airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Meeqqat mikisut kalaallisut oqaatsimikkut attaveqarnermikkullu ineriartornerinit paasisat pingaarnerit

Nalunaarusiaq “Meeqqat mikisut (8-36-nik qaamm.) kalaallisut oqaatsimikkut attaveqarnermikkullu ineriartornerinit paasisat pingaarnerit” maanna Ilinniartitaanermut Aqutsisoqarfiup saqqummersippaa ullunilu makkunani susassaqartunut agguaatileruttorlugu.
22. juni 2022

Meeqqat attaveqartarnermikkut oqaatsimikkullu ineriartornerat nunatta kitaani siullermeersumik aaqqissuussaasummillu Ilinniartitaanermut Aqutsisoqarfiup Meeqqanut suli atualinngitsunut immikkoortortaqarfik suleqatigalugu 2012-mit 2016-imut misissorpaa. Tamatumani siunertaavoq kalaallit meerartaasa siusissukkut oqaatsitigut pigiliussiartortarnerannik uppernarsaasersugaasumillu ilisimasaqalernissaq. Inernerit meeqqat nalinginnaasumik paasinnittarnerinik oqaasertussusaannillu takutitsipput. Tamanna meeqqat oqaatsimikkut kingusissutut inissisimasinnaasut takuneqarsinnaalernissaannut pisariaqarpoq. Siunertamut tassunga meeqqat oqaatsinik paasinnissinnaanerinut atuisinnaanerinullu naleqqiiffissanik tabeliliortoqarpoq.

Misissuineq oqaatsitigut nalinginnaasumik ineriartortarneq pillugu ilisimasaqalersitsiinnanngilaq, aammali kalaallit meerartaasa oqaatsinik pigiliussiartornerannut ilisimasanik nutaanik sulinermi atorneqarsinnaasunik tunniussivoq. Taamattaaq paasisat tunngavigalugit pigiliussiartortarnerup ilusaa nassuiarneqarsinnaavoq; soorlu ussersornerit, meeqqaat oqaaseqqaavi, suiaassutsikkut assigiinngissutsit, oqaasilerinermullu tunngassut ajornassusaallu.

Kalaallittaaq oqaasii nassuiarneqarput, nassuiarnerisigullu kalaallit meerartaasa oqaasinikkiartornerminni oqaatsit ilusaanni suut aporfigisinnaasaraat, kulturimilu oqaatsinik atueriaatsip attaveqariaatsillu meeqqat oqaasinikkiartornerinut sunniutigisinnaasaat takuneqarsinnaallutik.

Nalunaarusiaq meeqqat oqaasiinik suliaqartunut assigiinngitsunut saaffiginnittuuvoq, soorlu oqallorissaasut, perorsaasut, peqqissaasut, ilinniartitsisut, tarnit nakorsaat aamma oqaatsinik ilisimatuut.

Nalunaarusiami meeqqat kalaallisut oqaasinikkiartornerminni oqaatsini aporfigisartagaat itisilerlugit allaatigineqarput uku apeqqutit aallaavigalugit:

- Meeqqat oqaatsini nipit qanoq ilinniartarpaat?

- Meeqqat attaveqarniarlutik ussersortarneri qanoq ineriartortarpat?

- Meeqqat oqaatsit suut ilinniaqqaartarpaat, aamma niviarsiaqqat nukappiaqqallu oqaasinikkiartortarneri assigiinngissuteqarpat?

- Meeqqat oqaasinikkiartorneri aaqqissuussatut ineriartortarpat?

- Oqaatsitigut ineriartorneq nalinginnaasoq meeqqanit malinneqarnersoq qanoq nalilissava?

Misissuinermik tunngaveqarmat kommunit meeqqat oqaasiinik naliliinerminni ikiuutigisinnaavaat, aammali angajoqqaat meeqqamik oqaasiinik soqutigisallit meeqqat oqaasiisa ineriartornerinut tunngasunik paasisaqarfigisinnaallugu.

Iserfissat

Nalunaarusiaq

Paasisaqarnerorusukkuit attavigiuk:
Atuarfinnut siunnersorti Mette Larsen Lyberth 
Email: mell@nanoq.gl
Oqarasuaat: (+299) 34 62 78


Aamma atuarsinnaavatit

 

Qarasaasianni paasissutissat ilaat atoqqissinnaajumallugit quppernermi matumani cookie-t atorneqartarput. Akueriuk annertunerusumilluunniit uani paasisaqarit.