Atuartup efterskolernini unitsikkusulissaguniuk

Atuartut efterskolernerminnik unitsitserusulernerat assigiinngitsunik peqquteqarsinnaavoq. Peqqutaasartut nalinginnaanerpaat ilagivaat oqaatsitigut ajornartorsiutit, ingerlanerliorneq imaluunniit tarnikkut ajornartorsiutit ima imaannanngitsigisut, meeqqap Danmarkimi efterskolernerani qaangerneqarsinnaanatik. Efterskolernerup ikerinnakkut unitsinnginnerani ajornartorsiutit soorunami aaqqinniarneqartariaqarput.

Atuartup angajoqqaavisalu efterskolernerup unitsiinnarnissaa kissaatigigunikku Kalaallit Illuat efterskolimut atasoq attaveqarfigissavaat, uniinnarnissap ilinniartunik siunnersuisartumut oqaloqatigiissutiginissaa siunertaralugu. Oqaloqatigiinnermi qulaajarniarneqassaaq, atuartoq ajornartorsiutit uniinnarniarnerminut pissutigisai qaangerniarlugit ikiorneqarsimanersoq.
Atuartup uniinnarnerminut atatillugu angerlarnissaminut bilitsimut aqqutaanilu unnuinissaminut akiliunneqarnissaminik pisinnaatitaaffeqarnini pigiinnassappagu piumasaqaataavoq atuartup Kalaallit Illuannit efterskolimut atasumit aaqqissuussaasumik oqaloqateqaqqaarnissaa.

Efterskolerneq unitsinneqarpat tapiiffigineqarnissamut pisinnaatitaaffik ullormit efterskolernerup unitsinneqarneraniit atorunnaassaaq. Efterskoli atuarnerup ikerinnakkut unitsinneqarneranut akiliutissamik aalajangersaasimappat (efterskolimik isumaqatigiissummi tamanna ersissaaq) piffissami tassani tapiiffigineqarsinnaaneq ingerlaannassaaq, taamaattorli annerpaamik sapaatip-akunnerini 4-ni.

Atuartup efterskolernini ikerinnakkut unitsippagu, unitsitsinermiit sapaatip akunnerini aalajangersimasuni tamakkiisumik akiliisoqarnissaa efterskolip piumasarisinnaavaa. Danskit naalagaaffiannit tapiissutit atuartup efterskolimi najugaqarunnaarneranit unitsinneqassapput. Tamanna taaneqartarpoq ikerinnakkut atuarunnaarnermut akiliut, nalinginnaasumillu efterskolilu isumaqatigiissummi angajoqqaat atsiugaanni aammattaaq ersittarluni.

Atuartoq efterskoliminit anisitaassappat efterskolit ilaat aamma ikerinnakkut atuarunnaarnermik akiliummik piumasaqartarput – tamanna aamma efterskolilu isumaqatigiissummi ersissaaq.

Efterskolip toqqarsinnaavaa ikerinnakkut atuarunnaarnermut akiliutip qularnaveeqqutitut akiliutinit aamma angajoqqaat siumoortumik akiliutaannit ilanngaannissaa - tamannattaaq efterskolilu isumaqatigiissummi ersissaaq.

Ikerinnakkut atuarunnaarnermut akiliutit akiliutaajunnartullu allat angajoqqaat namminneq akilissavaat – aamma efterskolernermut tamakkiisumik tapiissuteqartoqaraluarpalluunniit.

Atuartoq 18-it inorlugit ukiulik ilinniarnerminik ikerinnakkut unitsitsippat, assersuutigalugu efterskolernerminik, kommunimi ilitsersuisarfiup (Majoriaq) pisussaaffigaa nammineq attaveqarluni atuartumik ilitsersuinissani, atuartup ilinniarnerminut atatillugu iliuusissatut pilersaarusiuunnissaa siunertaralugu. Ilinniarnermut atatillugu iliuusissatut pilersaarummi aallaavigineqassaaq, iliuusissatut pilersaarusiaq atuartup meeqqat atuarfianni ilinniartitsisuni peqatigalugit suliarinikuusaa.

Atuartunik 18-it inorlugit ukiulinnik efterskolernerminnik ikerinnakkut unitsitsinermi kingorna angerlartunik Majoriat ilitsersuinerminni aaqqissueriaasiat assigiinneq ajorpoq. Atuartoq angajoqqaavilu atuartup angerlamut apuunnerata kinguninngua najukkaminni Majoriamit attavigineqanngikkunik pingaartuuvoq namminneerlutik Majoriami ilitsersuisartunut saaffiginninnissaat.

Februar 2021-miilli Efterskolinut Ingerlatsiviup illoqarfimmi atuartup angerlarsimaffiani Majoriaq atuartup Danmarkimi efterskolernerminik unitsitsiinnarnera pillugu ilisimatittalernikuuaa. Taamaaliornikkut qularnaarumaneqarpoq, atuartup ilinniakkaminik (efterskolernerminik) unitsitsiinnarnermi kingorna ilinniarneq inuussutissarsiutillu pillugit ilitsersorneqarnissaa. Illoqarfimmi atuartup angerlarsimaffigisaani Majoriap saaffiginerani Efterskolinut Ingerlatsiviup angajoqqaat saaffiginnissutip assilinerata nassiunneratigut ilisimatittarpai.