Atuarfissinni pimmatiginnittarneq akiorniarlugu politikkiliornermut politikkillu ineriartortinnissaanut siunnersuutitsialaat
- Ilinniartitsisut atuarfimmilu perorsaasut pimmatiginnittarneq pillugu paasisanik tunngaviusunik ilisimasaqalernissaannik periarfississigit. Tamanna pisinnaavoq ilinniartitsisut inaanni saqqummiussititsisarnertigut imaluunniit Ilinniartitaanermut Aqutsisoqarfiup pimmatiginnittarneq pillugu webinareqartitsisarnerinut peqataatitsisarnertigut. Saqqummiunneqartunit suut atuarfissinnut naleqquttuunersut oqaloqatigiissutigisarsigit.
- Pimmatiginninnertaaq pillugu ilisimasaqarnerulersitsinissaq siunertaralugu angajoqqaanut unnukkut sammisaqartitsillusi aaqqissuussisarsinnaanersi isumaliutigisiuk.
- Pimmatiginnittarneq pillugu atuartuttaaq ilisimasanik avitseqatigiinnissanut qaaqquneqartassapput. Tamanna pisinnaavoq ass. ulluni sammisaqartitsiffiusuni, sapaatip-akunnerini projekteqarfiusuni allanilu.
- Pimmatiginnittarneq akiorniarlugu politikkissap aalajangersimasuusup ineriartortinnissaanut atuarfimmi susassaqartut (aqutsisut, ilinniartitsisoqatigiiaat, angajoqqaat atuartullu) qanoq sunniuteqaqataasinnaanersut isumaliutigisiuk. Tamanna assigiinngitsutigut pisinnaavoq. Atuarfiit ilaasa angajoqqaaqatigiit atuarfiup pimmatiginnittarneq akiorniarlugu politikkissaanut ’Angajoqqaajusugut pimmatiginnittarneq akiorniarlugu qanoq iliuuseqarsinnaavugut?’-mik qulequtserlugu politikkissami immikkoortuusussamik allagaqartittarpaat. Taamatullu aamma atuartoqatigiit iliortitaasarput. Taamaaliortitsisarnerni atuarfiit ilaasa oqaasinnguit issuakkat titartakkallu atuartuneersuusut atuarfiit pimmatiginnittarneq akiorniarlugu politikkissaminnut ilannguttarpaat aamma/imaluunniit atuartut qanoq iliorluni ass. pimmatiginnittut akuliuffigineqartarnissaannut siunnersuutaannik isumassarsiaannillu ilanngussisarlutik. Atuarfiit ilaat atuartunik politikkiliornermi aaqqissuisunut pimmatiginnittarneq akiorniarlugu politikkissamut siunnersuusiorlutik allagaqartunut sinniisutut peqataatitaqartarput.
- EQQAAMAJUK tiimit atuarfiusut anitsiarfiillu pimmatiginnittarneq akiorniarlugu politikkissassinnut ilanngunnissaat isumaliutigissagassiuk, tiimeqarnerummi anitsiarnerullu nalaanni pimmatiginnittoqartarpoq.
- EQQAAMASIUTTAAQ digitalitigut pimmatiginnittarnerup akiorneqarnissaa politikkimut ilanngutissagassiuk, tamanna atuarfiup avataani pisaraluarpalluunniit. Avataanimi pisaraluaruniluunniit atuarfimmut pissunneqarajuttuuvoq.
- Pimmatiginnittarnerup akiorniarneqarneranut naleqquttuusunik atuarfimmi ukiumut pisussat nalunaarsorsimaffianni ileqquusumik pisartoqarnersoq isumaliutigisiuk.
- Pimmatiginnittarneq akiorniarlugu politikki assigiinngitsutigut saqqummiutissallugu aalajangiussinnaavarsi: Allassimasunngorlugu nittartakkamiilersinneqarnerata saniatigut atuarfimmi sulilersunut nutaanut atuartullu ilaqutaannut agguaassassanngorlugu aniatinneqarsinnaavoq. Aamma atuartut, ilinniartitsisut atuarfiullu pisortaa atuarfiup pimmatiginnittarneq akiorniarlugu politikkiata tunngaviinik saqqummiussitillugit naatsumik isiginnaagassiortoqarsinnaavoq. Politikkip siaruarterneqarnissaanut atuartut isumassarsiaqarnersut aperisigit. Aamma tamanna atuarnermut atatillugu suliassiissutigineqarsinnaavoq.
- Pimmatiginnittarneq akiorniarlugu politikkiliarsi ineriartortereersimalerussiuk naleqartitassasut allassimalersinneqarsimasunut tassaniittunut atuarfissinni ileqqunik pissutsinillu naleqartitat malinniarnissaannut akimmisaarutaasoqarnersoq isumaliutigisariaqarparsi. Assersuutigalugu immissinnut ima aperisinnaavusi: Suleqatigiinnerput qanoq ippa? Meeqqat pimmatiginninnermit kalluagaasimasut qanoq paasisinnaassavavut? Arlavut qanoq eqqartortarpavut aamma immitsinnut qanoq oqaloqatigiittarpugut? Pimmatiginnittoqartarneranik oqalliseqarnissamut angajoqqaat atuartullu qanoq iliorluta pitsaasumik aggersartarsinnaavavut?
