Nunatsinni siullermeertumik kalaallisut atuartitsisut katersuunnerat/isumasioqatigiinnerat

Katersuunnermi qulequtaq pingaarneq tassaavoq atuarneq/atuarsinnaaneq, tassungalu tunngassuteqartut ulluni marlunni saqqummiunneqartassapput workshopissutigineqassallutillu.

Taakkuinnaassanngillalli, atuartitsissutigineqarsinnaasummi allat, soorlu kalaallisut oqaatsit aappaattut, oqaatsinik atuineq ilaatigullu toqqorsiviit digitaliusut qanoq atuartitsinermi atorneqarsinnaaneri saqqummiunneqarumaarput.

Katersuutsitsinermi peqataasut atuakkanik misissuiniassammata isumassarsiorniassammatalu atuakkanik saqqummersitsisoqassaaq.

Katersuutsitsinermi anguniagaavoq kalaallisoortitsinerup ataqatigiinnerulernissaa ineriartortinneqarnissaalu, katersuunnermi kalaallisoortitsisut ilisimasaminnik avitseqatigiinnissaat, isumasioqatigiinnissaat, isumassarsioqatigiinnissaat kiisalu attavissaminnik pissarsinissaat periarfissaassaaq.

Ilinniartitaanermut Aqutsisoqarfiup GUX, Ilinniarfissuaq kiisalu Ilisimatusarfimmi Oqaasilerinermik, Atuakkialerinermik Tusagassiuutilerinermillu Immikkoortortaqarfik suleqatigalugit katersuutsitsineq aaqqissuussaraa. Peqataasussat katillugit 80-it missiliorpaat.

Peqataanermi ilaatigut saqqummiussassat tusarnaariarneqarsinnaasut tassaapput ukiuni kingullerni tuartitsissutit saqqummersitat atuarusulersitsiniaanermik siunertaqartut, imaluunniit atuartitsinermi atuffassinerit oqaloqatigiinnertallit qanoq ingerlanneqarsinnaaneri taavalu kalaallisut atuarsinnaaleriartornermut spilli Graphogame. Katersuutsitsinermi aamma saqqummiisut oqaloqatigineqarsinnaapput.

Mette Larsen Lyberth pisussamut aaqqissuisut ilaat ima oqarpoq:

“Atuarsinnaaneq inuup inuiaqatigiinni inooqataanermini sakkussaasa annersaasa ilagaat – atuarsinnaaneq sorpassuarnik ammaassisarpoq, taamaattumik piginnaasaq ataavartumik ineriartortitassaavoq. Ukiuni makkunani digitalimik atuineruleriartornitsinni nunarsuarmioqatitsitulli naqitanik atuarsinnaanerput annikilliartorsorinarpoq, taamaattumik piginnaasaq ataavartissagaanni inerisaaffiullunilu soqutiginarsartuartariaqarpoq.“

Paasisaqarnerorusukkuit attavigisinnaasat: Maren Louise Dalager mail: mlba@nanoq.gl imaluunniit Mette Larsen Lyberth mail: mell@nanoq.gl

Aamma atuarsinnaavatit