Siunertarineqartut:
Atuartitsissutit ineriartortinnerinut immikkoortitat 2012-imi GUX-ip aaqqissuuteqqinneqarneranik iluarsaassisimaneq tunngavigalugu atuutsinneqalerput.
Ilinniarnertuunngorniarfinni sisamaasuni inerisaalluni sulianik assigiinngitsunik assigiinngitsutigut iluarsaassisimaneq matumani isumassarsiffigineqarsimavoq.
Taamatut immikkoortitsinermi anguniagaavoq atuartut ineriartornerannik pitsanngorsaaniarluni aamma ilinniartitaaneq ataatsimut isigalugu pitsanngorsaaffiginiarlugu sulianut immikkut ilisimasallit kiisalu sulianut tunngatillugit siunnersortit inerisaallutik suliassanik assigiinngitsunik suliaqartarnissaannut periarfissinneqarnissaat. Tassani pineqarput inerisaalluni suliassat ilinniartitsisut atuartullu ilinniutini assigiinngitsuni unammilligassarisartagaasa ilaannut aaqqiissutaasinnaasut. Inerisaalluni suliaqartarnermi misilittakkat najukkani suliarineqaraluarpataluunniit imaluunniit atuarfinni tamani suliarineqaraluarpataluunniit nunami tamarmi ilinniartitsisunut atuartunullu iluaqutissanngorlugit avitseqatigiissutigineqarsinnaasariaqarput.
Aningaasaliissutissanik qanoq qinnuteqartoqarsinnaava:
Aningaasaliiffigineqarnissamik qinnuteqaraanni ilisserut atugassaq: Link
Sulianut immikkut ilisimasallit sulianullu tunngatillugit siunnersortit inerisaalluni suliassat aningaasaliiffigitikkusukkunikkit linkimi siuliani ineqartumi ilisserut immersussavaat.
Taamaaleriarlutik skema immersorneqarsimasoq sulianut tunngatillugit siunnersortimut nassiutissavaat, taassuma qinnuteqaat oqaaseqaatitalik Naalakkersuisoqarfimmut ingerlateqqissavaa. Naalakkersuisoqarfiup taava qinnuteqaat suliarissavaa.
PINGAARUTEQARPOQ!
Skema immersugaq sulianut tunngatillugit siunnersortimut nassiutinnginnerani pingaaruteqarpoq qinnuteqaatip rektorimut akuerisassanngorlugu saqqummiunneqarnissaa. Sulianut tunngatillugit siunnersorti Naalakkersuisoqarfimmut toqqaannartumik qinnuteqassappat atuarfiit taakkulu rektorii suliamut akuersaarnersut pillugu tusarniaaffigineqaqqaassapput. Rektorit atuarfimminni suliarineqartut tamaasa tamatigut misissortassavaat. Tamatumunnga pissutissarpassuaqarpoq:
1. Ilaatigut akissarsiassanut tunngassuteqartut. Rektorip aalajangersinnaavaa tiimit ilinniartitsisut ukiumut tiimissaannut ilanngunneqarnissaat, tassa inissaqartinneqassappata. Ukiumut tiimissat avataatigut immikkut akissarsiaqartitsisoqassappat atuarfik siullertut akissarsisitsisinnaavoq kingusinnerusukkullu akissarsisitsineq IKIN-imut akilersillugu.
2. Tamakkua saniatigut rektorit tamatigut malinnaasassapput, tassa atuarfimminni susoqarsinnaaneranik ilisimasaqarniassagunik, atuarfimmi sammisassat allat ilanngullugit eqqarsaatigisassavaat aamma pisariaqassappat anguniagaasoq sapinngisamik eqqumaffigisassavaat.
Qinnuteqarnissamut piffissaliussat piumasaqaatillu:
Inerisaalluni suliassanut tunngatillugit piumasaqaatit:
- Pingaaruteqarpoq suliap inerniliiffigineqarnissaa. Inerniliinerit tassaasinnaapput nalilersuineq, atuartitsinermit atortut, ingerlatsinerit assigiinngitsut assigisaallu. Atuarfimmi ataavartuutitassat, tassa sulisut akornanni paarlakaattoqarsinnaanera apeqqutaatinnagu aamma tamatuma saniatigut ilisimasat GUX-ini avitseqatigiissutigineqartassapput.
- Pineqartut Kalaallit Nunaannut attuumassuteqarlutillu tunngassuteqassapput.
- Inerisaalluni suliassaq suliakkiutigineqartunilu anguniakkat iluarsaassinermut tunngaviusut ataqatigississinnaavatit.
Inerisaalluni suliassat annertuut 100.000 kr.-t sinnerlugit nalillit suliassap/suliniutissap aallartinneqarnissaa ukiumik ataatsimik sioqqullugu kingusinnerpaamik ulloq 1. december Naalakkersuisoqarfimmut nassiunneqareersimassapput.
Inerisaalluni suliassat/suliniutissat 100.000 kr.-t inorlugit nalillit aningaasaliiffigineqarnissaannut ukioq naallugu qinnuteqartoqarsinnaavoq.
Suliniutit minnerit anginerillu aningaasaliiffigineqarnissaannut qinnuteqartoqarsinnaavoq. Taamaattoq 10 x tiimimusiassaq D minnerpaaffiliussaavoq. Tiimimusiassaq D ullumikkut 275,45 DKK-nik annertussuseqarpoq.