Scratch

Scratch akeqanngittuuvoq on-linekkut programmi, atuartut ajornanngittumik kodiliornermut ilikkarnissaannut pilersitaq. Atuartut kodiliorlutik oqaluttualiorsinnaapput, pinnguaasiorsinnaapput, animationiliorsinnaallutillu, suliatillu allanut agguaassinnaallugit. Scratch atorlugu kodiliorneq legonik ikkussuinermut assiguvoq tassami kodip sananeqaatai ikkussortagaagamik legotut.
Scatchimi atuisutut kontotaarnissamik ilitsersuut, atuartitsinermilu sammisassatut siunnersuutit PDF-inngorlugit aasinnaavatit.

Scratch akullernut angajullernilu atuartunut tulluarpoq. Atuartut nukarliit aallarteqqaalluunniit appeq ScratchJr aallarniutigisinnaavaat. Appeq Scratch-imut assiguvoq sananeqaatsimikkulli ajornannginnerulluni atuarsinnaanngikkaluaraanniluunniit atorneqarsinnaalluni. ScratchJr-miit Scratch-imut ingerlariaqqinnissaq oqinneruvoq.

Scratch fagini tamani atorneqarsinnaavoq, assersuutigalugu oqaasilerinermi oqaluttuami inuttaasut oqalutsinneqarsinnaapput, oqaluttuamiit tigulaarisinnaapput oqariartuutaa sukuiarlugu, oqaluttualiorlutilluunniit. Matematikkimi ilutsit assigiinngitsut sanatinneqarsinnaapput kisitsisit najoqqutaralugit, pinngortitalerinermilu oqaatsit nalunartut takussutissiarineqarsinnaapput, assersuutigalugu seqineqarfik, inuup timaa aammalu qinngornerit ulorianartut uumassusilinnullu sunniutaat.

Atuartut Scratch aallunneratigut nutaaliorsinnaaneq, suleqatigiissinnaaneq ataqatigiissaartumillu aaqqissuussisinnaaneq sungiusartarpaat.

Scatchimi atuisutut kontotaarnissamik ilitsersuut, atuartitsinermilu sammisassatut siunnersuutit (PDF).