Efterskolimi malittarisassat

Init
Efterskolini atuartut ineqateqartarput. Amerlanertigut ineqatit 1 - 4-sarput. Ininiittarput siniffiit, nerriviit atisaasiviillu.

Inini ikinngutillu aliannaarsaartoqarsinnaavoq, qasuersaartoqarluni imaluunniit ilinniagassanik suliaqarluni.

Ineqatit
Ineqatigiit ilaat arlalinnik ataatsimoorussaqartarput oqaloqatigiilluartarlutillu, sivitsunngitsorlu imminnut nuannariillualertarlutik.
Soorunami akerlianik aamma pisoqarsinnaavoq: ataatsimoorussaqarani oqaloqatigiissutissaaleqinarlunilu. Atuartut piareersimaffigisariaqarpaat ineqatillu imminnut sungiunnissaq sivisulaarsinnaammat.

Aallaavittut atuartup ineqatinilu ukioq atuarfiusoq naallugu inertik inigisussaavaat. Inigisamut ineqammullu naleqqiullugu arlaatigut ajortoqarpat, tamanna pillugu atuartup ilinniartitsisoq attaveqaataasoq oqaloqatigisariaqarpaa.

Danmarkimi efterskolini tamani pujortarneq inerteqqutaavoq – silami aamma illup iluani. Tamanna atuuppoq efterskolimi atuartunut, sulisunut pulaartunullu assersuutigalugu angajoqqaanut imaluunniit ilaqutariinnut attaveqaataasartunut. Efterskolit ilaat pujortarunnaarniarluni pikkorissarnernik neqerooruteqartarput. Efterskolit ilaasa taamaallaat atuartut pujortartanngitsut atuartussatut akuerisarpaat.

Danmarkimi inatsisit naapertorlugit efterskolit silataanni iluannilu pujortarneq inerteqqutaavoq (tak. Pujortartarneq pillugu inatsit 15. august 2012-imeersoq).

Malittarisassat assersuutigalugu makkuusinnaapput:

• Atuarneq pinngitsoorani peqataaffigineqartussaavoq
• Nerinerit pinngitsoorani peqataaffigineqartussaapput
• Atuartitsineq malinnaavigineqassaaq atuarfimmilu suliassat isumagineqartassallutik
• Piffissaq eqqorlugu takkuttoqartassaaq – atuarnermut aamma nerinermut
• Niviarsiaqqat nukappiaqqat inaannut gangiinullu aamma nukappiaqqat niviarsiaqqat inaannut gangiinullu pulaaqqusaanngillat
• Atuartut efterskolimi kinguaassiuutitigut atoqatigiinnissaat inerteqqutaavoq
• Imigassamik aanngajaarniutinillu atuinissaq imaluunniit toqqortaqarnissaq inerteqqutaavoq – efterskolimi aamma efterskolimut efterskolimiillu angalanerni imaluunniit efterskolip aaqqissugaanik angalanerni. Aamma malugisimaarluni efterskolimut takkunnissaq inerteqqutaasarpoq
• Pujortarneq inerteqqutaavoq
• Qaqugukkut inigisamiinnissaq malittarisassaqartarpoq
• Nal. 22.45-miit 06.30-mut efterskolimi nipiliortoqassanngilaq.

Taakkua saniatigut soorunami atuartunit ilimagisaavoq atuaqatitik sulisullu akuersaassagaat. Allat inussiarnersumik pissuseqarfigisariaqarput aamma pigisat, namminerisamik inuuneq killissarisallu ataqqisariaqarlutik.

Efterskolimi atuartut ilaasa – qallunaat kalaallillu – torersaanissamik malittarisassat kulturikkut tupannartutut misigisarpaat, efterskolimi misigilikkamittut aalajangersimasunik malittarisassaqarneq kinguneqartitsisarnerlu sungiusimannginnamikkit.
Torersaanissamik malittarisassat angerlarsimaffimmit sungiusimasanit naleqqiullugit annertuumik allannguinerusinnaapput imaassinnaavormi atuartoq angerlarsimaffimmini sumulluunniit nikinnissaminut annertuumik kiffanngissuseqartitaasimasoq, qaqugukkut innarnissani qaqugukkullu nerinissani nammineq aalajangertarlugit tamatigullu nammineq aalajangiisuusarluni.

Atuartup malittarisassat unioqqutippagit
Efterskolip torersaanissamik malittarisassaanik unioqqutitsineq atuartumut kinguneqarsinnaavoq. Unioqqutitsineq imaannaanngitsuuppat, atuartoq mianersoqquneqarsinnaavoq imaluunniit piffissami aalajangersimasumi angerlartitaalluni. Efterskolip torersaanissamik malittarisassai annertunerusumik imaluunniit arlaleriarluni unioqqutinneqarpata atuartoq soraarsitaasinnaavoq. Efterskolimit soraarsitaassutaasinnaasut tassaapput tillinneq, persuttaaneq aamma nakkarsaaneq.

Atuartup pinngitsoorani peqataaffissai tassaapput atuarneq, nerinerit pingaarnerit, eqqiaaneq aamma igaffimmi ikiuunnerit. Atuartup piffissamik eqquinissani nammineq akisussaaffigaa.

Efterskolini amerlanerpaani atuartut ullaakkorsiornermut pinngitsooratik peqataasartussaapput. Taamaammat pingaartuuvoq piffissaq eqqorlugu ullaakkut makillunilu neriartortarnissaq.
Atuartoq arlaleriarluni inortuisarpat, assersuutigalugu ullaakkorsiornermut, atuartup angajoqqaavi akuliutsinneqassapput tamannalu atuartumut kinguneqarsinnaavoq.

Ulloq pitsaanerpaamik pissarsiffigissagaanni atuartitsinerlu malinnaaffigilluassagaanni, pingaartuuvoq unnuakkut sinilluartarnissaq. Efterskolit amerlanersaat unnukkut qassinut inini nipaarutereersimanissaq/innareersimanissaq pillugu malittarisassaqartarput, tamannalu atuartunit ataqqineqartussaavoq.
Atuartup unnuakkut aneerluni nammattoorneqarnera allatulluunniit iliorluni unnuakkut akornusersuinera, atuartumut kinguneqarsinnaavoq.

Ulluni atuarfiusuni efterskolip avataani unnuinissaq akuerisaanngilaq.

Atuartoq efterskolimiinnermini napparsimasutut peqqiilliortutulluunniit misigiguni, ilinniartitsisuminut imaluunniit ilinniartitsisumut pigaartuusumut saaffiginnissaaq – innangaannarnissaq nammineq aalajangerneqarsinnaanngilaq. Ilinniartitsisup imaluunniit inersimasup allap nalilissavaa, atuartoq innangaannassanersoq imaluunniit nakorsiassanersoq. Nalinginnaavoq efterskolip nakorsamut piffissamik inniminniissussisarnera.

Atuartoq ilaqutariinni attaveqaataasartuniitilluni napparsimalersimappat efterskolimullu utersinnaanngikkallarluni ilaqutariit attaveqaataasartut efterskoli attaveqarfigissavaat.

Efterskolit ilaasa piumasarisarpaat atuartut napparsimanerminni efterskoli qimakkallassagaat. Taamaammat ilaqutariit attaveqaataasartut atuartup napparsimanerani najugaqartinnissaa piareersimaffigisariaqarpaat.

Atuarnissamut, nerinernut, eqqiaanermut imaluunniit igaffimmi ikiuunnissamut il.il. peqquteqanngitsumik takkutinngitsoornerit efterskolimi akuerineqarneq ajorput.

Takkutinngitsoornissat suulluunniit siumoortumik isumaqatigiissutigineqartassapput, assersuutigalugu nakorsiarnermut atatillugu takkutinngitsoornissat.

Efterskolit amerlanerpaat atuartut peqquteqaratik takkutinngitsoorneri nalunaarsortarpaat – atuartitsinermut, nerinernut, eqqiaanermut imaluunniit igaffimmi ikiortaanermut il.il. takkutinngitsoornerunersut apeqqutaatinnagu. Atuartoq arlaleriarluni takkutinngitsoortarpat, efterskolip atuartup angajoqqaavi akuliutsissavai, tamannalu atuartumut kinguneqarsinnaavoq.

Efterskolip igaffiani inuppassuit nerisassiuunneqartarput. Ukiup atuarfiusup ingerlanerani efterskolini amerlanerni atuartut igaffimmi ikiortaasarput, tamatumanilu igaffimmi sulisut nerisassiorneranni, iffiorneranni, erruineranni eqqiaanerannilu ikiortarlugit, atuaqatitik sullittarlugit il.il.

Igaffimmi ikiuunnermikkut atuartut paasilersarpaat nerisassat qanoq piareersarneqartarnersut aamma ataatsimoorussamik suliassaqarluni suleqatigiinnut peqataaneq qanoq ittuunersoq.

Atuartut aammattaaq illup iluani silamilu eqqiaanermut torersaanermullu peqataasartussaapput, efterskoli eqqiluillunilu nuannersooqqullugu. Ilinniartitsisut efterskolillu sulisui atuartut eqqiaaneranni torersaanerannilu ikiuuttarput.
Atuartut assersuutigalugu anartarfiit uffarfiillu, ataatsimoortarfiit, init atuartitsiviusut aamma silami nunaminertat torersuutillugillu eqqiarnissaat peqataaffigissavaat – aamma soorunami namminneq initik eqqiarlugillu torersartassavaat.

Atuartut namminneq atisatik, oqorutimik qalii tungitillu, allarutitik il.il. errortassavaat. Efterskolimi atuartunut errorsisarfeqartarpoq tassanilu errorsiveqarlunilu panersaaveqartarpoq.

Efterskolimi piffissat nerisarfiit aalajangersimasuusarput – tamanna immaqa atuartut ilaasa angerlarsimaffimminnit sungiusimanngilaat. Ulluinnarni nerisarnerit assersuutigalugu imaassinnaapput:

• Ullaakkorsiorneq
• Ullup qeqqa sioqqullugu sassaalliineq
• Ullup-qeqqasiorneq
• Ualikkut sassaalliineq
• Unnukkorsiorneq
• Unnukkut sassaalliineq

Efterskolit ilaanni sapaatip-akunnerisa naanerini nerisarnerit allaanerulaarsinnaapput, assersuutigalugu ullaakkorsiorneq aamma ullup-qeqqasiorneq brunchinngorlugit katigunneqarsinnaapput.

Atuartut sapaatip-akunnerisa naanerini sunngiffimminni efterskolimiitillutik nalinginnaasumik nerinernut pingaarnernut pinngitsooratik takkuttartussaapput (ullaakkorsiorneq, ullup-qeqqasiorneq aamma unnukkorsiorneq), taakkunanilu tamatigut inersimasunik nereqataasoqartarpoq – taamatullu sapaatip-akunnerata naanera tamaat inersimasunik efterskoliniittoqartarluni.

Efterskolit pingaartippaat, eqqissisimasunik avatangiiseqarluni nereqatigiittarnissaq, avitseqatigiittarnissaq aamma nerinermi pissuserissaarnissaq. Nalinginnaavoq neriffiit pingaarnerit ataatsimoorluni aallartittarnerat ataatsimoorlunilu naammassisarnerat. Nerinerup nalaani mobiltelefoni atorneqaqqusaanngilaq.

Efterskolit ilaanni nerinerup nalaani atuartunut tamanut nalunaaruteqartoqartarpoq, assersuutigalugu unnukkut nerinermi aamma atuartut allagarsiassaat agguaanneqartarput.

Atuartut nerisassatik akunnermiliullugillu nerisassatik tamaasa efterskoliminni pisarpaat, taamaammallu nerisassarsinissartik pisariaqartinnagu. Ullup ingerlanerani arlaleriarluni nerisoqartarpoq kaattoqalernaviaranilu.

Efterskolip isumagisarpaa atuartut peqqinnartunik nikerarluartunillu nerisaqartinnissaat. Nalinginnaasumik ullup-qeqqanut kissartunik nerisoqartarpoq, taakku assersuutigalugu tassaasinnaapput igaat neqitallit, naatsiiallit, qaqorteqqasullit imaluunniit pastatallit, iffiat aamma salatit imaluunniit naatitat – ullut ilaanni immaqa aalisakkamik imaluunniit naatitartuinnartartut nerisartagaannik sassaalliisoqassaaq.

Qularnanngilaq atuartut nerisassanik ilisimariikkaminnik sassaalliiffigineqartarumaartut aammali ilaannikkut nerisassanik takornagaqartarumaarlutik. Imaassinnaavoq ukiup atuarfiusup ingerlanerani efterskolimi sapaatip-akunnerisa ilaanni nerisassanik aalajangersimasunik sassaalliisoqartoq, assersuutigalugu imaassinnaavoq sapaatip-akunnera ataaseq naatitaannartorfiusoq sapaatip akunnerinilu allani Kinamiut imaluunniit Mexicomiut nerisassaataannik sassaalliisoqarluni.

Efterskolit pingaartittarpaat atuartut nerisassanik sassaalliutigineqartunik misiliinissaat – narrusoqassanngilaq, atuartullu nerisassanik misileerusussuseqartariaqarput.

Atuartoq naatitaannarnik nerisaqartuuppat, sukkortuuppat imaluunniit nerisassanik sapigaqarpat efterskoli ilisimatinneqassaaq, tamannalu efterskolip atuartut nerisassiuunneranni eqqumaffigisassavaa.

Efterskolit ilaasa atuartut mobilinik, tabletinik qarasaasianillu atuisarnerat malittarisassaqartittarpaat. Immaqa efterskolip malittarisassarivaa mobiltelefoni inini ataatsimoorfiusuni imaluunniit ilinniagassalerinermi atorneqassanngitsoq, imaluunniit atuarnerup nalaani mobili inigisamut qimanneqartassasoq.

Efterskolit nalinginnaasumik taamaattunik malittarisassaliortarput kissaatigisaramikku, atuartut piffissartik imminnut atussagaat tamarmik immikkut mobiltelefonertik samminagu.

Efterskolit ilaat atuartunut bankeqartarput tassungalu angajoqqaat kaasarfimmiussaannik meeqqami kontoanut ikisisinnaapput. Tamatuma kingorna atuartup atuarfimmi kontoni imaqarpat kaasarfimmiussani tigusinnaavai.
Atuartoq akiliinermut korteqarpat, atuartunut bankip atornissaa immaqa pisariaqassanngilaq.

Efterskolit atuartup aningaasanik tigoriaannarnik annertunerusunik iniminiititaqarnissaa inassutigisanngilaat. Efterskolit atuartunut bankillit neqeroorutigalugulu inassutigisarpaat, aningaasat tigoriaannaat annertunerusut atuartunut bankimi paaritittarnissaat.