Danmarkimi efterskolernissap qinnutiginnginnerani

Pingaartuuvoq angajoqqaat meeqqallu Danmarkimi efterskolerneq, tamatumalu toqqarnissaa meeqqamut eqqortuunersoq pillugu oqaloqatigiinnissaat.
Pingaarluinnartuuvoq meeqqap nammineq efterskolernissaminik kissaateqarnissaa, aallarnissanilu pillugu nammineerluni aalajangeeqataanissaa.
Danmarkimi efterskolerneq atuartunut tamanut naapertuuttuusanngilaq. Meeraq efterskolernissaminut kajumissuseqanngitsoq merserusuttorluunniit angajoqqaat uteriiserlutik efterskolertissappassuk, meeqqamut pitsaanerpaasussatut isigineqarsinnaanngilaq.

Danmarkimi efterskolernissap qaqugukkut qanorlu kissaatigineqalernera apeqqutaatinnagu eqqarsaatigisassat amerlaqaat, atuartutut, angajoqqaatut ilinniartitsisutullu angajullernut siunnersuisartutut/ ilitsersuisartutut.

Ilaqutariit ilisimalluartariaqarpaat pilersaarusiorneq qinnuteqarnerlu piffissamik annertuumik atuiffiusarmata. Taamaammat inassutigineqarpoq efterskolernissap pilersaarusiornera sioqqutsilluarluni aallartinneqassasoq.
Ilaqutariit ilaat piffissaq sivisooq atorlugu efterskolimik meeqqamut naapertuulluartumik misissuillutillu ujartuisarput – allalli ukiup atuarfiusup aallartinngitsiarnerani nalaatsornerinnaanerusumik efterskolimik toqqaasarlutik.

Aamma isummerfigisariaqarpoq atuartoq efterskolimi 9. imaluunniit 10. klassimi atualissanersoq. 10. klassimi faginut toqqagassanut naleqqiullugu periarfissat amerlanerusarput, taamaammallu atuartunut Nunatsinni 10. klassimi naammassisimasunut inassutigineqartarluni.

Efterskolimi aalajangersimasumi inissaq qularnaarniaraanni, pisariaqarsinnaavoq atuarnerup aallartinnissaa ukiunik 2 - 5 -nik sioqqullugu atuartup allatsereernissaa. Efterskolimi kissaatigineqartumi inissaqanngippat, efterskolit amerlanersaat utaqqisunut allassimaffeqartarput – atuartup allatsiffigisinnaasaani.

Atuartut ataasiakkaat efterskolernerminnut siunertaat atuartumiit atuartumut assigiittanngillat – aamma atuartut ataasiakkaat efterskolernerminni pissarsiaat atuartumiit atuartumut nikerartarput.

Danmarkimi efterskolerniarnermi siunertarineqartartoq nalinginnaanerpaaq tassaavoq, atuartup inuusuttunut iliniakkamik aallartitsinnginnermini qallunaat oqaasiinik annertunerusumik ilinniarumanera. Aamma Danmarkimi efterskolerneq allanik siunertaqarsinnaavoq, assersuutigalugu:

• atuartoq nutaanik misilittagaqarnissaminik kissaateqarpoq, ulluinnarisani nalinginnaasoq qimallugu
• atuartoq ineriartornissaminik inuttullu inerikkiartornissaminik kissaateqarpoq
• atuartoq atuartitsissutinut tunngasutigut pikkorinnerulerusuppoq
• atuartoq ilinniagaqalernissaminut annertunerusumik piareersarusuppoq
• atuartoq soqutigisani aalajangersimasup iluani pikkorinnerulerusuppoq assersuutigalugu isiginnaartitsineq, assammik arsarneq, ilusilersuineq imaluunniit e-sport.

Atuartoq efterskolernerminut nammineerluni qanorluunniit siunertaqaraluarpat efterskolerneq piffissamik atuilussinnarnerunngisaannaassaaq. Efterskolernerup ingerlanerani ilikkagassatigut, inooqatigiissutsikkut inuttullu ineriartornerit tassaapput piginnaanerit pisinnaasallu kingusinnerusukkut ilinniarnermi sulinermilu iluatsitsinissamut pisariaqartut - amerlanerillu inuunermik sinnerani ikinngutigiligassaminnik naapitsisarput.

Danmarkimi maannakkorpiaq efterskolit 241-upput, taamaammat toqqagassat amerlaqaat. Efterskolit amerlanerit ilinniartitsissutinik soqutigisaqarfinnilluunniit aalajangersimasunik pingaarnerutitaqartarput, assersuutigalugu nipilersorneq, timersorneq imaluunniit inooriaatsit.
Aamma efterskoleqarpoq atuartunut immikkut perorsaanikkut taperserneqarnissaminnik pisariaqartitsisunut immikkut neqerooruteqartunik, assersuutigalugu naqinnernik ilisarsisinnaanngitsunut imaluunniit atuartunut nalinginnaasumik ilikkariartornermikkut ajornartorsiuteqartunut.
Efterskolit ilaasa inuunermik isiginneriaaseq aalajangersimasoq tunngavigisarpaat assersuutigalugu efterskoli kristumiutut inuunermik inunnillu isiginneriaaseqarnermik tunngavilik.

Pingaartuuvoq efterskolip atuartup soqutigisaanut, pisariaqartitaanut piginnaariigaanullu naapertuunnerpaasup toqqarnissaa. Assersuutigalugu atuartumut naapertuuttuunavianngilaq efterskoli nipilersornermik aallussiviusoq toqqassaguniuk namminerli e-sport soqutiginerpaasaralugu.

 

Taamaammat efterskolimut qinnuteqannginnermi makkua misissoqqaarnissaat pingaartuuvoq:

• efterskolip ilimagisai, malittarisassai aamma atuartunit piumasaqaatai suuppat – eqqarsaatigalugulu taakkua akuerisinnaanerlugit
• efterskolimi atuartitsissutit suut pinngitsoorani peqataaffigineqartussaappat
• atuartitsissutit nammineq toqqagassat/immikkut ilinniagassat suut efterskolip neqeroorutigivai
• efterskoli qassinik atuartoqarpa aamma atuartup efterskoli angisooq imaluunniit mikisoq toqqissisimanartinneruaa
• efterskolip pingaartitatigut tunngavii suuppat taakkualu atuartumut naapertuuppat
• akianut suut ilaappat? Atisassarsiutissat, nunanut allanut angalanerit?
• Aamma naapertuuttuusinnaavoq misissussallugu ileqqulersuutit suliassallu suut atuartut pinngitsooratik peqataaffigisussaaneraat soorlu ullaakkut naapeqatigiinnerit, timigissarneq, ilinniagassalerineq, eqqiaaneq, igaffimmi ikiuunneq il.il.

Aamma soorunami eqqarsaatersuutinut ilaasariaqarpoq, efterskoli ilaqutariit attaveqaataasartut najugaqarfiannut naleqqiullugu sumi inissisimanersoq aamma ilaqutariit attaveqaataasartut orninnerinut atatillugu piffissaq qanoq annertutigisoq atorumaneqarnersoq.

Siunertamut naapertuuttuussanngilaq efterskoli ilaqutariit attaveqaataasartut najugaannit ungasissumiittoq orninniaraannilu piffissamik sivisuumik atuiffiusariaqartoq toqqassagaanni - ilutigisaanilli aamma imaassinnaavoq efterskoli ilaqutariit attaveqaataasartut najugaqarfiannut qaninnerpaaq sivikinnerpaamillu angalalluni tikittariaq atuartumut naapertuutinngitsoq.

Imaassinnaavoq efterskoli angajoqqaat ikinngutilluunniit efterskolerfigisimasaat atuartumut naapertuunnerpaajunngitsoq.

Efterskolit arlallit atuarfiit feeriarnerisa nalaanni camp-eqartarput, assersuutigalugu poorskimi camp-i imaluunniit aasaanerani camp-i allatulluunniit sivikitsumik pikkorissaallutik. Efterskolernissamik qinnuteqannginnermi efterskolimi camp-ernikkut efterskolimi inuuneq atuartumut naapertuuttuunersoq paasiniarneqarsinnaavoq.

Namminersorlutik oqartussat efterskolimi camp-eqarnernut taakkununngaluunniit atatillugu angalanernut tapiissuteqartanngillat.

Efterskoleforeningip nittartagaani takuneqarsinnaavoq efterskolit suut camp-eqartartut, tamanna aamma efterskolit namminneq nittartagaanni takuneqarsinnaavoq.

Kalaallit atuartut ikinnerpaat Danmarkimi efterskolit aalajangersimasut neqeroorutigisinnaasaannik paasiniaallutik alakkaanissamut periarfissaqarput – taamaammat aallaqqaasiullugu internetsikkut misissuinissaq isumassarsiatsialaavoq. Uani ujarlertoqarsinnaavoq:

• efterskolerne.dk – tassani efterskolit ilutsimikkut assigiinngitsut ujarneqarsinnaapput aamma/imaluunniit Danmarkimi nunap immikkoortuini (regionini) efterskolit ujarneqarsinnaallutik. Ujarlernermi eqqueqqissaarniartariaqarpoq. Ujarliut atorlugu nassaarineqarsinnaapput efterskolit nalinginnaasut (almene efterskoler), naqinnernik ilisarsisinnaanngitsunut efterskolit (ordblindeefterskoler) imaluunniit immikkut atuartitsinermut efterskolit (specialefterskoler).

Danmarkimi efterskolit tamarmik namminerisaminnik nittartagaqarput, taakkualu paasiniaaffigilluartariaqarput. Efterskolip nittartagaani paasissutissat naammanngippata annertunerusunik paasissutissarsiornissaq pisariaqarsinnaavoq, taamaaliortoqarsinnaavorlu efterskoli toqqaannartumik attaveqarfigalugu.

Danmarkimi efterskolernissaq aalajangiunneqarpat angajoqqaat atuartoq efterskolimut kissaatigineqartumut atuartussatut nalunaarutigissavaat. Efterskolit amerlanerit atuartussatut nalunaarutiginninnermi akiliuteqarnissaq piumasarisarpaat.

Atuartoq efterskolinut arlalinnut atuartussatut nalunaarutigineqarsinnaavoq, kisianni angajoqqaat eqqumaffigisariaqarpaat efterskolinut atuartussatut nalunaaruteqarfigisanut tamanut akiliuteqartussaagamik.

Atuartussatut nalunaarutiginninnermut akiliut nalinginnaasumik utertinneqarsinnaasanngilaq, aamma atuartoq efterskolimi tassani atualinngikkaluarpalluunniit.

Danmarkimi efterskolimi atualertussatut akuerisaaneq nalinginnaasumik pingaarnertullu allakkatigut pisarpoq. Efterskolit ataasiakkaat atuartussatik pillugit paasissutissatut piumasaat nikerarsinnaapput.

Efterskolit ilaasa atualertussanik akuersinissaminnut atatillugu internetsikkut oqaloqateqarneq imaluunniit atuartussanik apersuineq ingerlattarpaat. Oqaloqatigiinnermi imaassinnaavoq efterskolip Efterskoleforeningip apersuinissamut ilitsersuutaa atoraat (takuuk immikkoortoq ’atuartussatut akuerisaaneq’). Apersuinissamut ilitsersuut oqaloqatigiinnerup ingerlanerani efterskolip apeqqutigisinnaasai pillugit isumassarsiorfiusinnaavoq.