airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Efterskolertarneq pillugu meeqqat atuarfianni ilitsersuineq

Atuartup angajoqqaallu sukumiisumik ilitsersorneqarnissaat, atuartup efterskolernermini iluatsitsinissaanut pinngitsoorneqarsinnaanngilaq. Tamatigullumi isumassarsiatsialaavoq, ilaqutariit aamma meeqqat atuarfiata efterskolimik toqqaanissaq pillugu qanimut suleqatigiinnissaat.

 


Efterskolerneq atuartup angajoqqaavisa efterskolillu namminneq akunnerminni isumagisassaraat.

Ilinniartitsisoq angajullernut siunnersuisartoq/ilitsersuisartoq ilitsersuinermi tamatumani qitiusumik inissisimavoq, ilitsersuinerlu aallartereertariaqarpoq angajullerni atualernermi, ilinniagaqarnissamik inuussutissarsiutitaarnissamillu ilitsersuisarnerup aallartinnerani.


Sukumiisumik ilitsersorneqarnerup ilaatigut kingunerisarpai:

  • atuartup efterskolissaminik toqqaanissaata pitsaanerulernera
  • atuartup angajoqqaallu qanoq pisoqarnissaanik paasinninnerat
  • atuartup efterskolimi inuunermut piareersarneqarnera
  • Danmarkimi efterskolertut ikerinnakkut atuarunnaartartut ikilisinnissaat.

Danmarkimi efterskolertarneq pillugu meeqqat atuarfianni ilitsersuinernik assigiinngitsunik ingerlatsisoqarsinnaavoq – soorluttaaq inuusuttunut ilinniakkat allallu pillugit ilitsersuinernik ingerlatsisoqartartoq. Assersuutigalugu makku ingerlanneqarsinnaapput:

  • Efterskolit pillugit atuartunut angajoqqaavinullu unnukkut nalinginnaasunik paasititsiniaaneq, efterskolit pillugit oqallinnermik ilaqartoq. Tamatumunnga ilaatinneqarsinnaavoq Danmarkimi efterskolernikunik angajoqqaavinillu misilittakkatik pillugit oqaluttuartunik pulaartoqarneq.
  • Ilinniartitsinerup nalinginnaasup ilaatut, efterskolit pillugit aalajangersimasumik qulequtsiilluni tiiminik ingerlatsisoqarsinnaavoq. Aalajangersimasumik qulequtsiilluni tiimeqarnerni, Danmarkimi efterskolernikunik aggersaasoqarsinnaavoq, misigisarsimasaminnik misilittakkaminnillu oqaluttuartussanik. Filmi: ’Piareersarit/Gør dig klar’ isiginnaarlugulu oqallisigineqarsinnaavoq, taanna ilaatigut YouTube-miippoq, kalaallisut oqaasertalik uaniilluni aamma qallunaatut oqaasertalersugaq uaniilluni.
  • Illoqarfinni ilinniarnertuunngorniarfinni ’Ilinniartitaaneq pillugu paasititsiniaalluni angalasoqaraangat’ (Uddannelseskaravanen), Kalaallit Illuini ilinniagaqartunik ilitsersuisartoq atuarfimmut allamulluunniit paasissutisseeqqullugu aggersarneqarsinnaavoq.

Meeqqat atuarfianni Danmarkimi efterskolertarneq pillugu paasititsiniaanernik ingerlasoqaraangat, isumassarsiatsialaasinnaavoq Kalaallit Illuanni ilinniagaqartunik ilitsersuisartup imaluunniit Efterskolinut Ingerlatsivimmi sulisup internettikkut peqataatinnissaa. Taakkua qinnuigineqarsinnaapput angajoqqaanut atuartunullu saqqummeeqqullugit, aamma aperisoqarnissaanut piareersimaqqullugit.

Qinnuteqaateqarnermi suliassat naammassippata, atuartorlu efterskolimi atualernissaminut akuerisaareerpat, efterskolimi atualernissamut piareersarneq ingerlaqqissaaq, atuartoq Danmarkimi ulluinnarisassaminut nutaamut atuarfimmilu allaanerusumik ilusilimmi atualernissaminut pitsaanerpaamik piareersarneqaqqullugu – tamanna angajoqqaat aamma meeqqat atuarfiata peqataaffigisariaqarpaat.

Efterskolertarnerit pillugit ilitsersuisarnerit kommunit assigiinngitsunik aaqqissuuttarpaat. Aallaavittut ilinniartitsisoq angajullerni siunnersuisartunik/ilitsersuisartoq aamma meeqqat atuarfianni ilinniartitsisut atuartumik ilisarisimannilluartut, atuartoq toqqarlugu pitsaanerpaamik ilitsersorsinnaasarpaat. Sumiiffiit ilaanni aammattaaq Majoriaq Danmarkimi efterskolerneq pillugu ilitsersuisarpoq.


Kingullermik nutarterneqarpoq: 28. april 2021