Pinngortitalerineq
Pinngortitalerineq alloriarfinni ukioqatigiinnilu tamani atuartitsissutaavoq.
Nukarlerni akullernilu pinngortitalerinerup iluani atuartitsissutit immikkut atuartitsissutigineqarneq ajorput. Angajullerni atuartitsissutit uumassusilerineq, fysik/kemii pinngortitaleriffiusumillu nunalerineq immikkut atuartitsissutigineqartarput.
Ilikkagassatut anguniagassat kiisalu pisinnaasat ilisimasassallu ilitsersuutaat
(Tak. § 30. Atuarfimmi atuartitsissutini atuartitsissutinilu qanitariissuni alloriarfiit siunertaat kiisalu atuartitsissutit siunertaat ilikkagassatullu anguniagassat pillugit Namminersorlutik Oqartussat nalunaarutaat).
§ 30. Atuartitsinerup siunertaraa atuartut pinngortitalerinermi piginnaasatigut ineriartortitsillutillu ilisimasaqalernissaat taamaalillutik atuartitsissummi suleriaatsit taaguutillu
paasisimasaqarfigilerlugillu ilisimasaqarfigillualissagaat. Atuartut namminneq allallu
isumannaatsuunissaannik peqqissuunissaannillu akisussaaqataasinnaanngornissaminnut
ilisimasassarsissapput aamma sumiiffimminni nunarsuarmilu tamarmi avatangiisinik isiginnittaatsit tunngavigalugit akisussaaffeqartumik iliuuseqarnissamut toqqammavissaminnik. Atuartut qaammaasaqarfigilissavaat, inuit inooriaasiat iliuusaallu nunarsuarmi inuunermut sunniuteqartarmata.
Imm. 2. Atuartitsinerup kingunerisa ilagissavaat, atuartut paasissagaat pinngortitalerineq
sunniuteqarsinnaammat tupigusunnermut, alapernaannermut, pinngortitserusunnermut,
tunniusimanermut, ineriartortitsinermut kiisalu ajornartorsiutinik qaangiiniarnermut
aqqutissiuisunik iliuuseqarnermut. Atuartitsinerup ulluinnarni suliassat suliarisinnaanissaannut aamma atuisartuunermut avatangiisinullu tunngasunik inuttut isummersorfiginnissinnaanerannut toqqammavissaannik atuartut sakkussaannik tunissavai.
Imm. 3. Atuartitsinerup inunnik allanik attaveqaqateqarnermut pinngortitalerinermi taaguutinik
nassuiaasersueriaatsinillu pissusissamisoortumik atuisinnaanissaannik atuartut tunngavississavai.
Imm. 4. Atuartitsinerup kingunerisa ilagissavaat pinngortitalerinerup teknologiillu
kultureqarnermut inuiaqatigiinnermullu sunniinerat atuartut misigissagaat paasillugulu.
Atuartitsinerup kingunerisa ilagissavaat atuartut pinngortitamik pissarititaanillu atuinermut
tamassumalu avatangiisinut inuuniarnermullu kingunerinut soqutiginninnissaat, isummersornissaat akisussaaffeqartutullu misiginissaat.
Siunertaq pillugu oqaaseqaat
Siunertaq ima aaqqissugaavoq:
Imm. 1-imi pineqarput atuartitsissummi anguniagassat ilisimatusarnermi isiginnittaatsinut
assingusut.
Imm. 2-mi pineqarput atuartup inuttut inerikkiartornerani anguniagassat. Atuartut atuartitsissummi annertuumik ilisimasaqalertussaapput, ilisimasalli aatsaat isumaqalissapput atuartup ulluinnarni inuunini pinngortitamullu ilisimatusarnini ataqatigiisilersinnaappagit.
Imm. 3-mi pineqarput atuartup sumiiffimmini nunarsuarmilu tamarmi inunnik allanik
attaveqarsinnaalernissaanut anguniagassat.
Imm. 4 pineqarput atuartup inuiaqatigiinni tamat oqartussaaqataaffigisaanni inooqataasutut
sassarluni peqataalluarsinnaanissaanut anguniagassat.
Pinngortitalerineq pinngortitami pisartunik pinngortitamullu ilisimatusarnermik, inuullu pinngortitamiittarneranik ulluinnarnilu teknologimut atassuteqarnitsinnik imaqarpoq. Pinngortitami misissuinikkut atuartitsinermilu atuartut pinngortitaq pillugu ilisimasaqalissapput suliaqarnermilu atuartut atuartitsissummi oqaatsit attaveqarsinnaanermilu piginnaasassaat ineriartussapput.
Atuartitsissutip atuartut alapernaannerat avatangiisiminnullu nuannarinninnerat paasinninnerallu ineriartortinneqassapput. Tigussaasunik suliaqarnikkut atuartut piviusoq ilaaffigisartik misilittagaqarfigilissavaat, soorluttaaq pinngortitamik ilisimatusarnermi paasinnittariaatsit tunngaviusullu siumorlugit nalinginnaasumik eqqartorlugillu nassuiarsinnaassagaat.
Pinngortitalerinerup atuartut inuup pinngortitamut sunniuteqartarnera paasissavaat kiisalu apeqqusiisinnaaneq, oqaloqatigiinneq aamma inuiaqatigiinnut piujuaannartitsinermullu ajornartorsiutit pillugit atuartut tunngavilersuisinnaanerat nukittorsassavai. Kiisalu atuartut misigissavaat, misileraanerit, kukkunerit nutaamillu paasisaqarnerit atuartitsissutip imaanik paasinninnermik pitsaanerulersitsisartoq.
Naliliineq tassaavoq ilikkagassatut anguniagassat aallaavigalugit atuartut ulluinnarni atuarnerminni pissarsiaannik ingerlaavartumik naliliisarneq, ikorfartuineruvoq isumassarsiornarlunilu.
Atuartut ulluinnarni assigiinngitsorpassuartigut nalilerneqarsinnaapput. Naliliineq pitsaasarpoq atuartitsinermi siunertaq atuartunut aammalumi angajoqqaanut ersarikkaangat. Naliliinerni isiginiakkat assigiinngitsuusinnaapput piffissanilu assigiinngitsuni ingerlanneqarlutik. Naliliinerit ilaanni piariikkat isiginiarneqartarput naliliinerlu pisarpoq suliaq imaluunniit atuartitsinermik ingerlatsineq piareeraangat. Naliliinerit aamma piffissap sivisunerusup iluani ingerlasinnaapput, tassani ukiup alloriarfiulluunniit ingerlanerani piffissamik isumaqatigiissuteqarnikkut suliarisimasat suliallu nutaanerusut, suleriaatsit imaluunniit atuartitsinermik ingerlatsinerit sanilliunnerisigut naliliisoqarluni. Ulluinnarni piffissallu annertunerusut akuttoqatigiissaarlugit naliliisarnerit pingaaruteqarput. Naliliineq tassaavoq atuartut, angajoqqaat ilinniartitsisullu ataatsimut atuartup ineriartornerata malinnaaffiginissaanut sakkussaq, aammalu atuartup suliaqarnerni, ingerlataqarnerni alloriarfinnilu tamani anguniagassanik angusaqarnissaanik qulakkeerinnittussaasoq.
Qisuariarfiginninneq
Qisuariarfiginninneq tassaavoq atuartitsissummi sulianik sulinerullu ingerlaneranik utertiffiginninneq. Tassani ilinniartitsisumit atuartumuunerusarpoq, atuartulli imminnut aamma qisuariarfigisinnaapput. Qisuariarfiginnittarneq atuartut ataatsimoornerannut iluaqutissartaqarsinnaavoq. Ilinniartitsisup qisuariarfiginninneq atuartitsissummik eqqarsaatersorfiusunngorlugu sinaakkusersinnaavaa.
Qisuariarfiginninneq ima takutinneqarsinnaavoq:
• Suna siunertaava?
• Atuartoq siunertamut naleqqiulluni sumiippa?
• Anguniagassap angunissaanut alloriarnissaq tulleq suua?
Ilikkagassatut anguniagassat kiisalu pisinnaasat ilisimasassallu ilitsersuutaat
Kingullermik nutarterneqarpoq: 17. juli 2026
Kontaktperson

Ane Fleischer
Atuarfinnut siunnersorti Pinngortitalerineq, Matematikki
Email: afle@nanoq.gl
Oqarasuaat: (+299) 34 62 02

