GUX ilinnialernissamut piareersaataasumik ilinniarneruvoq, imaappoq ilinniagaq atuagarsorfiusoq, ingerlaqqiffiusumik ilinniarnissamut piareersarfiusoq. Ilinniarnertuunngorniarfimmi GUX-mi ukiuni pingasuni aamma ukiuni marlunni kiisalu atuartitsissutini ataasiakkaani tapertaliussatullu atuartitsissutinik ilinniartoqarsinnaavoq. Aamma e-GUX-mi alisissumik ilinniartoqarsinnaavoq. Ukiunittaaq sisamani ilinniagaq GUX Nuummi ingerlanneqarsinnaavoq, tassaluTimersornermik sammivilik toqqaraanni, tamatumani nalunaaquttap-akunneri atuartitsiviusut ikinnerit ingerlanneqartarput, taamaalilluni timersornikkut soqutigisat aallunnissaannut periarfissaqarluarluni.
Sammiviit tamarmik Kalaallit Nunaanni Kalaallit Nunaatalu avataani ilinniaqqinnissamut ammaassisuupput.
Ilinniarnertuunngorniarfiit sisamaapput, katillugit 1.300 missaanni ilinniartoqartut. Ilinniarfiit illoqarfinni ukunanipput:
- Aasiaat
- Sisimiut
- Nuuk, kiisalu
- Qaqortoq.
GUX tunngaviusumik ilinniagaqarnermik aammalu ilinniakkami sammivimmik aalajangersimasumik ilinniagaqarnermik aaqqissuussaavoq. Tunngaviusumik ilinniarneq ukiup affaanik sivisussuseqarpoq. Tunngaviusumik ilinniarneq ilinniarfinni sisamani tamani assigiippoq. Tunngaviusumik ilinniarnermi ilinniartitsissutaapput kalaallisut, danskisut, tuluttut, matematik, kultureqarnermik ilinniarneq, science, ilinniariaatsinik ilinniarneq timersornerlu. Tunngaviusumik ilinniareernerup kingorna ilinniakkap sammivianik aalajangersimasumik ilinniarneq aallartittarpoq. Ilinniakkap sammiviani ilinniarneq ukiunik marlunnik affarmillu sivisussuseqarpoq. Ilinniakkap sammivii pingaarnerit toqqarneqarsinnaasut katillugit qulingiluaapput. Sunngu.gl-imi GUX pillugu ilitsersuuteqarpoq, tassanilu ilinniakkap sammivii pillugit ilitsersuuteqarluni: videot ilitsersuutit aamma ilitsersuinermut atortussat(quppernerup ataani).
Ilinniartitsissutini siunnersortit arlaqartut ilinniarnertuunngorniarfimmi ilinniartitsissutit inerisarlugillu nakkutigisarpaat. Tamatumunnga ilanngullugu ilinniartitsissutini siunnersortit Iserasuaammi quppernerit ilinniartitsissutinut tunngasut nutartertuarnissaat akisussaaffigaat.
Anguniagaq
Ilinniarnertuunngorniarnerup anguniagaraa:
- nuna imminut napatissinnaallunilu namminersortup inerisarneranut qitiusumik ilaasutut inuusuttut ilinniagaqassusiisa annertusarnissaat.
- inuusuttut amerlanerit ilinniarnertuunngorniartarnissaasa qularnaarnissaat.
- ilinniartut ilinniartitsissutini pissarsiaasa annertusarnissaat.
- naammassisartut amerlinissaat uniinnartartullu ikilinissaat, tassuunakkut kalaallit inuusuttut amerlanerit ilinniarnertuunngortaqqullugit.
- iliniartunut tamanut - qanorluunniit oqaatsitigut kulturikkullu tunuliaqutaqaraluarpata - iluarsartuusseqqinnerup anguniarpaa:
- ilinniartitaanerup aaqqissugaanerata pitsanngorsarnissaa, tassuunakkut nunap namminersortup inuiaqatigiinni sumiiffinni tamani piginnaasaqarluartunik sulisoqartup tunngavissinnissaa anguneqaqqullugu.
GUX-ip ilinniarnertuunngorniarnermik eqaatsumik ilusiliineq neqeroorutigaa, ikerinnakkut uninnerit ilinniakamillu allannguinerit ilinniartut ilinniagassatut kissaatigisaannut pisariaqanngitsumik unittoorutaaqqunagit imaluunniit utaqqinerit uninnganerillu inerititaqarfiunngitsut pinngitsoorumallugit.
GUX-ip sapinngisamik inuusuttut amerlanerpaat Kalaallit Nunaanni, Danmarkimi nunarsuullu sinnerani ingerlaqqiffiusumik ilinniagaqalernissaannut piareersassavai. Ilutigisaanik ilinniarnertuunngorniarfiup inuusuttut kinaassutsiminnik pilersitsinissaat aamma namminneq kulturikkut pingaartitaminnik allallu pingaartitaannik eqqarsaatersornissaat peqataaffigissavaa. Taamaalilluni ilinniarnertuunngorniarfik aamma nammineq kulturimut, inuiaqatigiinnut nunarsuullu sinneranut naleqqiullugu nalinginnaasumik perorsaanertaqartussaavoq.