Censoreqarneq karakteriliinerlu

Pisinnaasatigut misilitsinnernik allattariarsorlunilu misilitsinnernik naliliineq tulliuttuni allassimasunik imaqarpoq:

• Misilitsinneq naammassiniariarpat atuartut akissutaat allaqqaagaallu tamarmik katersorneqassapput atuarfiullu pisortaanut tunniunneqassallutik.
• Atuarfiup pisortaata isumagissavaa misilitsinnerni akissutit karakteerillu allattorsimaffii qajannaatsumik pooqartinneqassasut tammatsaalisaallutillu censorimut nassiunneqassasut.
• Piffissaliunneqartoq naatinnagu censoriusup suliarineqarsimasut tamakkerlugit kukkunersioreersimassavai paasissutissallu atuartut akissutaannut tunngasut Ilinniartitaanermut Aqutsisoqarfimmut, kukkunersiuinissaq pillugu censorinut ilinniartitsisunullu ilitsersuisimasumut, nassiutissallugit.
• Tamatuma kingornagut censorip akissutit, kukkunersiuinissamut ilitsersuut karakteerillu allattorsimaffiat atuarfimmut tammatsaalisaatillugit nassiutissavai.
• Atuarfiup pisortaata akissutit kukkunersiuinissamullu ilitsersuut ilinniartitsisumut nalilersuillunilu karakteerilersuisussamut tunniutissavai.
• Ilinniartitsisup kukkunersiuinini naammassippagu atuarfiup pisortaata karakteerit allattorsimaffiat censorip allattugaa ilinniartitsisumut aamma karakteerit allattorsimaffiat ilinniartitsisup allattugaa censorimut nassiutissavai.
• Censorip ilinniartitsisullu allattorsimaffiit atsiussavaat piaarnerpaamillu atuarfiup pisortaanut utertissallugit.

Oqaluttariarsorluni misilitsinnernik naliliineq tulliuttuni allassimasunik imaqarpoq:

• Ilinniartitsisup censorillu atuartoq ilassillugu tikilluaqqussavaat, atuartullu misilitsissutissatut makitaa allallugu nalunaassallugu.
• Misilitsinnerup nalaani atuartup saqqummiussinini nammineq aqussavaa. Ilinniartitsisup censorillu misilitsinneq aqussavaat fagimilu misilitsiffiusumi piumasaqaataasunut naleqqiullugu atuartup misilitsinnermini naammassisai nalunaarsussallugit.
• Ilinniartitsisoq censorilu apeqqutinik paasinarnerulersitsisussanik atuartumut apeqquteqarsinnaapput, atuartoq tamatuminnga aperineqarnissaminut piareersimappat.
• Censorip ilinniartitsisullu allattukkatik naammassissavaat tamarmillu immikkut karakteeriliussaminnik allassallutik. Misilitsinnerni atuartunit arlariinnit peqataaffigineqartuni ilinniartitsisoq censorilu atuartut ataasiakkaarlutik naammassisaat pillugit allattuillutillu ataasiakkaaralutik karakteerilersuissapput.
• Censori ilinniartitsisorlu atuartup fagimi misilitsiffiusumi piumasaqaataasunut naleqqiullugu misilitsinnermini naammassisai pillugit oqaloqatigiitsiassapput.
• Ilinniartitsisup censorillu isummatik kattullugit atuartumut karakteeriliussissapput, karakteeriliunneqartorlu karakteerit allattorsimaffiannut allanneqassaaq.
• Atuartoq isertinneqassaaq karakteeriliunneqartorlu ilinniartitsisuminit censori peqataatillugu pissarsiarissallugu. Karakteeriliunneqartup nassuiarneqarnissaa pisariaqassappat atuartup naammassisai fagimi misilitsiffiusumi piumasaqaataasunut naleqqiullugit qanoq innersut oqaatigineqassapput.

Misilitsinnermi akisussaasuusup karakteerit allattorsimaffiat censori, nalilersuinermi isumaqatigiittoqarsimanera pillugu uppernarsaalluni atsiorsimasoq, peqatigalugu atuarfiup pisortaanut nassiutissavaa.

Censorip ilinniartitsisullu allattukkatik toqqussavaat kingusinnerusukkut naammagittaalliortoqarsinnaammat.

Meeqqat atuarfianni inaarutaasumik naliliineq pillugu Namminersornerullutik Oqartussat nalunaarutaat nr. 3, 9. januar 2009-meersumi paasisaqarnerugit - kap. 6, §§ 52-53 aamma kap. 9.

Karakteeriliinermi siunertaavoq atuartup misilitsinnermini fagimi naammassisimasaanik takutitsissalluni. Atuartut Kalaallit Nunaanni karakteerilersuinermi tulleriinnilersuisarneq – ’The Greenlandic Grading System’ aamma GGS-imik taaneqartartoq – malillugu nalilersorneqassapput. GGS qallunaat kisitsisinik arfineq-marlunnik, 7-karakterskalamik, karakteeriliisarnerannut sanilliunneqarsinnaavoq:

GGS-skala                                            Oqaaseqaatitaa                                                                                                            7-trinsskala

A	Naammassisaq pitsaalluinnartoq	12
B	Naammassisaq ajunngivissoq	10
C	Naammassisaq ajunngitsoq	7
D	Naammassisamut ajorpallaanngitsoq	4
E	Naammassisaq naammattoq	2
Fx	Naammassisaq naammaginanngitsoq	0
F	Naammassisaq pitsaanngitsoq	-3

Meeqqat atuarfianni inaarutaasumik naliliineq pillugu Namminersornerullutik Oqartussat nalunaarutaat nr. 3, 9. januar 2009-meersumi paasisaqarnerugit - kap. 4, §§ 25-28.

Atuartut angajoqqaajusulluunniit karakteeriliunneqartumut isumaqataanngikkunik naammagittaalliuuteqarnissaminnut periarfissaqarput. Naammagittaalliuut atuarfiup pisortaanut nassiunneqassaaq karakteeriliinerup kingornagut sapaatip-akunneri sisamat qaangiutsinnagit. Naammagittaalliuut tunngavilersugaassaaq allakkatullu nassiunneqassalluni.

Naammagittaalliuutip suliarineqarnerani censori ilinniartitsisorlu tamarmik immikkut atuarfiup pisortaanut oqaaseqaateqassapput, atuarfiullu pisortaata oqaaseqaatit ilanngussallu pisariaqartut nammineq oqaaseqaamminik ilaqartillugit Ilinniartitaanermut Naalakkersuisoqarfimmut, suliamik tamatuminnga aalajangiisuusussamut, nassiutissavai.

Meeqqat atuarfianni inaarutaasumik naliliineq pillugu Namminersornerullutik Oqartussat nalunaarutaat nr. 3, 9. januar 2009-meersumi paasisaqarnerugit - kap. 12.

Misilitsinnermi angusat atuarfinnit Ilinniartitaanermut Aqutsisoqarfimmut nassiunneqassapput, kingornagullu Kalaallit Nunaanni Naatsorsueqqissaartarfikkut tamanut saqqummiunneqassallutik.