Alloriaat angisooq: Ilinniartitaanermi nutaami, ilinniartut siulliit naqinnernik ilisarsisinnaanngitsunut siunnersuisartutut misilitsitsisinnaanermut piginnaasaqarlutik, aallartipput
Ilinniartitaaneq suliamik ilisimasallit piginnaasaannik annertusassaassaaq, taamaalilluni Kalaallit Nunaanni naqinnernik ilisarsisinnaanngitsunut aamma allatigut atuarnermik allannermillu ajornartorsiuteqartunut iluaqutaassalluni.
Nutaarsiassaq
Ilinniarnerup 8. septemberimi aallartinnera, Naalagaaffiit Peqatigiit atuarnermik allannermillu piginnaasaqarnerup ullorititaani nunarsuarmi tamarmi nalliuttorsiutigineqartumi pisimanera immikkut angusaqarfiusutut pingaaruteqarpoq. Tassa Kalaallit Nunaanni meeqqat, inuusuttut inersimasullu atuarnermik allannermillu ajornartorsiutilinnut periarfissanik nukittorsaanermi pingaarutilimmik siuariarneruvoq.
”Kalaallit Nunaanni atuarnermik allannermillu ajornartorsiuteqartunik suliniuteqarnerup oqaluttuarisaanerani ulloq pingaarutilerujussuuvoq. Ilinniartartut siulliit aallartinnerisigut anguniakkamit iliuuseqarnermut alloriarneq pingaarutilik alloriarfigaarput. Suliamik ilisimasalinnut aningaasaliissuteqarpugut, ajornartorsiutinik paasisaqarsinnaasussanut aammalu inuit eqqortumik siunnersorneqarlutillu tapersersorneqarnissaannik qulakkeerinnittussanut,” Ilinniartitaanermut Aqutsisoqarfimmi atuarnermik ajornartorsiutilinnut suliniutini suliniummik aqutsisoq Mette Larsen Lyberth oqaluttuarpoq.
Suliniut Atuarnermik Ajornartorsiutilinnut Aamma Allatigut Atuarnermik Allannermillu Ajornartorsiutilinnut Nuna tamakkerlugu Iliuusissatut Pilersaarutip pingaarutilimmik ilagaa. Pisariaqartitsineq piviusoq suliniummi piviusunngortinneqarportaaq, Kalaallit Nunaanni ilinniartitaanerup iluani suliamik ilisimasallit assigiinngitsorpassuit tikkuartugaannik: atuarnermik allannermillu ajornartorsiutinik paasisaqarnissamut, misilitsitsinissamut, siunnersuinissamut tapersersuinissamullu immikkut piginnaasaqarnerusunik amerlanerusunik pisariaqartitsisoqartoq.
Ilinniartartut siulliit piginnaasanik nutaanik pilersitsinissamut aallaqqaataapput
Naqinnernik ilisarsisinnaannginnermut siunnersortitut ilinniarsimasut, misilitsitsinissamut piginnaasaqartut, nuna tamakkerlugu suliniummi pingaarutilimmik inissisimassapput. Atuarnermik ajornartorsiutilinnut misilitsissummik atuisinnaanermut saniatigut atuarnermik allannermillu ajornartorsiutit allat pillugit sulinissamut siunnersuinissamullu sakkussaqarneruleriartussallutik.
Tamanna immikkut pingaaruteqarpoq, tassami nuna tamakkerlugu naqinnernik ilisarsisinnaanngitsunut misiligut 2027-mi naammassineqarlunilu atorneqalerpat suliamik ilisimasalinnik ilinniarsimasunik pisariaqartitsineq piaartumik annertusissasoq naatsorsuutigineqarpoq.
Ilinniarsimasut siulliit 2028-mi piareersimasutut naatsorsuutigineqarput
Ilinniarnerup 2026-mi ukiakkut aallartinneqarnissaa siumut isiginermut pingaaruteqarpoq. Ilinniartut siulliit ilinniartitaaneq naammassinerminni, 2027-mi nuna tamakkerlugu naqinnernik ilisarsisinnaannginnermut misiligutip atuutilersinneqarneranut atatillugu misilitsitsinermut siunnersuinermullu suliassanik ilisimasaqalissapput.
Taamaalilluni ilinniartitaaneq aaqqissuussinerup pingaarutillip ilagilissavaa, nuna tamakkerlugu iliuusissatut pilersaarutip anguniagai, nuna tamakkerlugu ulluinnarni sulinermut piviusunngortinneqarnissaannut periarfissiissagamik.