Tunuliaqutaq: Ilinniarnertuunngorniarfinni kulturi pillugu ataatsimiittarnerit aallaavigalugit, soorlu ilinniartup allarluinnarnik (assersuutigalugit ilinniariaatsit nutaat, oqaatsit, ilinniagassat, ilinniartitsisut allamiut, ilinniartut ineqarfiiniinnerit, inuussuttut inooriaasiat, attaveqaqatigeriaatsit allallu) naapitsinera aallaavigalugu ilinniarnerup ingerlannerani ilinniartup ilisimariigaanik ilisimanngisaaniillu ataqatigiittoqarnera pilersinniarlugu immikkut maluginiartarnissaa pisariaqassaaq kiisalu kulturikkut assigiinngitsunik tunngaveqarnerat ilinniartitsinermi atorlugu. Tamanna pingaarluinnartutut isigineqarpoq, pingaartumik ilinniartoq qitiutillugu ilinniartitsisarnissap tunngavigineqarnissaata pingaartinnissaa eqqarsaatigalugu. Ilinniarneq taamaalilluni annermik ilinniartup ulluinnarni angerlarsimaffimmi sunngiffimmilu misilittagaanik attuumassuteqartariaqarpoq, tamannalu aqqutigalugu kulturikkut ilisimasaasa ilai aallaaviginiarsaralugit, tamannalu soorunami ilinniartitsisumut (danskiusumut) ulluinnarsiutaanngimmat aamma killormut. Matumanili erseqqissartariaqarpoq sumit pisuuneq ilinniartitseriaatsillu imminnut ataqatigiissillugit iluaqutiginiarneqarsinnaanngimmata, tassami ilinniartut tamakkerlutik kulturikkut, inuunikkut inuttullu assigiinngitsuummata. Taamatuttaaq kissaatiginanngilaq suleriaatsimik imaluunniit perorsaanikkut malitassamik ataasiinnarmik eqqoqqissaartutut isigisamik aalajangiisoqassasoq.
Siunertaq: Atuartitsineq ilinniartup kulturikkut nukissai aallaavigalugit ingerlanneqassaaq, taamaaliornikkut ilinniartoq ilinniarnertuunngorniarfimmiinnermini oqaatsinut kulturimullu tunngatillugu takornartatut misigisimaqqunagu.
Anguniagaq: Atuartitsinermi perorsaanermut ilinniartitseriaatsimullu tunngatillugu inuunermi kulturimut tunngasut ilanngunniarneqassasut. Takorluuisinnaanerit pisinnaasanillu sunniisinnaanerit ilinniartitsinernut ilanngunneqassasut. Perorsaanikkut allanngorarsinnaaneq akunnermi ilinniartitsiffiusumi atorneqarpat imaluunniit sivisuumik ilinniartitsinermi atorneqarpat assigiipput. Ilinniartup nammineerluni ilinniariaasia, ineriartornera aamma oqaatsinik assigiinngitsunik ilaannakuusumik piginnaasaqalersinnaanera atuartitsinermut ilanngunniarneqassapput. Init atuartitsiffiusut suleriaatsinik ilinniartitseriaatsinillu allanngorartunik pilerlugit ineriartortinnissaat, tassani ilinniartut namminneerlutik sammisaat ilinniartitsissutinik imaqartut qitiutinneqarlutik. Matumani ilinniartitsissutit qaffasissusaat appartinniarneqanngilaq, kisianniliuna ilinniartitsisup allamik aallaaveqarluni naggataatigut ilinniartitsinermi anguniagassatut kissaataasunut angusaqarnissaa anguniarneqassasoq, tamannalu aqqutigalugu ilinniakkap naalernerani ersarinnerusumik inerneqarnissaa kinguneqarluni, tamatumanilu ilinniartut angusaqarusussuseqarnerusut pissarsiarineqarlutik.