Naqinnernik ilisarsisinnaannginnermut aamma allatigut atuarnermik allannermillu ajornartorsiuteqarnermut inatsisissatut siunnersuut suliarineqarluni aallartippoq
Suliap siunertaraattaaq suliniutit ataqatigiinnerusumik ingerlanneqalernissaannut tunngavissiissalluni, taamaasilluni inunnut naqinnernik ilisarsisinnaanngitsunut allatigullu atuarnermik allannermillu ajornartorsiutilinnut pitsaanerusumik paasineqarsinnaanissaannut pisariaqartumillu tapersersorneqarsinnaanissaannut periarfissaliissalluni.
Indhold
Ulluni 21.–22. oktober Nuummi suleqatigiissitat naapipput, suliniuteqarfimmut nr. 3-mut atatillugu inatsisissatut siunnersuutip suliarineqartussap imarisaanik oqalliseqarlutik. Suliniuteqarfik Nuna tamakkerlugu naqinnernik ilisarsisinnaannginnermut allatigullu atuarnermik allannermillu ajornartorsiuteqarnermut suliniummut atavoq.
Suleqatigiissitat tassaapput oqartussaasunit attuumassuteqartunit sinniisut aamma Kalaallit Nunaanni inuiaqatigiinni assigiinngitsuni suliallit immikkut ilisimasallit. Taakku assigiinngitsunik misilittagaqarlutillu suliaminnut tunngasunik isiginnittaaseqarnerat inatsisissatut siunnersuutip pitsaassusaanik qaffassaataasussaavoq.
Suliaqarnermi suleqatigiissitat ilaasortaat siunnersuuteqartarput, inatsisissatut siunnersuummilu ilanngunneqartussat pingaarutillit oqallisigalugit.
Inatsisiliornikkut suliniutip siunertaraa ilaatigut paasiniassallugu, inuit naqinnernik ilisarsisinnaanngitsut allatigullu atuarnermik allannermillu ajornartorsiutillit pisinnaatitaaffii suussanersut, suut tapersersuinissamut periarfissatut neqeroorutigineqassanersut, qanoq misilitsittoqarsinnaanersoq aamma qanoq ajornartorsiutit sukumiisumik misissorneqarsinnaanersut, kiisalu sulinermi akisussaaffik qanoq agguarneqassanersoq.
Suliap siunertaraattaaq suliniutit ataqatigiinnerusumik ingerlanneqalernissaannut tunngavissiissalluni, taamaasilluni inunnut naqinnernik ilisarsisinnaanngitsunut allatigullu atuarnermik allannermillu ajornartorsiutilinnut pitsaanerusumik paasineqarsinnaanissaannut pisariaqartumillu tapersersorneqarsinnaanissaannut periarfissaliissalluni.
Siunertaavoq inatsisissatut siunnersuut 2027-mi Inatsisartut ukiakkut ataatsimiinneranni saqqummiunneqarlunilu suliarineqarsinnaassasoq.
Suleqatigiissitsineq Ilinniartitaanermut Aqutsisoqarfimmit aamma Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmit aaqqissuunneqarpoq.