iMovie - Errortorneq

Ingerlarnga

Ilinniartitsinermi atortorissaarutit	PPT-eq (PowerPoint), aaneqareerlutik allanngortinneqarlutillu atuartitsinissannut tulluarsarneqarsimasut. Malugiuk allannerit aappaluttumik qalipaatillit illit allanngortitassarigakkit. PPT-eq uaniippoq. Allatat Nakuusameersut atuartut atuagassaat uaniipput: kalaallisut aamma qallunaatut.
Alloriarfik (trin)	Akulliit, 6. aamma 7. klasser
Fagi	Inuttut inerikkiartorneq.
Atuartitsinerit amerlassusii	Atuartitsinerit pingasut 45 minutsikkaartut.
Ilikkagassatut anguniagassat	Atuartitsinerup nukittorsassavaa atuartut imminnut paasinerat, pilersitsisinnaanerat aammalu tapersersussasavai eqqarsaqqisaartutut isumaginnittutullu ineriartornissaannut inuttut isumaliutiginnittutut pilersaarusiortutullu, imminnut allanillu isumaginnittutut.
Atortorissaarutit digitaliusut	EleviPad imaluunniit smartphone. Zoom: video atorlugu oqaloqatigiittarfik (40 minutsit tungaannut akeqanngitsoq). iMovie: filminik aaqqissuussisarfik akeqanngitsoq. Showbie: app-iuvoq atuartut peqatigalugit allakkanik avitseqatigiinnermik sulianillu katersuinermik periarfissiisoq.
Suleriaaseq	Atuartut kisimiillutik imaluunniit digitalikkut attaveqaqatigiinneq atorlugu marlukkaarlutik sulisinnaapput.
Atuartut piginnaasareriigassaat	Zoom: Atuartut piffissaliunneqartoq malillugu Zoomimut isersinnaapput. iMovie: Filminik aaqqissuussisarfimmi atortut nalinginnaanerit atuartut ilisimavaat: Immiussaq sorleq aaqqissuutissanerlugu toqqarsinnaavaat. Aaqqissuussinermi killuillutillu piiaasinnaapput. Aaqqissuussartik Fotosimut toqqorsinnaavaat. Showbie: Atuartut isertaammik toortaanermikkut klassi/gruppi ilaasortaaffigilersinnaavaat, aamma Showbiemi ikkussuisinnaapput assersuutigalugu assinik.
Ilinniartitsisut piginnaasareriigassaat	Zoom: Ilinniartitsisup Zoomikkut atuartunik ataatsimeeqateqarneq aallartissinnaavaa. Linki ataatsimiinnissallu qaqugu pinissaa angajoqqaanut/angajoqqaatullu akisussaatitaasut nassiussinnaavaa taakkulu atuartumut ingerlateqqissavaat. Imovie: Ilinniartitsisoq immiussamik iMoviemi aaqqissuussassamik toqqaanermik, killuinermik, piiaanermik kiisalu Fotosimut toqqorsinermik ikiuisinnaavoq. Showbie: Ilinniartitsisoq klassimik/gruppimik pilersitsisinnaavoq, PPT-imut allassinnaavoq aamma filinik ikkussuisinnaavoq.

Periaaseq

Atuartitsineq sioqqullugu:

Ilinniartitsisoq Zoomimi linkimik piffissamillu atuartunut ajornanngippat angajoqqaat/angajoqqaatut akisussaatitaasut aqqutigalugit nassiussissaaq.

Showbiemi klassi/gruppi pilersinneqassaaq isertaallu PPT-imut allallugu, taamaalillutik atuartut peqataanissaminnut nalunaarsinnaapput.

Allatat Nakuusameersut PPT-ilu Showbiemi klassinut/gruppinut ikkunneqassapput, taamaalillutik atuartut taakkununnga isersinnaalissapput.

Atuartitsinerup nalaani:

Piffissaq isumaqatigiissutigineqartoq malillugu, soorlu nalunaaqutaq qulinut, ilinniartitsisoq atuartullu Zoomimi naapissapput. Malugiuk atuartut ataatsimiinnermut ilanngunniarneranni utaqqisoqarsinnaammat. Utaqqinermi assersuutigalugu atuartut coronavirusi pillugu qanoq isumaqarnersut apersorneqarsinnaapput.

Atuartitsinerup aallartinnerani malittarisassiorneq isumassarsiatsialaavoq, assersuutigalugu atuartup oqaaseqarnianngikkaangami atortorissaarutimi mikrofoniata qamittarnissaa malittarisassiarineqarsinnaavoq.
Ataqatigiinnerup pitsaasuutinneqarnissaa pingaaruteqarput atuartut klassiminni ataatsimoortarnertik coronavirusip nalaani maqaasisinnaammassuk.
Tamatuma kingorna atuartitsinermi sammineqartussaq saqqummiunneqassaaq PPT-ilu tulleriiaartumik sammineqassalluni.
Atuartut suliassamik paasinninnissaat aamma suliamik nammineerlutik suleqateqarlutilluunniit naammassinnissinnaanissaat qulakkiissallugu pingaaruteqarpoq. Angajoqqaat matumani ilanngunneqassanngillat, kisianni atuartup suliassamik nammineerluni naammassinninnissaa qulakkeerneqassaaq. PPT samminerani atuartut apeqquteqarsinnaatitaassapput.
Atuartut ilisimatinneqassapput PPT-eq atuartitsereernerup kingorna iserfigineqarsinnaasut Showbiemut ilineqarsimasut.
Qaqugu atuartut ilinniartitsisumut Showbiekkut apeqquteqarsinnaassanersut ajornanngippat piffissalerneqassaaq, aamma atuartut kajumissaarneqassapput imminnut apeqquteqaatigisatik Showbiekkut akisinnaassagaat.
Atuaqatigiit filmiliaasa tamarmik takuneqarsinnaanissaat Showbielu atorlugu oqaaseqarfigisinnaanissaat atuartut suliaanni qulakkiissallugu pingaaruteqarpoq.

Atuartitsinermi naggasiutissatsialaassaaq atuartut ilisimatissallugit qaqugu Zoomikkut naapittoqaqqinnissaanik.

Atuartitsinerup kingorna:

Kikkut sulianik naammassinnissimanersut, filmimik ikkussisimanersut immaqalu Showbiekkut apeqquteqarsimanersut misissorneqarsinnaapput. Atuartut atuartitsinermut peqataasimanngitsut assersuutigalugu angajoqqaavinut/angajoqqaatut akisussaatitaasunut attaveqarnikkut malinnaatinneqassapput.