Tamanna tassaavoq Red Barnetip Mary Fondenillu Danmarkimi Fri for Mobberimik taallugu ineriartortitaata pisortat suliffeqarfiinik kattuffinnilu Kalaallit Nunaanniittunik suleqateqarluni 2012-2013-imi kalaallinut naleqqussarlugu ineriartortinneqarsimasoq. Kammagiittami meeqqat ilaannaat suliniarfigineqaratik meeqqalli tamarmik suliniarfigineqarput. Atortussanullu ilaapput allatat pimmatiginnittarnermik akiuiniarnermut tunngasut, sammisassatut siunnersuutit, meeqqanik oqaloqateqarnissamut najoqqutassat aamma nalornissutaasartut pillugit inersimasunut atuagassat.
Kammagiitta nuna tamakkerlugu pimmatiginnittarneq akiorniarlugu periusissiami ulluunerani paaqqinnittarfinniittartunut nukarlernut, atuarfimmi atuartunut nukarlernut sunngiffimmilu neqeroorutinut peqataasartunut meeqqanut nukarlernut suliniutigisassatut innersuussutaavoq. Uunga iserluni atortussat inniminnerneqarsinnaapput.
Kammagiittap 2020-2021-mi nalilersorneqarnera pissutigalugu atortussat Kammagiitta 2.0-mik taaneqartut ineriartortinneqarsimapput, taamaasillutillu imarisaat kalaallit meerartaasa isiginnittaasiannik kalaallillu kulturiannik tunngaveqarnerulersinneqarsimallutik. Kammagiitta 2.0 Mary Fonden aamma Fri for Mobberi qaninnertut siunersioqatigisartagaralugit suleqatigalugillu Kalaallit Nunaanniunerusoq suliniutaavoq.
