Pimmatiginnittarneq ajoraluartumik suli ajornartorsiutaavoq – aamma Kalaallit Nunaanni. Taamaammat Ilinniartitaanermut Aqutsisoqarfik Isumaginninnermullu Aqutsisoqarfik pinaveersaartitsinermik annertusaaniarput, suliniut Kammagiitta aqqutigalugu. Tamanna Mary Fonden aamma Red Barnet Fri for Mobberimik ingerlatitsuusut suleqatigalugit ingerlanneqassaaq, Ole Kirk’s Fond aningaasaliisoralugu.
- Pimmatiginninnikkut ataatsimoorfinniit ajattuisarneq immikkoortitaasunut kingunipiloqartarpoq, pimmatiginniffiusumilu eqimattani sunniuteqalertarluni. Meeqqat imminnut naleqartinnerannut inuunermillu nuannarinninnerannut sunniuteqartarpoq, taamaattumik annertunerusumik iliuuseqarfiginiarparput. Taamaammat nuannaarutigaarput pinaveersaartitsinissap nukittorsarnissaa suliniuteqarfiginissaalu annertunersumik suliniuteqarfigisinnaalernera, oqaaseqarpoq Kaali Olsen, Ilinniartitaanermut Aqutsisoqarfimmi Pisortaq.
Kammagiitta – Fri for Mobberi 2010-mi Kalaallit Nunaanni atulersinneqarpoq, nunalu tamakkerlugu siaruaqqalluni. Annertunerusumik suliniummik ineriartortitsineq neriuuteqartitsivoq, sulinerup suli kivinneqarnerunissaanik taamaasiornikkullu pimmatiginnittarnermut pinaveersaartitsineq nukittorsarneqassalluni. Suliniut Kalaallit Nunaanni Nuna tamakkerlugu pimmatiginnittarneq akiorniarlugu periusissiamut ilaavoq.
- Kammagiittami – Fri for Mobberi suliniuteqarnermi qitiulluinnartut ilagaat Kalaallit Nunaannut tulluartumik piginnittuunermillu pilersitsinissaq. Taamaammat ineriartortitsineq suliamillu aallartitsinissaq Ilinniartitaanermut Aqutsisoqarfiup Isumaginninnermullu Aqutsisoqarfiup Kalaallit Nunaanni ingerlatissavaat. Tulluusimaarutigalugulu nuannaarutigaarput, Kammagiittamik – Fri for Mobberi Kalaallit Nunaat tamakkerlugu siammarterineq iluatsinnikuummat, qilanaaraarpullu suliniutip imarisaatigut kivinneqarnissaa oqaaseqarpoq Helle Østergaard, Mary Fondimi Pisortaq.
Kammagiitta – Fri for mobberi pillugu paasissutissat:
- Suliniut kalaallisuumut nutserneqarnikuuvoq, qallunaat suliniutaanniit Fri for Mobberimiit. Mary Fondi aamma Red Barnet Fri for Mobberimik ingerlatsisuupput, Danmarkimi nuna tamakkerlugu meeqqanut 0-9 ukiulinnut atuuttuulluni. Ole Kirk’s Fondia aningaasatigut Fri for Mobberimik suleqataavoq.
- Suliniutip pingaarnertut anguniagaraa ulluunerani paaqqinnittarfinni aamma atuartuni nukarlerni meeqqat ataatsimoorfimminni tamarmik toqqissisimasumiillutillu qinngasaariffiunngitsumiissasut. Suliassaq tassaavoq ulluunerani paaqqinnittarfinni, meeqqerivinni, meeraaqqerivinni atuartunilu nukarlerni sulisut sulinerminni meeqqat toqqissisimallutik ataatsimoorfigisassaannik anguniagaqarnerminni sakkussaannik tuniorarnissaat, aaqqissugaalluartumik toqqissisimaneq, akaarinninneq, ataqqinninneq, isumassuineq sapiissuserlu tunaartaralugit ingerlannerisigut. Taakku “Assigiinngissuseq ataatsimoorfigalugu” ataatsimut taajuutigissavaat.
- Suliniummik nalilersuineq 2020-meersup takutippaa, suliffeqarfiit Avannaani-, Kujataani-, Kitaani- aamma Kalaallit Nunaata Kangiani sulisuusunit 82 %-iisa atortaraat. Aammattaaq 75 %-iisa misigisarpaat suliffimminni ajunngitsumik kinguneqartartoq.
- Inatsisartut 2019-imi aalajangerpaat Nuna tamakkerlugu pimmatiginnittarneq akiorniarlugu periusissiortoqassasoq. Periusissiami innersuussutigineqarpoq meeqqanut suli atualinngitsuni meeqqallu atuarfianni nukarlerni atuartunut pinaveersaartitsinermi Kammagiitta atorneqassasoq aammalu isumassarsiorfigineqassasoq.
