airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

JSEP

Aasaanerani atuarfik ilisimatusarnermut
tunngasoq pinngortitamik 
JSEP - Joint Science Education Project

JSEP tassaavoq Joint Science Education Project - pinngortitamik ilisimatusarnermik aasakkut ilinniarfik, Danmarkip, USA-p Kalaallillu Nunaata akornanni Joint Committeep isumaqatigiissutaannit aallaaveqartoq.

JSEP-ip USA-mit, Danmarkimit Kalaallillu Nunaannit ilinniarnertuunngorniartut Ilisimatusarfimmiillu ilinniartitsisunngorniartut ataatsimoortittarpai.

JSEP ilinnut pinngortitamik ilisimatusarnermik allatut ilinniarusuttumut, pinngortitami Sermersuarmiit ujaqqanut, mineralinut, naasunut, uumasunut, qeriuaannartumut sermimullu misilittaarusuttumut piukkunnartuuvoq. Tamakku qanimut ataatsimoorluni nuannersumillu ilinniarnikkut pisarput!

Nunanit tamalaaneersunit suleqatigiissitaaqqani misissuinermik tunngaveqartumik suliaqartoqartarpoq, tassa imaappoq illit ilinniartutut apeqqutit suut sammerusunnerlugit akiniarusunnerlugillu pillugit aalajangeeqataasinnaavutit. Taamatuttaaq aalajangersimasunik moduleqarpoq, matumani issittumi uumaatsulerineq pillugu siammasissumik ilikkagaqarnissat qulakkiissallutigu.

Ilinniartutut USA-mi Dartmouth Universitymit ilinniartitsisunik ilinniartunillu inuusuttunik suleqateqartarumaarputit. USA-mit universitetimi ilinniartunit ilitsersuunneqarluni pissanganartuuvoq kajuminnartuullunilu.

JSEP-imi suliassanik tunniussassaqarneq ajorpq. Paarlattuanik Kangerlussuarmi mittarfimmi suut ilikkarsimanerlugit saqqummiutissavatit aammalu videonik allakkanillu Youtubemut, Twitterimut Facebookimullu sanassallutit.

Suliniutitta ilaat pillugu video torralluinnartoq suliarput uani assersuutigineqarpoq: https://www.youtube.com/watch?v=t_lbWHrfolM.

Aamma aana nipilersukkamik video Sermersuup qaavaniit sanaaq nuannersoq: https://www.youtube.com/watch?v=12Wkx8buM6U

Aasaanerani atuarfik ilisimatusarnermut tunngasoq pinngortitamik.

JSEP marlunngorlugu avitaavoq. Sapaatit akunneri marluk pinngortitami atuarneq sapaatillu akunnera ataaseq Science Education Week (SciEd). KSFS Kalaallit Nunaannit aqutaavoq SciEd-ilu USA-mit.

Kalaallit Nunaanni Ilinniartitaanermut Naalakkersuisoqarfimmit Kasper Buskimit JSEP aqunneqarpoq, taanna ulluinnarni ilinniarnertuunngorniarfimmi suliassanik ataqatigiissaarisuuvoq siornatigullu GUX Aasianni uumassusilerinermi kemimilu ilinniartitsisuusimalluni.

Siunertaq

Kalaallit pinngortitamik ilisimatusarnerannik ilinniarneq

Pinngortitamik ilisimatusarnermut soqutiginninnerup annertusinissaa

GUX-ip kingorna pinngortitamik ilisimatusarluni ilinniakkamik toqqaanissamut kajumissaarineq

Nunani tamalaani kammalaatinik attaveqarfigisartakkanik pilersitsineq, assersuutigalugu ingerlaqqiffiusumik ilinniarnermut atugassanik

Tuluttut piginnaanngorsaanissaq

Peqataanissamut suut piumasaqaataappat?

1.g-mi 2.g-miluunniit ilinniartuuvutit, sulili pitsaanerussaaq pinngortitamik ilisimatusarnermut, peqqissutsimut tunngasutigut teknikimulluunniit tunngasumik ilinniagaqaruit.

Pinngortitamik ilisimatusarneq soqutiginartippat.

Pinngortitamik ilisimatusarneq pikkoriffigaat.

Immaqa pinngortitamik ilisimatusarnerup iluani ilinniarnermik ingerlaqqiffiusumik ilinniarniarnissannut pilersaaruteqarputit.

Tuluttuullaqqipputit. Atuartitsinerup annersaa tuluttut ingerlanneqarpoq eqimattakkaarlunilu tuluttut oqaluttut peqatigalugit sulisoqartarpoq. Kalaallisut qallunaatullu ullormut suliat eqqartorneqartassapput, attaveqatigiinnerulli ilarujussua tuluttut ingerlanneqartassalluni.  

Aasaanerani atuarfiup pilersaarutaani tamarmiusumi peqataalluarnissat naatsorsuutigineqarpoq.

Kangerlussuarmi naapinnginnitsinni naatsorsuutigineqarput

Facebookimi grupperput 'JSEP 2022' ilannguffigissavat. 1. maj sioqqullugu facebook gruppemi kikkulluunniit tuluttut imminnut ilisaritissimassapput: Isumassarsiutitut tassaasinnaavoq kinaanerit, suminngaanneernerit, pinngortitamik ilisimatusarnermi suna nuannarinerpaanerit, JSEP-imi suna qilanaarinerpaanerit sunngiffimmilu soqutigisatit.

Saqqummiussassamik piareersaassaatit (ass. Power Point), tassani 4-5 min. atorlugit imminut oqaluttuarissallutit.

JSEP-ip ingerlanerani naatsorsuutigineqartut
Pilersaarummi tamarmi peqataalluassaatit pilersaarummillu aqutsisumit ilitsersuutit malissallugit.

JSEP kingorna ilinniartunut naatsorsuutigisat
Aasaanerani feeriap kingorna angerlarsimaffissinni atuarfimmi misigisimasasi oqaluttuarissavasi. Atuarfik tamakkerlugu imaluunniit pinngortitamik ilisimatusarnermut klassinut aalajangersimasunut saqqummiisinnaavusi. Najukkami atuarfimmi isumaqatigiissutigineqassaaq. Kalaallit Nunaata pinngortitaa pissanganartoq pillugu oqaluttuanik nuannersunik siaruarterinissaq allanillu JSEP-imi peqataanissaannut kajumissaarinissaq pitsaalluinnarput.

Ulloq

27. junimiit 11. juli 2022-mut. Ulloq siulleq kingullerlu ullut angalaffiupput. Tikiffissaq aallarfissarluunniit ullunik ataatsimik-marlunnik nuunneqarsinnaapput. 

Malugiuk 2022-mi sapaatit akunnerisa pingajuat Corona pissutigalugu taamaatinneqaqqinnikuummat, ilinniartullu amerikamiut onlinekkut peqataammata. Paarlattuanik Savalimmiunit ilinniartunik immaqa peqataasoqassaagut.  

Pilersaarut

Sapaatit akunneri siulliit marluk imatut taaguuteqarput 'field school'

Kangerlussuarmi uani inissisimaveqassaagut ulluinnarnilu "real scientists" peqatigalugit pisuttassalluta. Ilisimatusartut assersuutigalugu Sermersuaq qanoq aakkiartortiginersoq, qeriuaannartoq qanoq innersoq aammalu silap pissusaata allanngoriartorneri naasunut uumasunullu qanoq sunniuteqarnersut misissugarissavaat. Nunanit assigiinngitsuneersut eqimattakkaarlutik suleqatigiittassapput. Field schoolip ilaattut illit eqimattaqatitillu nammineerlusi pingaarnertut apeqqut nammineq toqqagarsi sammissavarsi. Induktivimik ilinniarneq aammalu misigisat takusallu aallaavigalugit timersorluni ilinniarluni periaaseq atorneqarpoq, atuagarsorneq annikitsumik kisimi atorneqarluni.

Projektvideo ilinniartunit eqimattakkaanit sananeqartoq: http://www.youtube.com/channel/UCgMQ4_RH8ZzMgm1_ESjV47Q

http://www.youtube.com/watch?v=tLgaG4qmL1g             

http://www.youtube.com/watch?v=mBbaTVDM4tQ

Science Education Week sapaatit akunnerisa pingajuanni pissaaq

Angalaneq US Air Forcemik Sermersuarmut, Summit Stationimut 3.300 m portutigisumut imaluunniit EastGRIP-imut (http://eastgrip.org/dk/), serminik qilleriffiusartumut ingerlassaaq. Angalaneq immikkuullarilluinnartuullunilu inuunermi ataasiarluni misigisassaavoq puigunaatsoq. Video ilinniartunit ilisimatusartuniillu 2014-imi Summitimi sananeqarsimasoq takuuk: https://www.youtube.com/watch?v=12Wkx8buM6U

Amerikami Dartmouth Universityp aamma Erica Wallstromip pilersaarutip ilaa taanna aqutaraat, field schoolip kinguninngua toqqaannartumik ingerlanneqartarluni.

Ilinniartitsinermut atortussat

Dartmouth Universitymit ilinniartut modulinik arlalinnik suliaqarsimapput, tassunga ilanngullugit videomik saqqummiussissut aamma assaat atorlugit suliassatut siunnersuutit, takuuk https://sites.google.com/dartmouth.edu/jsep2020/jsep-lesson-plans

JSEP-mi naasut, uumasut, nunalerineq, sermersualerineq nunallu qaavata pissusia pillugit ilisimasat aallaqqaasiutigalugit sammineqartarput. Atuartitsissutit tassunga tunngasut uani nassaarineqarsinnaapput: https://drive.google.com/drive/folders/1vFtvoaeWJIXuRGB8vpg5I1LvZhrpgbTM?usp=sharing

Ilinniartitsisunut allakkiat ilisimatusarnermut tunngavillit arlallit, Kangerlussuup eqqaani issittumilu pinngortitamik ilisimatusarneq pillugu ilisimasanut attuumassutilinnut tunngasut uani nassaarineqarsinnaapput: https://drive.google.com/drive/folders/1DXMAQ6GSPDIn4gJaYRFrYFv-DJTcGV-D?usp=sharing

Atuartunik allatsitsineq (Kalaallit Nunaat)

Nalunaarsornissamut piffissaliussaq 31. marts uunga kabu@nanoq[dot]gl

Kalaallit Nunaanni ilinniarnertuunngorniarfinni tamani ataqatigiissaarisut ilinniartunik toqqaallutillu nalunaarsuisarput. Tamatuma saniatigut ataqatigiissaarisoq ilinniartup atuarfimmi misigisimasaminik saqqummiinissaanut qulakkeerinnittartuuvoq.

Nalunaarsorneq onlinekkut immersugassatigut pisarpoq, paasissutissat tullinnguuttut tunniunneqassallutik: ateq, inuuik, suiaassuseq, maili, oqarasuaat, timmisartumik aallarfissat, passip normua qaangiuffissaalu, atisani angissutsit (S, M, L, XL), kaminni angissutsit sapigaqaraannilu sapikkat. Immersugassaq linki mailikkut immikkut nassiunneqassaaq.

Inissat amerlassusaat
Tullinnguuttumi allassimasut najoqqutassaavoq atuarfinnilu pissutsit apeqqutaallutit amerlassutsit allanngorsarsinnaapput.

GUX Aasiaat:  ilinniartut marluk imaluunniit pingasut
GUX Sisimiut: ilinniartut pingasut
GUX Nuuk: ilinniartut marluk imaluunniit pingasut
GUX Qaqortoq: ilinniartut marluk imaluunniit pingasut

Aningaasaqarneq

Kalaallinut ilinniartunut Kangerlussuarmut Kangerlussuarmiillu angalanermi aningaasartuutit kiisalu Kangerlussuarmiinnermi aningaasartuutit tamarmik, tassunga ilanngullugit nerisassat ineqarnerlu akilerneqassapput. Ilinniartut aningaasanik kaasarfimmiussanik namminneq nassassapput.

Billetit Naalakkersuisoqarfimmit inniminnerneqassapput. 

Nittarsaassinermut atortut
JSEP plakati anillatsiguk atuarfimmilu nivinngarlugu. Plakati uani aaneqassaaq (link). Youtubemi videotivut aamma atukkit atuartullu siornatigut peqataasimasut ilaatillugit.

DK aamma USA

USA: Ilinniartut amerikamiut ugguuna qinnuteqassapput https://sites.google.com/dartmouth.edu/jsep2020/how-to-apply/students-from-the-u-s

Danmark: Danmarkimi ilinniarnertuunngorniartut atuarfitsik aqqutigalugu peqataanissamut qinnuteqarsinnaapput. Qinnuteqaatinit Ilinniartitsinermut ministereqarfiup ilinniartut tallimat toqqassavai. 

JSEP pædagogikki
Kingullermik nutarterneqarpoq: 21/3 2022