Matematikkimi misilitsinnerit

Matematikkimi pisinnaasatigut misilitsinneq allattariarsorneruvoq akunnermillu ataatsimik sivisussuseqarluni.

Atuartoq pisinnaasamigut aamma atuartitsissummi atortunik atuisinnaanermigut misilinneqassaaq. Pisinnaasatigut misilitsinnernut ilaapput kisitsisinik aamma algebramik, geometriimik aamma matematikkimik atuinermik suliassat.

Atortorissaarutit

Atortorissaarutit pisariaqartinneqartut atorneqarsinnaapput. Taamaattorli formelit tabelillu, lommeregnerit imaluunniit teknikkikkut paasissutissiinermut atortut allat atorneqaqqusaanngillat.

Misilitsinnerit ingerlanneqarnissaat

Ilinniartitsisoq atuarfiup pisortaata toqqagaa atuaasuussaaq imaluunniit ilitsersuisuussaaq.

Sungiusaatitut suliassat

MATEMATIK_ Demoopgaver

Meeqqat atuarfianni inaarutaasumik naliliineq pillugu Namminersorlutik Oqartussat nalunaarutaanni atuarneqarsinnaavoq - kap. 8.

Matematikkimi allattariarsorluni misilitsinneq akunnernik sisamanik sivisussuseqarpoq, kisitassanik eqqarsaatigisarialinnik suliassiissutinik imaqarluni, suliassiissutinilu atuartitsissummi immikkoortunik tamanik kalluaasussat ilaapput.

Atuartup matematikkimi eqqarsaatigisariallit nalinginnaasut ammasullu ulluinnarni inuiaqatigiinnilu inuunermeersut pinngortitamullu tunngasut suliarisinnaasariaqarpai, matematikkimi ilusiliussanik atuisinnaalluni inernerillu nassaarisani atuartitsissutikkoortumik tunngavilersorsinnaasariaqarlugit.

Atortorissaarutit

Misilitsinnermi atuartup atortorissaarutit akuerineqarsimasut tamaasa atorsinnaavai, taakkununnga ilaallutik kisitsinermi najoqqutassat tabelillu katersat akuerineqarsimasut, nammineq allatat, atuakkat ujarlerfissat kiisalu lommeregneri. Suliassiissutini ataasiakkaani atortut immikkut ittut atorneqassappata, tamanna atuarfinnut suliassiissutit nassiunnerini nalunaarutigineqassaaq.

Meeqqat atuarfianni inaarutaasumik naliliineq pillugu Namminersorlutik Oqartussat nalunaarutaanni atuarneqarsinnaavoq - kap. 9, § 74.

iPad allattariarsorluni misilitsinnermi
Hent Pages iPadskabelon til skriftlig prøve her (brug iPad)

Allattariarsorluni misilitsinnermut Pages iPadskabeloni aaguk (iPad atussavat) 

Atuartoq atuartitsissummi taaguutinik suleriaatsinillu tigussaasumik atuisinnaanerminik, periutsinik toqqaasinnaanerminik kiisalu matematikkimi sammisanik ilisimasaqarnerminik paasinnissimanerminillu misilinneqassaaq. Atuartup inerniliussat nassaarineqartut tunngavilersorsinnaasariaqarpai.

Pisassiissutit

Misilitsinneq immikkoortunik arlalinnik ukuninnga imaqassaaq

• Kisitsisilerineq aamma algebra
• Geometriilerineq
• Matematikkip atuuffii
• Eqqarsaatigisarialinnik suliaqarneq aamma attaveqaqatigiinneq

Misilitseriaaseq sivisussuserlu

Misilitsinneq ingerlanneqassaaq klassi isumasioreerlugu ilinniartitsisup aalajangiinera naapertorlugu, periuseq A imaluunniit B atorlugu. Klassimi tamarmi misilitseriaaseq ataaseq atorneqassaaq:

A) Atuartoq piareersassaaq, suliassiissut eqqarsaatigisarialinnik tigussaasunik isummanillu tunngaviusunik aallaaveqartoq tunngavigalugu. Atuartoq piareersarnermini allataqarsinnaavoq, saqqummiinermini nassarsinnaasaminik. Saqqummiinerup ingerlanerani atuartup suliassiissummik suliaqarsimanini nassuiassavaa. Piareersarneq minutsini 20-40-ni sivisussuseqassaaq, saqqummiinermut karakteeriliinermullu katillugit minutsit 20-t immikkoortinneqassapput.

B) Misilitsinnermi aallaaviussaaq suliassiissut eqqarsaatigisarialinnik tigussaasunik isummanillu tunngaviusunik aallaaveqartoq. Suliassiissutip atuartut periarfississavai misissuinerit, tulleriiaarisumik aaqqissuusseriaatsit tunngavilersukkamillu inerniliinerit aqqutigalugit suleriaatsinik atuinissaannut aamma matematikkimut atortarneranullu tunngasunik paasinninnerminnik pisinnaasaqarnerminnillu takutitsinissaannut. Atuartoq tigussaasumik matematikkimik atuinerup isummallu tunngaviusut akornanni nikittaqattaarsinnaassaaq. Misilitsinneq kisimiilluni misilitsinneruvoq imaluunnit atuartut amerlanerpaamik pingasuullutik misilitsissinnaallutik. Misilitsinnerup ingerlanerani ilinniartitsisup censorillu atuartut ataasiakkaat oqaloqatigissavaat. Misilitsinneq karakteeriliineq ilanngullugu nalunaaqutta akunnerinik marlunnik sivisussuseqassaaq. Atuartut amerlanerpaamik arfinillit ataatsikkut misilitsissinnaapput.

Atortorissaarutit

Misilitsinnermi ulluinnarni atuartitsinermi atortorissaarutit atorneqartartut tamarmik atorneqarsinnaapput. Inimi misilitsiffiusumi qarasaasiap atorneqarnissaanut periarfissaqassaaq.

Meeqqat atuarfianni inaarutaasumik naliliineq pillugu Namminersorlutik Oqartussat nalunaarutaanni atuarneqarsinnaavoq - kap. 9, § 75.

Matematikkimi atuartitsissummi misilitsissutinut ilitsersuutip uuma siunertaraa, meeqqat atuarfianni inaarutaasumik naliliinerit pillugit Namminersornerullutik Oqartussat nalunaarutaanni misilitsinnerni piumasaqaatit ersarissarnissaat itisilernissaallu.

Ilitsersuutip misilitsinnerni piumasaqaatit ersarissarneqarnerisa saniatigut Matematikkimi misilitsissutit suliarineqarnerinut imarisaannullu assersuutit arlallit kiisalu atuartitseriaatsit siunnersueriaatsillu inassutigineqartut imarivai.

Ilitsersuut