airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Danmarkimi efterskolernermut tapiissutit

Danmarkimi efterskolerneq ilaatigut danskit naalagaaffiannit aamma Namminersorlutik Oqartussanit tapiissutinit ilaatigullu angajoqqaanit/nammineq akiliutinit aningaasalersorneqartarpoq. Efterskolinut Ingerlatsivimmut Namminersorlutik Oqartussat tapiissutaannik qinnuteqartoqartarpoq.
Tapiisarneq

Atuartut kalaallit tamarmik Danmarkimi efterskolernermut danskit naalagaaffiannit tapiissutinik pisinnaapput. Naalagaaffimmit tapiissutit naatsorsorneqartarput, ukioq efterskolernerup aallartiffia ukiunik marlunnik sioqqullugu inoqutigiit ukiumut isertitaat meeqqallu 18-it inorlugit ukiullit qassiunerat aallaavigalugit.
Atuartoq efterskolip najugaqarfiani Danmarkimi inunnik nalunaarsuiffimmut nalunaaruni, danskit naalagaaffiannit tapiissutinik pisinnaalissaaq.
Danskit naalagaaffianit tapiissutit ilanngaatereernerisigut sapaatip-akunneranut akiliutissap akiliutissallu tamarmiusup annertussusissaat uani takuneqarsinnaavoq: Find en efterskole.

Tamatuma saniatigut ilaqutariit amerlanersaat meeqqamik Danmarkimi efterskolerneranut Namminersorlutik Oqartussanit tapiissutinik qinnuteqartarput. Namminersorlutik Oqartussanit tapiissutit naatsorsorneqartarput, ukioq efterskolernerup aallartiffia ukiunik marlunnik sioqqullugu inoqutigiit ukiumut isertitaat aallaavigalugit.

Inoqutigiit ukiumut isertitaat apeqqutaatillugit Namminersorlutik Oqartussanit tapiissutit ima annertussuseqassapput:

Inoqutigiit ukiumut isertitaat:

Sapaatip-akunneranut tapiissutit:

Gruppe I : 0 -340.000 Tapiissutit tamakkiisut
Gruppe II :340.001 - 500.000 Kr. 600
Gruppe III : 500.001 - qummut Kr. 200

Angajoqqaat namminneq akiliutissaat annikillisinneqassaaq, efterskolertussap qatanngutaasa 18-it inorlugit ukiullit amerlassusaat naapertorlugu:

  • Inoqutigiit ukiumut isertitaat meeqqamut 18-it inorlugit ukiulimmut ataatsimut kr. 30.000-inik apparneqassapput, atuartup qatanngutini taakku najugaqatigippagit. Tamannattaaq aamma atuuppoq ataataasup anaanaasulluunniit aappaata meeraanut tunngatillugu

Namminersorlutik Oqartussanit tapiissutinik qinnuteqarnermi, inoqutigiit isertitaat uppernarsaaserneqassapput, ukioq efterskolip aallartiffissaa ukiunik marlunnik sioqqullugu inoqutigiit akileraarutaasussanik isertitaasa akileraarusiisarfimmit inaarutaasumik nalunaarsornerat nassiullugu.

Inoqutigiit ukiumoortumik isertitaannut uppernarsaatitut, sulisitsisunit akissarsiat allagartaasa nassiunnissaat naammanngilaq, tassami angajoqqaat ukiup isertitaqarfiusup ingerlanerani tunngaviatigut arlalinnik sulisitsisoqarsinnaapput.

Piffissap tapiissuteqarfiusup ingerlanerani angajoqqaat isertitaat ikileriassappata, tapiissutit naatsorsoqqinneqarnissaat qinnutigineqarsinnaavoq. Tamanna pissaaq Efterskolinut Ingerlatsivik aqqutigalugu.

Atuartup angajoqqaavi avinnikuuppata averusernikuullutilluunniit

Atuartup angajoqqaavi avinnikuuppata averusernikuullutilluunniit, Namminersorlutik Oqartussanit tapiissutit naatsorsorneqassapput, angajoqqaap atuartup inunnik nalunaarsuiffik naapertorlugu najugaqarfigisaata isertitai akileraaruteqaataasussat aallaavigalugit. Tamanna atuuppoq meeqqap angajoqqaani paarlakaallugit najugaqarfigissagaluarpagilluunniit.

Angajoqqaaq atuartup najugaqarfigisaa kateqqissimappat aappaqarluniluunniit, aappaasup ukiumoortumik isertitai akileraaruteqaataasussat inoqutigiit isertitaannut ilanngullugit naatsorsuunneqassapput. Tamanna atuuppoq angajoqqaaq ullormit qinnuteqarfiusumiit ukioq ataaseq qaangerlugu aappaqarsimappat.

 

Naammagittaalliuutit
Tapiissutit pillugit naammagittaalliuutit Efterskolinut Ingerlatsivimmut nassiunneqassapput.
Namminersorlutik Oqartussanit tapiissutinik qinnuteqarnissaq sioqqullugu

Namminersorlutik Oqartussanit tapiissutinik qinnuteqaammut pinngitsoorani ilanngullugit nassiunneqartussat makku angajoqqaat piniaqqaassavaat:

  • atuartup efterskolimi atuartussatut akuerisaaneranik efterskolip nalunaarutaa
  • ilaqutariinnit attaveqaataasartussanit akuersissut atsiugaq – akuersissut aammattaaq atuartup angajoqqaavinit atsiorneqassaaq
  • atuartup meeqqat atuarfiannit karakteeriminut uppernarsaataa, atuartup minnerpaamik ukiuni arfineq-pingasuni atuarsimaneranut uppernarsaataasussaq
  • efterskolernerup aallartinnissaa ukiunik marlunnik sioqqullugu inoqutigiit isertitaannut akileraaruteqaataasussanut akileraaruseriffimmit inaarutaasumik nalunaarut
  • inoqutigiit najugaqarnerannut uppernarsaat
  • atuartup kuisinnermut allagartaa, imaluunniit angajoqqaatut oqartussaasup kinaaneranik angajoqqaatut oqartussaasut kikkuunerannik uppernarsaat alla
  • angajoqqaatut oqartussaasup inuttut normua/angajoqqaatut oqartussaasut inuttut normui, maanna isertitat paasiniarnissaannut atatillugu atugassaq/atugassat – aammattaaq inooqatigisap inuttut normua ilanngullugu nalunaarutigineqassaaq.

Kiisalu:

  • ukiut aappassaanni efterskolernissamut tapiissutinik qinnuteqartoqarpat, atuartup angajoqqaaviniit immikkut akuerineqarnissamik qinnuteqaat ilanngunneqassaaq, taamatullu atuartup tunngavilersukkamik inassuteqaat ilanngunneqassalluni
  • atuartoq angerlarsimaffimmi avataanut inissinneqarsimappat, tamanna pillugu isumaginninnermut oqartussaasunit uppernarsaat qinnuteqaammut ilanngunneqassaaq
  • atuartoq annertuumik innarluutilinnik ikiorsiisarneq pillugu malittarisassat ataanniippat, tamanna pillugu isumaginninnermut oqartussaasunit uppernarsaat qinnuteqaammut ilanngunneqassaaq.

Danmarkimi efterskolernissamut Namminersorlutik Oqartussanit tapiissutinik qinnuteqarnermut atatillugu, iluaqutaasinnaavoq uppernarsaatitut ilanngutassat eqqaamasassatut allattornissaat (assersuut uani takuuk: ”Danmarkimi efterskolernermut tapiissutinik qinnuteqarnermi angajoqqaat eqqaamasassaat”). Uppernarsaatissatut ilanngussassat piareerneri tamaasa allattuiffik nalunaaqutsiinikkut nutartertaruk.


Namminerisaminnik efterskolertut
Ilaqutariit ilaat meeqqamik Danmarkimi efterskolerneranut Namminersorlutik Oqartussanit tapiissutinik qinnuteqarneq ajorput, taamaallaalli danskit naalagaaffiannit tapiissutinik pisarlutik. Atuartut taakku namminerisaminnik efterskolertutut taaneqartarput. Taama pisoqarnerani angajoqqaat namminneq atuartup Danmarkimut Danmarkimiillu angalanissai il.il. aaqqissuuttarpaat namminnerlu akilertarlugit.
Kingullermik nutarterneqarpoq: 23. april 2021