniit atuartumut attaveqarnissamut paasissutissat ukiup atuarfiusup ingerlanerani allannguuteqarpata (assersuutigalugu najugaqarfik, oqarasuaatip normua imaluunniit e-mailip adressia), allannguutit Kalaallit Illuanni ilinniagaqartunik ilitsersuisartumut aamma Efterskolinut Ingerlatsivimmut kiisalu atuartup efterskolianut pinngitsoorani nalunaarutigineqassapput, taakkua qaqugukkulluunniit angajoqqaat ilaqutariit attaveqaataasartut imaluunniit atuartoq attaveqarfigisinnaasussaammassuk.