Iliuusissatut pilersaarut oqaluttuarisaanikkut alloriaateqarfiusoq naqinnernik ilisarsisinnaanngitsunut suliniuteqarnermik kivitsissaaq
Iliuusissatut pilersaarut, innuttaasut naqinnernik ilisarsisinnaanngitsut kiisalu allannikkut atuarnikkullu ajornartorsiuteqartut pitsaanerusumik ikiorneqarsinnaanerinik qulakkeerinneqataassaaq. Iliuusissatut pilersaarut makku aqqutigalugit ingerlanneqassaaq; kalaallisut naqinnernik ilisarsisinnaannginnermut misiligut, digitalikkut ikiuutit, sullissisut ilinniarsimasut sullissinissaminnut tunngavissaqarluarnerusut aamma piginnaatitaaffiit erseqqinnerit inatsisit tunngavigalugit.
Indhold
Kalaallit Nunaanni oqaluttuarisaanikkut alloriaateqartoqarpoq.
Inuit naqinnernik ilisarsisinnaanngitsut allatigullu atuarnikkut allannikkullu ajornartorsiutillit kisimiittutut misigiunnaassapput.
Iliuusissatut pilersaarut “Meeqqani, inuusuttuni inersimasunilu naqinnernik ilisarsisinnaanngitsut allatigullu atuarnermik allannermillu ajornartorsiutillit ikiorserniarlugit sulinut 2025-2029" pisortat, atuarfiit, ilinniarfeqarfiit kommunillu ataatsimut kivitsinissaannut pisussaaffiliivoq.
“Naqinnernik ilisarsisinnaannginneq uaniititsuartarpa, taamaattumillu nuannaarutigaara maannakkut anguniagaqarfiusumik iliuusissatut pilersaaruteqaleratta, atuarniarnikkut ajornartorsiutinik pitsaaliortitsisussamik. Siusinaartumik suliniuteqartarnitsigut, eqqortunik ikiuutinik atuinitsigut ilinniarluarsimasunillu sulisoqarnitsigut annertuutigut pitsanngortitsisinnaavugut – atuarfimmiinnaanngitsoq, inuunermulli tamarmut. Kikkulluunniit arajutsineqassanngimmata pilersaarutip inuiaqatigiinni suliniuteqarfiit tamaasa akimorlugit suliniutinik nukittorsaanissatsinnut pisussaaffilerpaatigut. Inuiaqatigiinnut naligiissitsinerusunut peqataatitsinerusunullu alloriarneruvoq pingaaruteqartoq, kikkulluunniit tamarmik takorluukkaminnik inuiaqatigiinni piviusunngortitsinissaminnut periarfissinneqartussaammata, ilinniagaqarnissaq kisiat eqqarsaatiginagu, inuunerli tamaat eqqarsaatigalugu”, Nivi Olsen, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq oqarpoq.
Iliuusissiamik suliniut ukiuni tulliuttuni qitiusumik suliniuteqarfissat sisamaasuni ineriartortitsillunilu ingerlatsissaaq:
1. Misiligutit qulaajaassutillu kalaallisut oqaasertallit ineriartortinneqarnerat
2. Atuarnermut allannermullu sakkut digitaaliusut kalaallisut oqaasertallit atuutsilersinneqarnissaat
3. Inatsisit piareersaaffigalugit suliniutit
4. Atuartitsisut siunnersuillu ilinniagaasigut qaffassarneqarnissaat.
Suliniutit taakkua suliassanut ataasiakkaanut piviusunngortinneqarsinnaasunullu tutsinneqassapput, inunnut ataasiakkaanut ilinniartitaanermullu tamarmiusumut nukittorsaataatilerlugit.
Pilersaarummi matumani siunissaq naapertuilluarneruffiusoq peqataatitsiffiunerusorlu tunngavilerneqarpoq, kikkut tamarmik – qanoq atuarsinnaatiginertik apeqqutaatinnagu – ilikkagaqarnissaminnut peqataanissaminnullu inuiaqatigiinnilu kalaallini atugarissaarnermut sunniuteqarluartumut ilassuteqarnissaminnut periarfissaqarfigisassaat.