airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Vild med viden

Suliniut Nuummi Eqqumiitsulianik Saqqummersitsivimmit Kalaallit Nunaanni eqqumiitsuliorneq pillugu meeqqanut arfineq-pingasut aqqaneq-marlullu akornanni ukiulinnut atuakkanik ineriartortitserusuttumit aqunneqarpoq. Atuakkat Nuummi Eqqumiitsulianik Saqqummersitsiviup Qallunaat Nunaannilu atuakkanik naqiterisitsisarfiup ”Forlaget Epsilon”-ip taakkualu nangeqattaartuliaasa Vild med Viden®-it suleqatigiillutik suliaraat.

Suliniut ingerlasoq

Aallartiffik
April 2020

Naammassiffik
Juni 2021

Tunuliaqut

Kalaallit Nunaanni eqqumiitsuliornerup oqaluttuassartaa oqaluttuarineqarneq ajorpoq, meerarpassuillu Kalaallit Nunaanniittut eqqumiitsulianik katersugaasivinnut iseriaannaaneq ajorput. Eqqumiitsuliat inuit, inuiaqatigiit, piffissat assigiinngitsut, eqqarsaatit isumassarsiallu pillugit oqaluttuanik takutitsisinnaasarput. Kinaanermik, suminngaanneernermik, aamma inuiaqatigiit, oqaluttuarisaaneq inuillu oqaluttuarisaanermi qanoq inissisimanerat pillugit eqqarsalersitsisinnaasarput.

Eqqumiitsuliornerup inuiaqatigiit oqaluttuassartaat oqaluttuarisinnaasarpaa, kisianni inuup ataatsip isigisaanit tunngavilimmik – tassa eqqumiitsuliortup isigisaanit. Taamatuttaaq eqqumiitsuliorneq isumassarsisitsillunilu eqqarsalersitsisinnaasarpoq. Taakkuuppullu uagut nangeqattaartuni Vild med Viden-imiittuusugut misissorusutavut – atuakkat paasissutissiissutaallutillu meeqqanut eqqumiitsuliorneq pillugu eqqarsalersitsillutillu apeqqutissaqalersitsissapput.


Suliniut pillugu

Nuummi Eqqumiitsulianik Saqqummersitsivik kalaallit eqqumiitsuliaat aamma eqqumiitsuliornerup oqaluttuassartaa pillugit meeqqanut inersimasunullu paasissutissanik siammarterinermik ulluinnarni suliaqartarpoq. Naqiterisitsinermi eqqumiitsuliat Nuummi Eqqumiitsulianik Saqqummersitsivimmiittut aamma Nunatta Katersugaasiviani Allagaateqarfianilu ittut najoqqutarineqassapput. Atuakkat nangeqattaartuniittut tamarmik immikkut kalaallisut 3.000-inngorlugit qallunaatullu aamma 3.000-inngorlugit naqitertinneqassapput. Taakku nangeqattaartunut Vild med Viden®-inut katersugaasiveqarneq pillugu meeqqanut arfineq-pingasunit aqqaneq-marlunnut ukiulinnut atuakkiaasunut katersugaasivimmilu sulisunit allanneqartartunut ilagitillugit naqitertinneqassapput. Nangeqattaartut arfineq-pingasunik Kalaallit Nunaanni eqqumiitsuliornerup oqaluttuassartaanik imalinnik atuagartaqassapput.

Sammisat arfineq-pingasuusut ukuupput:

  • Eqqumiitsuliorneq ulluinnarsiutaagallarmat – atisanik piniutinillu pinnersaaneq
  • Eqqumiitsuliorneq – eqqumiitsuliorneq eqqumiitsunngormat, 1850-imit nalitsinnut
  • Aalut Kangermiu – kalaallit oqaluttuaannik, oqaluttuatoqaannik ulluinnarnilu inuunerannik eqqumiitsuliorneq, katersuineq assilialiornerlu.
  • Grafisk Værksted "Eqqumiitsuliortut Atuarfiat" – eqqumiitsuliorneq pillugu ilinniartoqarsinnaanngormat // Hans Lynge ullullu nutaat
  • Ilisimasassarsiortut qalipaasui
  • Pinngortitaq alianaatsorsuaq // Nunamik assilialiaq qalipagaq
  • Inuiaqatigiinni eqqumiitsuliorneq – nalitta eqqumiitsulialluunniit inuiaqatigiinnik takutitsinerat
  • Tupilak, ukkusissaq ilusilersukkallu


Atuakkat kalaallisut qallunaatullu naqitertinneqassapput, atuakkallu Ilinniartitaanermut Aqutsisoqarfiup meeqqat atuarfiinut Kalaallit Nunaanniittunut tamanut nassiussuutissavai.


Nuummi Eqqumiitsuliornermik Saqqummersitsivimmi atuartitsisarneq

Nuummi Eqqumiitsulianik Saqqummersitsivik meeqqanut inuusuttunullu atuartitsinermik aalajangersimasumik neqerooruteqassaaq, aamma workshoppertitsisarlunilu pisoqartitsisassaaq. Nuummi Eqqumiitsulianik Saqqummersitsiviup Nuummi meeqqat atuarfii arfiniliusut kiisalu ilinniarfeqarfiit ingerlaqqiffiusut qanimut suleqatigai. Nuummi Eqqumiitsulianik Saqqummersitsivik ingerlaavartumik katersanut saqqummersitanullu tunngasunik ilinniutissanik suliaqartarpoq. Ukiumut meeqqat inuusuttullu 1.200-t missaanniittut atuartitsinerni sunngiffinnilu Nuummi Eqqumiitsulianik Saqqummersitsivimmiittarput. Aammattaaq Nuummi Eqqumiitsulianik Saqqummersitsivik meeqqanut eqqumiitsulianik saqqummersimatitaqartuartarpoq. Atuakkat nangeqattaartuliat Vild med Viden Nuummi Eqqumiitsulianik Saqqummersitsiviup kalaallit eqqumiitsuliaat pillugit meeqqanut inuusuttunullu qaammarsaassutissaasa ilagilissavaat; suliniut taanna eqqumiitsuliat pillugit Nuummiinnaanngitsoq aammali Nuup avataani paasissutissanik siammarterisuussaq.


Vild med Viden pillugu

Vild med Viden®-it meeqqanut atuakkiaapput suliamut ilisimasallit ulluinnarni suliatik pillugit allagaannik imaqartartut. Vild med Viden® atuagaaraapput pappiaqqatut A6-itut atsigisut 16-inillu qupperneqartut – assitalersugaallutillu titartagartalersugaapput.

Atuakkani Vild med Viden®-ini paasissutissanik siammarterineq pingaarnerpaatinneqarpoq. Atuakkat atuffassissutigineqarsinnaapput namminerluunniit atuaannarneqarsinnaallutik, kiisalu angerlarsimaffimmi atuarfimmiluunniit suliamut aalajangersimasumut tunngatillugu atuarneqarsinnaapput. Atuakkat oqaloqatigiinnermik sulianullu aalajangersimasunut alapernaannermik meeqqat inersimasullu avitseqatigiissutigisinnaasaannik pilersitsisarput.

Atuakkat Vild med Viden®-it katersugaasiviit suliffeqarfiillu suleqatigalugit atuakkiarineqartarput, ullumikkullu sammisat assigiinngitsorpassuit atuakkiarineqareersimapput.

Takuuk vildmedviden.com


Akusissaasoq

Nuummi Eqqumiitsulianik Saqqummersitsivik

Aaqqissuisoq

Stine Lundberg Hansen
Paasissutissiisartoq
stlh@sermersooq.gl
(+299) 32 77 33

Suleqataasut

Forlaget Epsilon
Nunatta Katersugaasivia Allagaateqarfialu
Ilinniartitaanermut Aqutsisoqarfik

Fagit atuartitsinerlu
Takuuk
Ilinniusiorfiup ilinniusiai
Takukkit
Ilinniusianik atorit
Atorit
Ilikkagassatut pilersaarutit
Takuuk
Kingullermik nutarterneqarpoq: 16. juli  2020