Upperisalerineq isumalioqqissaarnerlu
Klassini tamani pinngitsoorani atuartitsissutigineqartarpoq, upperisamullu nassuerutiginninneq sammineqassanngimmat atuartitsinissamut peqataajumanani qinnuteqartoqarsinnaanngilaq.
Ilikkagassatut anguniagassat kiisalu pisinnaasat ilisimasassallu ilitsersuutaat
(Tak. § 34. Atuarfimmi atuartitsissutini atuartitsissutinilu qanitariissuni alloriarfiit siunertaat kiisalu atuartitsissutit siunertaat ilikkagassatullu anguniagassat pillugit Namminersorlutik Oqartussat nalunaarutaat).
§ 34. Atuartitsinerup siunertaraa, atuartut kristumiussuseq inuillu upperisaat
ilisimasaqarfigilerlugillu paasisimasaqarfigilissagaat. Atuartut nunarsuaq tamakkerlugu upperisat ilisimasaqarfigilissavaat kiisalu upperisarsornerup iluani isiginneriaatsit isumalioqqissaarnerullu sammivii. Atuartut inunnik isiginneriaatsit assigiinngitsut iluanni ileqqorissaarnerup tunngavii paasisimasaqarfigilissavaat.
Imm. 2. Atuartitsinerup tunngavilissavaa, atuartut upperisarsiornermut kiisalu inuunermi
ileqqorissaarnermut apeqqutinut inunnut allanut imminnullu attaveqarnermut tunngasunik
paasinninneq eqqarsaatersorsinnaanerullu ineriartortinnissaat. Atuartut ilisimasaqarfigilissavaat, inunnik allanik isiginninneq, inuunermut isiginninneq, pinngortitamut kulturimullu isiginninneq kiisalu silarsuarmut paasinninnerup sunnertarlugulu inuttut immikkuullarissuseq ineriartortittarmagu kiisalu inuunermi qinikkat.
Imm. 3. Atuartitsinerup ersersissavaa, inunnut ataasiakkaanut upperisaqarluni inuuneq inuunermik isiginnittaatsimut inunnillu allanik peqateqarnermut pingaaruteqarmat.
Imm. 4. Atuartitsinerup kingunerisa ilagissavaat atuartut kristumiussutsip kalaallit kulturiannut
immikkut pingaarutaa paasisimasaqarfigilissagaat. Taamatuttaaq atuartitsinerup peqataaffigissavaa atuartut upperisat inuunermillu paasinnittaatsit allat kulturitut kingornussatut pingaassusiat aamma upperisamut, ileqqorissaarnermut, inuiaqatigiinnik isiginnittaatsimut inuunermullu paasinninnermut tunngaviliineri paasisaqarfigilissagaat. Atuartut paasisimasaqarfigilissavaat upperisani imaluunniit isumalioqqissaarnermi paasinnittaatsit naleqassutsillu inuaqatigiinnut kulturinullu assigiinngitsunut
qanoq tunngaviliisarneri.
Siunertaq pillugu oqaaseqaat
Siunertaq ima aaqqissugaavoq:
Imm. 1-imi pineqarput qanoq ilinniarnerup atuartut pisinnaasaannik ineriartortitseqataaneranut tapertaanera, kiisalu inuunermi apeqqutit pingaarutillit oqaloqatigiissutigisinnaassagunikkit.
Imm. 2-mi erseqqissarneqarpoq inuunermut isiginnittaatsit amerlasuut inuit inuunerminni
qinigaannut sunniisarnerisa pingaaruteqassusaa. Tunngaviusunut ilaavoq inuup inuiaqatigiinni inuttut kinaassutsimi nassaarinissaa.
Imm. 3-mi allaatigineqarput inuup inooqataanerata aammalu upperisalerinerup ataqatigiinneri, tamassumalu isummiussaqareernani oqaloqatigiissutiginissaanut aqqutissaanera. Pingaaruteqarpoq atuartut inuit allat upperisannik inuunermillu isiginnittariaasiannik ilisimasaqarnissaat.
Imm. 4 naleqqiussineruvoq ullumikkut kalaallit upperisaasa inuunerminnillu isiginnittaasiisa
tunngaviinik paasinninneq pingaartinnerullugu, qanorlu tunngaviusumik isiginnittaatsip kulturimik inuiaqatigiinnillu siammasissumik sunniisarnerat. Ilutigalugu atuartut kulturinik inuiaqatigiinnillu allatut atugalinnik allaanerusunillu pingaartitalinnik ilisimasaqalissapput.
Upperisalerinermi upperisaq aalajangersimasoq pillugu nalunaajaanerunngilaq, atuartulli upperisalerinermi inuunermi najoqqutarisaq pillugu nunarsuarmi upperisanik paasinninneranut tunngavoq. Atuartitsineq ammasuussaaq atuartunut tamanut upperisaq apeqqutaatinnagu peqataatitsisoq
Atuartitsissutip upperisanut allanut ataqqinninnermut, paasinninnermut akaarinninnermullu paasinninneq upperisanut inuunermullu isiginnittaatsimut siuarsassavai kiisalu atuartut ileqqorissaarnissamut, inuunermi najoqqutassanut atassuteqarteqarnerillu pillugit apeqqutit ineriartortissavaat. Oqaloqatigiinnikkut misissuinikkullu inuunermi apeqqutit atuartut namminneq isummat naleqartitallu ineriartortissavaat.
Atuartitsissutip atuartunut kinaassutsip pilersinneqarnerannut paasinninnerannullu inooqataarnermut inuiaqatigiinnullu peqataasutut tunniutissavai.
Naliliineq tassaavoq ilikkagassatut anguniagassat aallaavigalugit atuartut ulluinnarni atuarnerminni pissarsiaannik ingerlaavartumik naliliisarneq, ikorfartuineruvoq isumassarsiornarlunilu.
Atuartut ulluinnarni assigiinngitsorpassuartigut nalilerneqarsinnaapput. Naliliineq pitsaasarpoq atuartitsinermi siunertaq atuartunut aammalumi angajoqqaanut ersarikkaangat. Naliliinerni isiginiakkat assigiinngitsuusinnaapput piffissanilu assigiinngitsuni ingerlanneqarlutik. Naliliinerit ilaanni piariikkat isiginiarneqartarput naliliinerlu pisarpoq suliaq imaluunniit atuartitsinermik ingerlatsineq piareeraangat. Naliliinerit aamma piffissap sivisunerusup iluani ingerlasinnaapput, tassani ukiup alloriarfiulluunniit ingerlanerani piffissamik isumaqatigiissuteqarnikkut suliarisimasat suliallu nutaanerusut, suleriaatsit imaluunniit atuartitsinermik ingerlatsinerit sanilliunnerisigut naliliisoqarluni. Ulluinnarni piffissallu annertunerusut akuttoqatigiissaarlugit naliliisarnerit pingaaruteqarput. Naliliineq tassaavoq atuartut, angajoqqaat ilinniartitsisullu ataatsimut atuartup ineriartornerata malinnaaffiginissaanut sakkussaq, aammalu atuartup suliaqarnerni, ingerlataqarnerni alloriarfinnilu tamani anguniagassanik angusaqarnissaanik qulakkeerinnittussaasoq.
Qisuariarfiginninneq
Qisuariarfiginninneq tassaavoq atuartitsissummi sulianik sulinerullu ingerlaneranik utertiffiginninneq. Tassani ilinniartitsisumit atuartumuunerusarpoq, atuartulli imminnut aamma qisuariarfigisinnaapput. Qisuariarfiginnittarneq atuartut ataatsimoornerannut iluaqutissartaqarsinnaavoq. Ilinniartitsisup qisuariarfiginninneq atuartitsissummik eqqarsaatersorfiusunngorlugu sinaakkusersinnaavaa.
Qisuariarfiginninneq ima takutinneqarsinnaavoq:
• Suna siunertaava?
• Atuartoq siunertamut naleqqiulluni sumiippa?
• Anguniagassap angunissaanut alloriarnissaq tulleq suua?
Ilikkagassatut anguniagassat kiisalu pisinnaasat ilisimasassallu ilitsersuutaat
Kingullermik nutarterneqarpoq: 17. juli 2026
Kontaktperson

Naya Pedersen Lyberth
Atuarfinnut siunnersorti, immikkut atuartitsinermi, inuttut inerikkiartornermi, upperisalerineq isumalioqqissaarnerlu
Email: nasp@nanoq.gl
Oqarasuaat: (+299) 34 62 13

