7. klasse - Aalajangersimasumik sammisaqarluni suliassaq

Aalajangersimasumik sammisaqarluni suliaqarneq atuartitsissutit atuartitsissutilluunniit qanitariissut arlallit ilikkagassatut anguniagassartaannut tunngasuussapput. 

Aalajangersimasumik suliaq aallartitinnagu atuartut ilisimatinneqassapput nalilersuineq pissasoq, uku tunngavigalugit:

• Suliap ilinniakkatigut imarisaa

• Sammisamik suliaqarnerup ingerlannera

• Suliaq inigaq, tassunga ilanngullugit ilusilernera saqqummiunneqarneralu

• Qulaani taaneqartut ataqatigiissusaat.

Klassip ilinniartitsisuisa atuartut suleqatigalugit sammineqartussaq ukiut tamaasa 1. februaari nallertinnagu aalajangiunneqartassaaq. Aalajangersimasumik sammisaqarluni suliaq, atuarfiup periarfissiissutigisimasaasa iluanni, qanoq ilusilerlugu saqqummiussinissanik qanorlu ilusilersugu ingerlateqqinnissaanik atortut namminneq qinersimasaannik suliamik naammassisamik kinguneqassaaq.

Klassip ilinniartitsisuisa immaqalu ilinniartitsisut allat aalajangersimasumik sammisaqarluni suliaqarnermut tunngatillugu makkununnga ilitsersuissapput:

• Sammisassap ataatsimik arlalinnilluunniit apeqqutitaqartup erseqqissarnissaanut

• Aalajangersimasumik sammisaqarluni suliap imarisassaanik killiliinermut

• Suleriaatsinik misissueriaatsinillu toqqaanermut atuinermullu

• Atuartitsissutit arlallit imarisaannik periaasiinillu toqqaanermut atuinermullu

• Najoqqutassarsiorfissanik atortussanillu toqqaanermut atuinermullu

• Saqqummiusseriaasissamik toqqaanermut atuinermullu

• Pilersitassamik suliaqarnermut

• Saqqummiussinissap piareersarneranut saqqummiussinermullu

Atuartut ullunik atuarfiusunik tulleriinnik 3-5-inik paasissutissanik katersuinermut, sammisap suliarineranut, suliamik inaarsarnerannut suliamillu tamakkiisup saqqummiunnissaanut piareersarnerminnut atugassaannik periarfissinneqassapput.

Atuartut suliaminnik naammassinninnerinut uiggiutiinnarlugu saqqummiussisoqassaaq. Atuarfiit namminneq aalajangissavaat:

• aalajangersimasumik sammisaqarluni sulineq qaqugu pissanersoq,
• piffissaq, aammattaaq sumi qanorlu saqqummiunneqassanersoq.

Atuartup aalajangersimasumik sammisaqarluni suliami piareersarnerani atuarfeqarfiup atukkiussinnaanikuusai atuartup atorsinnaavai.

Atuarfimmi naliliisarneq uppernarsaasiortarnerlu pillugit Namminersorlutik Oqartussat nalunaarutaanni atuarneqarsinnaavoq - kap. 6, § 29.

Ilinniartitsisunut ilitsersuut