Matumuuna nalunaarutigissavarput ulloq manna aallarnerfigalugu Ilinniartitaanermut Aqutsisoqarfik HJ Rinksvej 35-miittoq ajuusaarnaraluartumik matusariaqarmat. Tassaniipput aqutsisoqarfiup allaffissornertaa, misilitsinnermut, allaffik politikkikkut immikkoortortaqarfik GUX-teamilu.
Illup iluata silaannaanik misissuinerup takutippaa illu annertuumik oqoqartoq. Ilinniartitaanermut Aqutsisoqarfiup immikkoortortaa HJ Rinksvej 35-miittoq matuneqarpoq Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup isumaqatigiissuteqarfigineratigut.
Ilinniartitaanermut Aqutsisoqarfiup immikkoortortaa HJ Rinksvej 35-miittoq matuvoq, oqullu pissutigalugu ajoraluartumik aqutsisoqarfiup illutai tamarmik matupput.
Ilinniartitaanermut Aqutsisoqarfiup sulisui tamarmik pisarneq malillugu telefonikkut mailikkullu pissarsiarineqarsinnaapput. Attavissat tamarmik uani takuneqarsinnaapput iserasuaat.gl - Attavigisigut.
Ilinniartitaanermut Aqutsisoqarfiup immikkoortortaqarfia Kissarneqqortuunnguaq 20-miittoq HJ Rinksvejimiittorlu piffissaligaanngitsumik matoqqagallassapput annertunerusumik misissorneqarnissai pissutaallutik.
Ilinniusiorfimmut atuakkanik suli inniminniisoqarsinnaavoq. Atortussialli inniminnerneqartut Ilinniartitaanermut Aqutsisoqarfimmi poortuinissamut periarfissaqalerpat aatsaat nassiunneqarsinnaalissapput. Sivikinnerpaamik ullut 14-it naatsorsuutigineqassaaq aatsaat Ilinniusiorfimmit nassiussisinnaalissagatta.
Qulaani pineqartut malitsigisaanik atuisutsinnut suleqatigisartakkatsinnullu kipiluttunartumik kinguneqarsinnaaneri ajuusaarutigaarput, neriuppugullu piaartumik paasisaqarumaarluta. Paasisaqarnerugutta tamanna pillugu nalunaaruteqarumaarpugut.
Inussiarnersumik Inuulluaqqusilluta
Kaali Olsen
Styrelseschef