Paasissutissat atorluarneqarsinnaasut efterskolimiinnermut tunngasut

Immikkoortumi uani Danmarkimi efterskolernermut naleqqiullugu pissutsit naapertuussinnaasut assigiinngitsut pillugit paasissutissiisoqarpoq – efterskolimi inuunermut aamma Danmarkimi inuunermut tunngasut ilaapput.

Meeqqap aallarnissaa sioqqulluarlugu angajoqqaat meeraq peqatigalugu immikkoortoq manna atuarluartariaqarpaat, pissutigalugu:

• efterskolimi inuunermi nalaanneqarsinnaasut tamaasa piareersimaffigissallugit pingaartuummat
• aallannginnermi isumannaagassaqarnersoq paasiniartariaqarmat
• aallannginnermi imaluunniit Danmarkimut apuunnerup kingorna arlaatigut pisinissaq/pissarsiniarnissaq pisariaqassanersoq paasisariaqarmat.

Aammattaaq naapertuuttuussaaq ilinniartitsisup angajullernut siunnersuisartup/ilitsersuisartup immikkoortumut matumunnga akuutinnissaa, taassuma Danmarkimi efterskolerneq pillugu ilitsersuilluni sulineranut atatillugu.

Atuartoq, angajoqqaat aamma ilinniartitsisoq angajullernut siunnersuisartoq/ ilitsersuisartoq efterskolernissaq pillugu pitsaanerpaamik piareersarpata tamanna meeqqap efterskolimi inuunerminik pitsaanerpaamik aallartitsinnissaanut ikorfartueqataassaaq – tamannalu ilaqutariinnut attaveqaataasartunut efterskolinullu atuartut tikinneranni annertuumik iluaqutaassaaq.

Qularnanngilaq matumannga atuartussat ilaasa pissusissamisuuginnartutut isigissagaat, efterskolimi inuunerup tamarmiusup aamma Danmarkimi inuunerup qanoq ittuunerata paasiniaqqissaarnissaat. Kisianni tamatigut taamaattanngilaq. Danmarkimi efterskolinit Kalaallillu Illuinit nalunaarutaasartut takutippaat, angajoqqaat atuartullu efterskolimi inuuneq aamma Danmarkimi najugaqarnermi pissutsit pillugit ilisimasaat assigiinngittaqisut. Atuartut ilaat efterskolimi aallartittarput efterskolerneq sunaanersoq ilisimarpiarnagu paaserpiarsimanagulu – taamaammat immikkoortoq una ilitsersuummut ilanngunneqarpoq.

Efterskolimi sulisut assigiinngitsunik suliassallit amerlasarput. Tassaasarput pisortaq taassumalu tullersortaa, ilinniartitsisut, pedelit, igaffimmi sulisut, eqqiaanermik suliaqartut allaffimmiullu. Nalinginnaavoq efterskolip sulisuisa tamarmik efterskolimi sammisaqartitsinernut aaqqissuussinernullu peqataasarnerat.

Meeqqat atuarfianni atuartut ilinniartitsisutik amerlanertigut taamaallaat atuarnermut atatillugu ilisarisimasarpaat, tamannali efterskolini allaanerujussuuvoq, tassami efterskolini ilinniartitsisut atuartut peqatigalugit allarpassuarnik aamma suliaqartarput.

Atuartut misigissavaat, ilinniartitsisutik aamma nereqataasartut, eqqiaanermi ikiuuttartut, inimi ataatsimoortarfimmi atuartut ilagalugit peqataasartut, unnukkut sinilluaqqusiartortartut, angalaarnernut pisuttuarnernullu allarpassuarnullu peqataasartut – taamaalillutik atuartut meeqqat atuarfianniit annertuneroqisumik ilinniartitsisutik ilisarisimalissavaat.

Efterskolimi atuartut tamarmik attaveqaataasumik ilinniartitsisoqartarput taannalu atuartumut aamma angajoqqaanut/ilaqutariinnut attaveqaataasartunut ukiup atuarfiusup ingerlanerani ikiuullunilu tapersersuisuusarpoq.

Ilinniartitsisup attaveqaataasartup atuartuutini qanimut malinnaavigisarpai, ilisarisimalluartarlugit aamma ajunnginnersut ingerlalluarnersullu immikkut eqqumaffigisarlugu. Efterskolini amerlasuuni ilinniartitsisoq attaveqaataasartoq tassaasarpoq atuartut ataasiakkaat angajoqqaavinut /ilaqutariinnut attaveqaataasartunut annertunerpaamik attaveqartartoq.

Atuartoq tamatigut ilinniartitsisumut attaveqaataasartumut efterskolimiluunniit ilinniartitsisumut allamut saaffiginnissinnaavoq, inersimasumik oqaloqateqarnissani pisariaqartikkuniuk – ajornartorsiutit pillugit oqaloqateqarusukkuni imaluunniit arlaatigut ikiortariaaguni.

Meeqqap efterskolimi atualernerani, angajoqqaatut nakkutilliisussaatitaaneq efterskolip pisussaaffigilertarpaa. Nakkutilliinerup siunertaraa atuartup ajoqusinnginnissaa. Imaanngilaq efterskolimi atuartut nakkutigisaajuartut, nakkutilliinermut apeqqutaapput suut sammineqarnersut susoqarnersorlu.

Ulluinnarni aamma sapaatip-akunnerisa naanerini inersimasunik efterskolimiittoqartuartarpoq, efterskolip ilinniartitsisui paarlakaallutik nakkutilliisuusarmata. Taamaalilluni atuartunik nakkutilliisoqartarpoq, tamatumanilu ilaatigut nakkutigineqartarpoq efterskolip malittarisassai eqquutsinneqarnersut. Unnuakkut ilinniartitsisunik pigaartoqartarpoq. Atuartut pigaartoq attavigisinnaavaat unnuakkut napparsimalissagaluarunik allatulluunniit pisariaqartitsissagunik.

Angajoqqaat efterskolip allaffia saaffigisinnaavaat, sulisunik oqaloqateqarnissartik pisariaqartikkunikku.

Allaffiup nalinginnaasumik ammasarfiata avataatigut tassanngaannartumik pinartumik pisoqassappat, vagtiusumut oqarasuaat sianerfigalugu sulisut attavigineqarsinnaapput. Vagtimut oqarasuaat pillugu paasissutissat takusinnaavatit efterskolip tikilluaqqusilluni paasissutissiissutaani imaluunniit nittartagaani.

Efterskolit atuarfiup angerlarsimaffiullu oqaloqatigiinnerinik ingerlatsisarpoq, atuartut angajoqqaallu meeqqat atuarfiannit nalunngeriigaattut ingerlanneqartartunik. Kalaallinut efterskolertunut tunngatillugu amerlanertigut ilaqutariit attaveqaataasartut oqaloqatigiinnernut taakkununnga peqataasassapput – immaqa aamma angajoqqaat internettikkut peqataanissaat periarfissaqarsinnaavoq.

Efterskolernermi atuarfiup angerlarsimaffiullu oqaloqatigiinneranni qulequtaasinnaapput atuartup inooqataaneranut aamma efterskolimik sungiussiartorneranut tunngasut, ilikkagassatigut ajornartorsiutit imaluunniit ilinniagaqarnissamik pilersaarutit.

Nalinginnaavoq ukiup atuarfiusup ingerlanerani efterskolit atuartup angajoqqaavinut aamma/ imaluunniit ilaqutariinnut attaveqaataasartunut allakkanik nutaarsiassaqartitsissutinik nassitsisarnerat.

Efterskolit amerlanerit atuartut, angajoqqaat ilinniartitsisullu akornanni attaveqarnermut intranet atortarpaat. Tassani aammattaaq takuneqarsinnaapput atuartup skemai, atuanngitsoorsimaneri, sapaatip akunnikkaartumik allakkat, nalunaarutit aamma efterskolimiit paasissutissiissutit nalinginnaasut. Pingaartuuvoq ilaqutariit attaveqaataasartut efterskolimi intranettimut isersinnaanissaat.

Efterskolit amerlasuut Facebookimi imaluunniit Instagramimi qupperneqartarput, taakkununngalu efterskolimi ulluinnarnit assit ingerlaavartumik ikkunneqartarlutik – taamaalillutik angajoqqaat, ilaquttat ikinngutillu ungasianiit malinnaasinnaapput.

Aamma Danmarkimi efterskolertunut, angajoqqaavinut, ilaqutariinnut attaveqaataasartunut aamma efterskolinut Facebookimi assigiinngitsunik qupperneqarpoq. Quppernerit taakkua ilaat Kalaallit Illuisa nittartagaanni takuneqarsinnaapput.

Atuartut kaasarfimmiussinneqartarnerminnik sungiusimasaat assigiittanngillat aamma efterskolernerup nalaani kaasarfimmiussanik pisariaqartitsisoqartarnera assigiinngittaqaaq.

Atuartut efterskolimiittut nerisassat akunnermiliullugulu tamulugassat tamaasa efterskoliminnit pisarpaat, taamaammat nerisassanik pisinissaat pisariaqartanngilaq. Atuartut amerlanerit kaasarfimmiutik atortarpaat mamakujunnut, mobilimik atuisuuffimminnut, nujalerisumut, uffaatikujunnut, atisanut, bussinut imaluunniit qimuttuitsunut bilitsinut il.il.

Efterskolernerup nalaani angajoqqaat atuartup aningaaserivimmi kontoanut kaasarfimmiussanik nuussisarsinnaapput atuartup kortimik akiliutigisartakkaminik atorsinnaasaanik. Isumassarsiatsialaavoq aalajangersimasumik isumaqatigiissutigissallugu kaasarfimmiussat sapaatip-akunneri tamaasa imaluunniit sapaatip-akunnera allortarlugu nuunneqartassasut.

Kalaallit atuartut immaqa tupaallaatigissavaat Danmarkimi inuppassuit Kalaallit Nunaat pillugu qanoq ilisimasakitsiginerat, naak Danmarki aamma Kalaallit Nunaat naalagaaffeqatigiikkaluartut.

Immaqa atuartut allat Kalaallit Nunaat meeqqat atuarfianni nunalerutinik atuartitaanerminnik taamaallaat ilisimasaqarfigivaat Kalaallit Nunaanneersumilli siornatigut naapitaqarnikuunatik immaqa aamma Kalaallit Nunaanni qanoq najugaqartoqartarnera, oqaatsit qanoq nipeqarnerat imaluunniit kalaaliuneq qanoq paasisariaanersoq ilisimanngilaat. Taamaammat atuartut kalaallit piareersimaffigisariaqarpaat efterskolimi atuaqatitaami Kalaallit Nunaat pillugu paasisaqarumanissaat.

Isumassarsiatsialaasinnaavoq atuartup illoqarfimminit/nunaqarfimminit assinik takutitsinissaa assersuutigalugulu oqaluttuaralugu napparsimavik ungasissorujussuarmiissinnaasoq - assigalugu Danmarkimi najugallip Parisimut nakorsiartariaqarnissaa.