airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Erinarsorta

'Erinarsorta' suliniutaavoq periusissiamik 'Atuarfik Digitaliusoq'-mik tunngaveqartoq. Suliniummi meeqqat attaveqaatinik digitaliusunik - soorlu YouTubemik - oqallorissarnermut iluaqutissaasunik atuinissaat siunertarineqarpoq, nipilersukkammi meeqqat pinnguarnerisigut, ilinniarnerisigut ineriartornerisigullu sunneeqataasarput.

Naammassereerpoq

Aallartiffik:
Juni 2018 

Naammassivik:
April 2020

Suliniut pillugu
Periusissiaq 'Atuarfik Digitaliusoq' oqaatsillu pillugit immikkut ilisimasallit suleqatigiissitat inassuteqaataat "Kalaallit oqaatsitigut kinaassusiisa qaffassarnissaat pillugu inassuteqaat", meeqqat kalaallisut oqaatsiminnut nuannarinninnerat tulluusimaarutiginninnerallu meeqqat namminneq misigisimasaannit paasisimasaannillu nukittorsarneqarnissaanik imalik, suliniummi tunngavigineqarpoq suliniullu taakkununnga tapersiisuulluni. Tupigusunneq, alapernaassuseqarneq, misigisaqarneq, nutaaliorsinnaassuseqarneq, oqaatsinik pinnguarneq isummanillu ersersitsineq oqaasilerinermut ilisimasaqarnermit eqqoqqissaartuliornermillu pingaaruteqarnerupput.
Teorii
Sooq nipilersukkatigut oqallorissartoqassava? Atuarfinni meeqqerivinnilu oqaatsit pillugit pinnguaaterpassuaqarlunilu erinarsuuterpassuaqarpoq, kisianni aamma meeqqat ilaqarput taakkununnga pikkorissorsuunngitsunik. ’Erinarsorta’-mi nipilersukkat, erinarsorneq, naaneqatigiissaarineq aammalu taalluartaarineq meeqqat oqallorissarnerannut atorneqassapput.

Meeqqat suli ukioqalersimanngitsut ataatsimillu ukioqalereersimasut oqaatsinik maluginiaalereersarput, soorlu nipisiuinermikkut. Meeqqap piffissami tassani qaniginerpaasani – arni angunnilu – oqaatsinik naaneqatigiiaartunik attaveqaqatigilersarpai, soorlu imaattunik "Bababa" imaluunniit "mamama" (Bylander, kap. 25: 2010). Meeqqap marlunnik pingasunilluunniit ukioqaleraangami oqaaseqatigiit sannaat isumaallu ilinnialersarpai. Meeqqallu sisamanik ukioqaleraangami ilitsoqqussaralugu oqaatsimini oqaatsit pissusiisa pingaarnersai ilinniareersarpai.

Meeraq oqaatsinik arlariinnik ilinniaraangami oqaatsinik sungiussivinnissaminut piffissaq sivisunerusoq atortaraluarpaa, oqaatsinilli arlariinnik atuisinnaaneq meeqqamut siunissami iluaqutaasarpoq. Ilisimatuussutsikkut misissuinikkut paasineqarsimavoq meeraq (aamma inersimasoq) sukkanerusumik, eqqornersumik eqaannerusumillu oqaatsinik ilinniartartoq ilinniartitseriaatsit maluginiutillu amerlasuut ataatsikkoortinneqaraangata. Taamaattumik oqalunneq, naaneqatigiissaarineq taalluartaarinerlu, erinarsorneq ussersornertalik, timi atorlugu takutitsineq, ussersorneq assinnguillunilu takutitsineq imminnut ataqatigiississallugit pitsaasuuvoq - oqaatsinimmi nipinillu pinnguarnerup oqaatsit oqaatigineqarnissaat ikiorsertarpaa.

Pingaartumik meeqqani minnerni pisunut aalajangersimasunut oqaasertaliisarnissaq pingaaruteqarpoq. Taamaaliorneq naaneqatigiissaarinikkut, alanngaarnikkut kiisalu ussersuutigaluni erinarsornikkut pisinnaavoq – ”Kulloq illit”, ”Pisuttuarpunga” imaluunniit ”Illuliorpunga” atorneqarsinnaasutut assersuutigineqarsinnaapput. Taamaaliornermi timimik atuilluni "oqaasinnguineq" pingaaruteqarpoq meeqqap oqaatsit timillu iliuusii ataqatigiississinnaalersinnaammagit, aammalu meeqqap oqaatsit isumaannik timillu pisataanik paasinninneranut iluaqutaammat. Sammisat tamakku meeqqap maluginiutaasa timiminillu atuisinnaanerata ineriartornerinut iluaqutaapput. Misissuinikkut paasineqarsimavoq meeraq siusissukkut taalluartaarinermik ilinniartinneqaraangami nipisiuinermut nalunngissusiata ineriartornera meeqqap atuarnermut allannermullu ilinniartarneranut pinngitsoorneqarsinnaanngitsoq ikiorserneqartartoq.

Oqaatsinik naaneqatigiissaartunik taalluartaagassanillu sammisaqarnermi meeraq oqaatsimigut rytmeqalernissaminut aammalu nipinik assigiinngitsunik immikkoortitsisinnaanerminut oqaatsinik pigiliussinissaminut iluaqutigisassaminik ineriartortitsinissaminut periarfissinneqartarpoq.
Suliniummi atortussiat

Erinarsugassanik ataatsimoortunik assiliartalersugaasunillu suliniummut atortussiaasunik Ilinniartitaanermut Aqutsisoqarfiup YouTubemi kanalianiittoqarpoq aammalu meeqqap nammineerluni nipilersuutissaminik ilusilersuinissaanut isumassarsiorfiusinnaasunik imalimmik atuagannguaqarluni. Isumassarsiaq meeqqap takorluuisinnaalernissaanik, tunniusimanissaanik, alapernaatsuunissaanik naammassisaqarumangaarnissaanillu siunertaqarluni isumassarsiaavoq.

Erinarsuutit:

  • Kikkut makku
  • Anaanap qitittartuutinngui
  • Soralumma ralumma
  • Antuuaraq Tobiarseeraq
  • Jappimuna
  • Sialualaarluni
  • Texas Cowboy
  • Tivaniarpunga
  • Inngilikuluukkut
  • Nassaarlangatoq arnannguamik

Erinarsuutit oqaatsinik uteqqitassanik, naaneqatigiiaanik, taalluartaagassanik ataqatigiissunillu imaqassapput. Aamma erinarsuutit meeqqap issiaannarluni uninngaannarlunilu erinarsunnginnissaa anguniarlugu timimik atuiffiusinnaassapput.

Akisussaasoq

Ilinniartitaanermut Aqutsisoqarfik

Aaqqissuisoq

Ane-Kathrine Petersen
IT-didaktikkimut atuarfinnut siunnersorti
akpe@nanoq.gl
(+299) 34 62 03

Suleqataasut

Glenn Møller - Nipilersortoq
Kunuut Kaali Fleischer - Ilusilersuisoq

 

Fagit atuartitsinerlu
Takuuk
Ilinniusiorfiup inniminniisarfia
Takuuk
Ilinniusianik atorit
Atorit
Ilikkagassatut pilersaarutit
Takuuk
Kingullermik nutarterneqarpoq: 15. juni 2020