Ilinniartitaanermut Aqutsisoqarfiup ukioq 2020 naalersoq, misiligutit naqinnernik ilisarsisinnaanngitsutut ilimanaateqarsinnaasunik pasitsaassiniarnermut atugassat atorneqarsinnaalersippai. Misiligutit 1.kl. qiteqqunneraniit 3.klassip naaneranut atorneqarsinnaasut ukiup affakkaartumik atuarnermut allannermullu nalilersuutitut atorneqarsinnaasut eqimattanut ataasiaakkaanullu misiligutitaqarput. Taakku saniatigut Kalaallit Nunaanni atuartut naqinnernik ilisarsisinnaanngitsut pillugit nalunaarusiaq saqqummerpoq.
Maanna misiligutit atorneqarnissaannut atuartullu angusaasa nalilersorneqartarnissaannut ilitsersuut saqqummerpoq. Ilitsersuummut ilaapput; atuartut angusaat aallaavigalugit atuartitsinermut ikorfartuinissamullu siunnersuutit, naqinnernik ilisarsisinnaanngitsut pillugit kiisalu atuarsinnaaleriartornermut allassinnaaleriartornermullu paasissutissat isumassarsiorfiusinnaasut.
Ilitsersuummut ilanngussat atuartut akissutaannut naqqissuut taassungalu ilitsersuut, kiisalu misiligutit Ilinniartitaanermut Aqutsisoqarfimmut immikkut ittumik piniagassaagallarput. Atuarfinnulli pikkorissaanermik naammassillutik ingerlatsiviusunut atortussat tunniussuunneqaleruttorput.
Ilitsersuut kalaallisut ilinniartitsisunut assigisaannullu atugassaasoq kalaallisuinnaq allataavoq.
Atortussianik tunniussineq kommunenut tamanut ilisimatitsissutigineqareerpoq.
Ilitsersuut takuniarukku linki tooruk