Ineriartortitsinissamut tapersersuineq

Atortut tamarmik Ilinniartitaanermut Aqutsisoqarfimmit tapiiffigineqarlutik ineriartortitat ilinniarnertuunngorniarnerup siunertaanut tulluartuussapput, taakkununngalu ilaavoq ilikkagassatut pilersaarut. Atuakkanut ilinniartitsissutissanut, ilinniarnerup ingerlannissaanut allatullu atortut makkununnga tunngassutillit tapiiffigineqarsinnaapput:

• kalaallit oqaasiinik tunngaveqarluni ilinniarneq
• allat oqaasiinik ilinniarneq
• Ilinniartut qitiutillugit / illinniartut susassaqartinnerat
• ilinniartitsissutit assigiinngitsut atorneqarnerat
• qarasaasiat atornerunissai

Pilersaarutit angisuut mikinerillu aallartinneqarsinnaapput. Imaassinnaavoq illit atuartitsisutut ilinniartitsissummik pitsaasumik allanik isumassarsititsisinnaasumik peqareersutit imaluunniit atuakkamik atuartitsinermi atugassamik allanniarlutit eqqarsaateqartutit. Qanoq isikkoqarnissaa annertussusialu apeqqutaatinnagit periarfissallu eqqartorniarlugit Ilinniartitaanermut Aqutsisoqarfik aammalu suliannut siunnersortigisannut saaffiginninnissannik kajumissaarneqarputit. Aallartitsinissaq sioqqullugu isumaqatigiissummik tigussaasumik Ilinniartitaanermut Aqutsisoqarfik peqatigalugu tamatigut atsiortoqartassaaq.

Isumaqatigiissummik atsiortoqarnerani atortussanik suliaqarnermi Ilinniartitaanermut Aqutsisoqarfik pilersaarusiornermut aqutsisutut aaqqissuisutullu atuutissaaq, ingerlaavartumillu atortut pillugit kingulliulluni oqaaseqartartuussalluni akuersisartuussallunilu.

Isumassarsiatit aammalu atuartitsissutinni sunik pisariaqartitsinerit pillugit suliannut siunnersortigisannik oqaloqateqaqqaarit. Tamatuma kingorna pilersaarutinnut nassuiaasiorit, nassuiaat suliannut siunnersortigisannut akueritiguk Ilinniartitaanermut Aqutsisoqarfimmut gux@nanoq.gl aqqutigalugu nassiullugu. Pilersaarummut nassuiaat minnerpaamik ukuninnga imaqassaaq:

• Sumi sulisimanernut ilinniakkanullu uppernarsaatit piumassuseqarnerlu.
• Sunik qanorlu annertutigisunik suliaqarsinnaaneq.
• Pilersaarusiornissamut pilersaarut, atortullu naammassiniarnissaannut killiffik. Taaneqartut ilaannakuupput.
• Atortut ilusissaat: atuagaq ilinniartitsissut, sammisanut quppersagaq, ilinniarnerup ingerlannissaa allallu. Aammalu qarasaasiaq aqqutigalugu atortut suut atorniarneqarnersut (tassa pdf, toqqaannartumik qarasaasiaq atorlugu imaluunniit atortut naqeriikkat).
• Atuartitsissutissanik pisariaqartitsinerup naliliiffiginera: Suliassaqarfimmi soqarpa, suullu amigaataappat. Atortunik atuisussat qanoq amerlatigisussatut naatsorsuunneqarpat. Atuartitsissutinut siunnersortimik suleqatigisannillu aamma oqaloqateqarit.
• Allamiut oqaasiinik ilinniartitseriaatsit, kalaallit oqaasii tunngavigalugit ilinniartitsinerit, ilinniartoq qiutillugu ilinniartitseriaatsip, annerusumik assigiinngitsunik suliallit atornerunissaannik peqataatitsinerillu allallu akuerinissaat.
• Pisariaqassappat ilinniartitsissutinut siunnersortiniit attuumassutilinniit tapersersorneqarnissaq.
• Atuarfimmi suliffigisanni rektori saaffigissavat mailikkullu cc-lerlugu.

Qinnuteqaatit tiguneqartut Ilinniartitaanermut Aqutsisoqarfimmi atuartitsinermut siunnersortit suleqatigalugit nalilersussavai.

Akissarsiaqartitsineq Ilinniartitaanermut Aqutsisoqarfimmi aalajangersimasumik akigititat malillugit pissaaq. Atuakkanut ilinniartitsissutinut tunngatillugu atuakkiortumut isumaqatigiissusiortoqassaaq atuakkiortumut isumaqatigiissummut assersuutissaq uani takuuk.

Atuartitsineq iluatsittoq suleqatigisannut avitseqatigiissutigiuk. Atuartitsinerit aaqqissuusseqqinnermi tunngavigineqartunik ataqqinnittut ineriartortinnissaat Ilinniartitaanermut Aqutsisoqarfiup tapersersugarai. Ilinniartitsissutini siunnersortit isumassarsiannut tunngasunik oqaloqatigiuk, ilinniartitsissutigisannilu suut pisariaqartinneqarnersut eqqaallugit. Eqqartorneqassallutik imarisassaa sinaakkutissartai allallu. Qinnuteqarneq Ilinniartitaanermut Aqutsisoqarfimmut tullinnguutissaaq, ilinniartitsissutini siunnersortimiit innersuussutit, suliallu ingerlanerani naatsumik allaaserinninnera imarisaata annertussusaa ilanngullugu.

Aallartinnginnermi Ilinniartitaanermut Naalakkersuisoqarfillu isumaqatigiissusiortoqaqqaassaaq. Isumaqatigiissut imaqassaaq qanoq annertussuseqarnera, imarisaa, akissarsiat il.il. Taamaattoqanngippat suliaq unitsinneqassaaq.

Tunngaviusumik piumasaqaatit ingerlatsinermi ukuupput:

• Qulaani eqqaaneqartutut pædagogiskimi napasuiliat ilanngunneqarnissaat.
• Kalaallit Nunaannut tunngasuunissaa, allaniillu nassaarineqarsinnaanani soorlu EMU-mi.
• Pædagogiskiussaaq/ilikkarnartuussaaq eqqartoqqissaarneqarsinnaasoq allanngorartoq. Ingerlariaatsit aaliangersimasuulluinnassapput ilinniartitsisullu nutaajusunut nalunartuussanatik.
• Quppernernut ilinniartitsissutinut innersuussineruinnassanngillat

Ilinniartitaanermut Aqutsisoqarfiup suna tigussaneraa:

• Iserasuaat aqqutigalugu nittartakkami saqqummiussap inissinnissaanut ilisarititsineq. Arlaatigut soqutiginnilersitsiniarnissamut tamanna isigineqassaaq, makkuninngalu imaqassalluni: Atuartitseriaatsini qitiutillugit tunngavigineqartut, ilinniartut naatsorsuutigisaat kiisalu ilinniartitsinissamut pilersaarutip akuerinissaata ilanngunnissaanni ataatsimut anguniakkat ilinniartullu piumassuseqartilernissaat. Tigussaasunik sunik suliaqartoqassanersoq ilinniartitsissutaasunut siunnersortit nassuiaaffigissavaat. 
• Atuartitsinerup modulimiit modulimut nassuiaqqissaarnera. Tassani immikkuualuttortaasut ilinniartitsissutaasunut siunnersortinit attuumassutilinnit aamma nassuiarneqarput. Ilinniartitsissutini ilaanni ilanngunneqartarput ilinnartut kompendiaat, power point, suliat allattorsimaffiat, allaaserisaq il.il. Maannakkumut pisumut fiilit tamarmik mappemut inissinneqassapput normulersorlugillu ilanngussaq 1A, 1B il.il. atuartitsinermut siullermut aamma ilanngussaq 2A, 2B il.il. atuartitsinerup aappaanut.

Atuartitseriaatsinik ineriartortitsinermi akissarsititsinissami aallaavittut atuartitsinermi minutsit 60-90-it atorlugit nalunaaquttap akunneri pingasut atorneqartarput.

Akissarsititsinerit qanoq pisinnaappat?
Akissarsititsinerit makku aqqutigalugit pisinnaapput:

• Atuarfik avaqqullugu akissarsititsineq, matumani sunngiffimmi sulineq ingerlanneqarluni.
• Atuarfik aqqutigalugu akissarsititsineq, matumani nalunaaquttap akunneri atorneqartut ukiumut suliffigisassanut ilanngullugit. Tamanna ilinniartitsisup aqutsisullu akornanni isumaqatigiissutigineqassaaq, aallaaviatullu aatsaat ilinniartitsisoq qaangiuttoornani sulippat pisinnaalluni. Sioqqutsilluni piareersareersimanikkut suliassaq ukiumut suliffiusussanut ilanngutereersimagaanni iluaqutaasinnaavoq, suliassaq atuartitsinerup qaavatigut ilanngunnagu.