airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Tamarmik ataatsimut kattullugit

Majoriaq-mi ingerlatsiviit ilinniagaqarnermut, suliffeqarfiup inuussutissarsiorfiullu akornanni attaveqarfittut atuupput. Katillugit Majoriaq-mi ingerlatsiviit 17-iupput; ataaseq illoqarfinni ataasiakkaani tamani.

Suliffeqarfimmut ilinniartitaanermullu sulianik isumaginninnernik, ilitsersuisarnernik aamma piginnaanngorsaanermik tamanik isumaginnittuullu kommunimi aaqqissuussaasusut immikkoortortaq ataasiinnaavoq.
Aqqut ataasiinnaq
Majoriap siunertaa tassaavoq innuttaasut suliffissaaleqisut piginnaaffigisamik sunniuteqartumillu suliffeqartilernerisigut suliffeqarfimmut anguniakkap anguniarnissaanik ilungersuuteqarnissaq. Majoriami innuttaasut nammineq pilersugareqqilernissamut periarfissanik nutaarluinnarnik tunisisunik tamakkiititamik iluarsiissutissanik naapitaqassapput. Suliffissarsioraanni, aammalu suliffimmik imaluunniit ilinniagaqarnermik eqqortumik nassaartinnani atuagarsornermik imaluunniit atuagarsornertaqanngitsumik piginnaanngorsarnissamik pisariaqartitsigaanni. Innuttaasunut ataasiakkaanut tamanut, ingerlariaqqinnissaminnut ikiorserneqarnissaq pillugu kissaateqartunut saaffiginnittunut taakkununnga tunngasunik pilersaarusiortoqassaaq. Najugaqarfimmi Majoriap ilinniagaqarnissanut qinnuteqaatit tigooragartarpai, aammalu suliffimmi ilinniartut sungiusaammillu sulisut, taakkulu sungiusarfissaasa akornanni attaveqarfiginninnerup ilaanik isumaginnittarluni.

Majoriaq pingaarnertut sulianik pingasunik isumagisaqarpoq:
• Suliffinnik innersuussisarneq
• ilinniagaqarnissamut suliffeqarnissamullu ilitsersuisarneq
• ilinniagaqarnissamut suliffeqarnissamullu piginnaanngorsarneq
Suliffinnik innersuussineq
Majoriap sulisitsisut suliffissaaleqisullu akornanni attaveqalersitsinissaq akunnermiliuffigaa, taamaalillutik suliffiit inuttaligassat sulisartunit najugaqavissunit inuttalerneqassammata. Nassataraa Majoriap inuussutissarsiorfimmi pisariaqartitsisoqarneranik tamanik takusaqarsinnaasariaqarnera, aammalu suliffissaaleqisut piginnaasaannut tamatuminnga tulluarsaqatigiissaasarnissaa. Suliffissaaleqisuni piginnaasat amigaataappata sapinngisamik piginnaanngorsarneqartariaqassapput, taamaalillutik inuussutissarsiorfimmi piginnaasanik pisariaqartitanik naapertuutsitaqalissammata.
Ilitsersuineq
Piginnaasaqarfigisamik sunniuteqartumillu ilitsersuisarnikkut innuttaasut siunissaminnut eqqortumik sammivissaqartilernissaat qularnaarneqassaaq. Majoriaq ilinniagaqarnernut, piginnaanngorsarnernut suliffeqarnernullu ilitsersuisartuuvoq. Ilitsersuineq innuttaasoq suleqatigalugu pisarpoq, erseqqissumik anguniagaqartumik, aamma aqqutaani anguniakkat ilaannik erseqqissumik nassuiakkanik iliuusissatut pilersaarusiornikkut. Iliuusissatut pilersaarutip innuttaasoq suliffeqartilissavaa aamma/imaluunniit ilinniagaqartilissavaa.
Piginnaanngorsarneq
Ilinniagaqarnissamut aamma suliffeqalernissamut Majoriaq atuagarsornermik aamma atuagarsornertaqanngitsumik piginnaanngorsaasarpoq. Innuttaasut inuusunnerusut, aamma innuttaasut Meeqqat Atuarfiannit Soraarummeerutaasumik amigaateqartut, imaluunniit ilinniagarfimmi tiguneqarnissamut karakteerinik ataasiakkaanik amigaateqartut Majoriami atuagarsornikkut piginnaanngorsarneqarsinnaapput. Ukiumut nuna tamakkerlugu marloriarluni soraarummeersitsisoqartarpoq.

Atuagarsornertaqanngitsumik piginnaanngorsarnermut saaffigisat tassaapput inuusuttut aamma innuttaasut inuusunnerusut, inuttut inooqatigiinnermilu piginnaasamik nukittorsarnissaannik pisariaqartitsisut, aamma sulilernissamut aamma/imaluunniit atuagarsornertalittut piginnaanngorsaanermik ingerlassaqarnissamut piareersimanngitsut. Atuagarsornertaqanngitsumik ingerlassamut siunertaq tassaavoq ilinniartut ilinniagaqalernissaannut aamma/imaluunniit sulisartuulernissaannut piareersimalersinnissaat.

Suliffinnut, Ilitsersuisarnermut Piginnaanngorsaanermullu ingerlatsiviit pilersinnissaat pillugu inatsisip nutaap atuutsilerneranut atatillugu nunami tamarmi siusinnerusukkut suliffissarsiuussisarfiit aamma Piareersarfiit 1. januar 2016-imi Majoriaq-mi ingerlatsivinnut kattunneqarput.
Kingullermik nutarterneqarpoq: 02. marts 2020