Nunatsinni nipilersorneq, Nunarpullu nipilersornermi
Nipilersuutit Nunatsinneersornermi sumiiffiit nunarsuarmioqataanerlu
Taaguut: Nunatsinni nipilersorneq, Nunarpullu nipilersornermi
Qarasaasiakkut iserfissaq: Musikken i Grønland
Ilinniakkatut sammisaq: Nipilersorneq
Sutut saqqummiunneqarnera: Pdf fil
Allagaqartut: Andreas Otte
Nassuiarnera / Aallaqqaasiut:
Aallaqqaasiut:
'Nunarsuarmioqataaneq' oqariaaseq tusagassiorfinni tusartuartagarput. Nunarsuarmioqataanerli sorpiaasoruna, qanorlu iliorluta pineqartumut qisuariassanerluta paasiuminaatsissinnaavarput.
Nunarsuatta assigiippallaalernissaa nunarsuarmioqataanermi aarlerineqartut ilagaat, taamaalineranimi assigiimmik isikkoqalernissarput, assigiimmik nerisaqalernissarput, nipilersuutinik assigiinnik tusarnaalernissarput assigiimmillu oqaaseqalernissarput aarlerinartoqartinneqarmat. Assersuutigalugu McDonald’s’ Big Mac aamma The Beatlesikkut nipilersugaat nunarsuup annersaani siammarternikuupput, peqatigitillugulu inuppassuit kalaallisut danskisullu oqaluttut oqaatsimikkut 'ikinnerussuteqartut' oqaatsinik 'kikkunnit tamanit oqaaserineqartunik', soorlu tuluttut, ulluinnarni atuinissaminnik pisariaqartitsilersimammata. Tamakkuli suli inuit tamarmik assigiilernerannik kinguneqarsimanngillat, taamatullu pisoqarnissaa ernumassutigisariaqanngilaq. Nunarsuaq tamakkerlugu kultureqarpugut sunut tamanut siammarsimasumik.
Big Macs, The Beatles, Facebook aamma iPhones pillugit nunarsuatta illuatungaaniittunik oqaloqateqarsinnaalernikuuvugut, taamaakkaluartorli nerisassaateqarpugut, nipilersugaateqarpugut allatullu tigussaasunik peqarpugut angerlarsimaffitsinni nammineq pigisutut isigisinnaasatsinnik. Ilaannikkullu tamakkuninnga peqarnitta nukittunerulersittarpaatigut, tassami immikkuullarinnitsinnut takussutissaapput, ataatsimoorusuttarnitsinnullu ilaallutik.
Naallu McDonald’s, The Beatles, Facebook aamma iPhones oqaluttuarisaanikkut nutaajugaluartut nunarsuarmioqataaneq nutaajunngilaq. Aningaasat, nioqqutissiat, paasissutissiisarnerit inuillu imarpissuit nunavissuillu ikaarlugit pisaraluartut tamakku nutaarsiassaanngillat. Taamaammat nunarsuarmioqataaneq kulturitsinnut nammineq pigisatut isigisatsinnut ilaalluinnartuuvoq, soorluttaarlu nammineq kulturitut isigisarput nunarsuaq tamakkerlugu kulturimut ilaasinnaasoq. Tamakkerlugimmi qiviassagaanni suut nunarsuarmioqataanermut tunnganersut, suullu najukkatsinnut tunnganersut assigiinngitsikkuminaappoq. Ilaannikkummi imaassinnaavoq nuannerlunilu iluaqutaasinnaasoq uagut nammineerluta kulturerput kulturinut allanut sanilliutissallugu, taamatulli killiliinerit aaqqiagiinnginnernik amerlanernik pilersitsisinnaapput, taamaalineranimi puiorsinnaavarput nunarsuarput tamakkerluni imarpissuit nunavissuillu ikaarlugit ataasiinnaapajaalereersimammat.
Nammineerluta kulturerisarput immikkuullarilluarsinnaagaluarpoq, tassami nunarsuarmioqataaneq sumiiffinni allani allatut pisinnaasarmat.
Piffiit assigiinngitsuupput, assigiinngitsumik misigisaqarfiusarput, inuillu taakkua allanngoriartornerannut pisooqataapput.
Qanoq ililluta nunarsuarmioqataaneq sunniuteqarfigissaneripput, qanorlu iliorluta uagut inuit piffiit assigiinngitsuunissaannut peqataasinnaanerput allagaqaammi uani pineqarput, kisiannili aamma Nunatsinni nipilersornermik aallaaveqarpoq, matumani inuit suleqatigiillutik nunarsuarmioqataaneq piffiillu aqqutigalugit kulturinik immikkuullarissunik pilersitsisinnaanerat eqqarsaatigalugu.
