Asasavut suleqativut pikkorissut Isumaginninnermut Aqutsisoqarfimmut nuungajalerput, tassanngaanniit suliniutinik allanik meeqqat mikisut aamma suli atualinngitsunik paaqqinnittarfiit pillugit suliniutaasunik – ilaatigut Manumik, sioqqutsilluni iliuuseqarnermik kiisalu Meeqqat 0-18-imik, meeqqani siusissukkut paasisaqartarnermut tunngasumik – uatsinnik qanimut suleqateqarnertik nangissallugu.
Meeqqanut suli atualinngitsunut immikkoortortaqarfimmi siunnersortit nuunnerminni Meeqqanut suli atualinngitsunut immikkoortortaqarfimmut – Meeqqanut, Inuusuttunut Ilaqutariinnullu Naalakkersuisoqarfiup 2021-mi pilersinneqarneranut atatillugu suliassaqarfiit allanngorneranni pilersinneqartumut – ilaalissapput. Naalakkersuisoqarfimmi nutaasumi tassani suliniutit iliuuserineqartullu meeqqanut inuusuttunullu suliniutaasut, 2021-mi Inuit Ataqatigiit Naleqqallu naalakkersuisooqatigiinnissamik isumaqatigiissutaannissaaq eqqaaneqartut, ataatsimuulersinneqarnissaat nukittorsarneqarnissaannut siunertarineqarpoq.
”Naalakkersuisooqatigiit isumaqatigiissutigaat nunatsinni meeqqat inuussuttullu annertuumik iliuuseqarfigineqartariaqartut. (...) Meeqqat nunatsinni qanoq inuuneqaraluarunilluunniit ineriartornissaminnut atuarnissaminnullu pisinnaatitaaffeqarnerat timitalerniarlugu meeqqanut ilaqutariinnullu pisortat iliuuserisaat immikkut naalakkersuisoqarfeqalersillugit ataqatigiissarneqassapput. Naalakkersuisoqarfik meeqqat, inuusuttut ilaqutariillu pillugit ilisimasanik ataqatigiissaarititsissaaq aammalu meeqqat pillugit oqaaseqartartoq suleqatigalugu pisinnaatitaaffiit nunatsinni malinneqarnissaat siunertaralugu pilersaarusioqatigiinneq ingerlatissallugu.”
Meeqqanut suli atualinngitsunut immikkoortortaqarfimmi siunnersortit nunatsinni kommunit qanimut suleqatigalugit meeqqanut suli atualinngitsunut perorsaanikkut inerikkiartuutaasunik ulluunerani neqeroorutinik suliaqarput. Maanna siunnersortit suliniut ukiuni pingasuni suliaqarfigineqartussaq – Pilersitsiniarneq 3 – meeqqat atugarliortut siusissukkut suliniuteqarfigineqartarnissaat pillugu kommunit, suliffeqarfiit angajoqqaallu ikiorneqarnissaannut tunngassuteqartoq suliarileruttorpaat.
Suliassaqarfiit allanngornerat tamatumalu malitsigisaanik nutaamik aaqqissuussineq pillugit suleqatigiit aqutsisuusoq Liili Kleist ima oqaaseqarpoq:
”Isumaqarpugut tamanna pissanganarluinnartuusoq. Meeqqat, inuusuttut ilaqutariillu pingaartillugit suliniutinik katersuinerup suliniuteqartut assigiinngitsut assigiimmik suliaqarfigisaminnut tunngasutigut suleqatigiilluarsinnaanerulersillugillu siunersiueqatigiilluarsinnaanerulersippai. Tassuuna ilisimasanik katersuivittaassaagut imartuumik tamatta pissarsiffigalugulu immersueqataaffigisassatsinnik. Tamatuma sunniivigeqatigiinneq pilersissavaa, iliuusissanillu toraarfeqarnerusunik pilersitsisinnaalersissalluta.”
Ilinniartitaanermut Aqutsisoqarfimmi meeqqanut suli atualinngitsunut immikkoortortaqarfimmi siunnersortit suleqatigisimanerat nuannaarutigingaarsimavarput, aqutsisoqarfiillu assigiinngitsut akornanni suleqatigiilernissatsinnut qilanaarpugut.
Paasisaqarneruniartunut attaveqarfissaq:
Immikkoortortaqarfimmi pisortaq Maliina Junge Jørgensen, Isumaginninnermut Aqutsisoqarfik
Email: maju@nanoq.gl
Telefon: (+299) 34 67 94
