Ukiuni arlaqalersuni Galtrup Efterskolep Inuit Games unammiuaarutigitillugit Kalaallit Nunaanni Danmarkimilu kulturit naapinnerata ilaanut ilisarititsissutitut timersornermillu atuartitsinerup ilaatut ingerlattarsimavai, tamannalu nuannaarutigineqarluartarmat Inuit Games ukiumut ataasiarluni sapaatip-akunnerata naanerani aaqqissuisarneq efterskolip ileqquulersissimavaa.
Inuit Games atuarfimmi timersornermik atuartitsisarnermut ilanngunneqarsimaneranut pissutaasoq pillugu ilinniartitsisoq Maj Blazejewicz ima oqaaseqarpoq:
”Kissaatigisimavarput atuartuutitta tamarmik timersuutit assigiinngitsorpassuusinnaasut taakkualu kulturinut sumiiffinnullu atassuteqartartut paasisaqarfigissagaat. Tamatuma saniatigut Inuit Gamesip nuannersuunerat misigisaqarfigisarparput kikkut tamarmik peqataasinnaatitaasarmata naligikannikkanik unammisaqarnissaq eqqumaffigiinnarlugu. Atuartut tamarmik, qallunaat kalaallillu, ukiup ingerlanerani taassuminnga aaqqissuussaqaraangatta peqataasarput.”
Aamma peqatigiiffimmi Kalaallit Meerartaanni ileqqorineqarpoq suliniummut ’Et bedre liv i Danmark’-imut (Danmarkimi inuuneq pitsaanerusoq) atatillugu sammisaqartitsinermut tassunga peqataasarneq – peqataasullu tassaasarput sulisut, kajumissutsiminnik ikiuutartut aamma meeqqat peqatigiiffimmut tassunga attuumassuteqartut Danmarkimit tamarmeersut.
