Ataatsimut misilittakkat allaavigineqarput
Pinnguarluta Kivitsisa suliniutaareersup Kivitsisap 2018-imiilli siuttuuffigisaata ingerlariaqqinnerivaa. Suliniut oqaatsitsinnut, kulturitsinnut, pinngortitamut ulluinnatsinnullu ilusiligaavoq, ilinniartitsisut, mentorit, atuartut suleqataasullu allat qanimut suleqatigalugit ineriartortinneqarluni. Suliniutip atuartitsinermi atortussiaareersunik nutarterineq, nutaanik ineriartortitsineq taakkulu tamaasa kattutsillugit ataatsimoortumik digitaliusumik aallerfiusussamik pilersitineq imarai.
“Suliniummi kingumut siumullu isigivugut. Pitsaasunik atortussaaterpassuuteqareerpugut, taakkulu nunatsinni ineriartortinneqarlutillu piginnaaneqarluarluni suliaapput. Unamminartortaraali atortussiar siammasimmata nassaariuminaassinnaallutillu. Pinnguarluta Kivitsisami atortussiat nutaat ineriartortippagut pioreersullu nutarterlugillu pissarsiariuminarsarlugit. Tamarmik ataatsimoortinneqassapput ulluinnarni atoruminarnerulerniassammata”, Rune Nydam Bundgaard, Kivitsisap allaffeqarfiani pisortaa, oqarpoq.
Aqqutit sisamat – siunertaq ataaseq
Suliniutip ineriartornerani ingerlavissat sisamaapput sammiveqatigiittut:
- Atortussiat pioreersut nutarterneri
Atuakkat nutaannginnerit, PDF’it aamma atortussiat digitaliusut pitsaassusaat qulakkeerneqassapput, nutarterneqassapput aamma sammisassanik atuartitsinermilu ingerlaatsinik ilaneqassallutik. - Atortussianik nutaanik ineriartortitsineq
Ingerlatsinerit nutaaviit ilinniartitsisut, eqqumiitsuliortut, ilisimaqarluartut, aaqqissuussat peqatigiiffiillu suleqatigalugit sumiiffinnut nunatsinnilu ulluinnarnut pinngortitamullu naleqquttut suliarineqassapput. - Nunat assigiinngitsuneersut atortussiat suliareqqitat
Nunani allani atortussiat toqqakkat nuserneqarlutillu nalimmassarneqassapput oqaatsitsinnut, kulturitsinnut pinngortitatsinnullu tulluartunngorlugit. - Alimasissumit atuartitsinikkut aqqut
Atortussiat alimasissumit atuartitsinissamut ineriartortinneqassapput nalimmassarneqassallutillu, qanilaassuseq, suleqatigiinneq sammisassallu isumaqarluartut pingaartillugit.
Aallerfik ataaseq – ilinniartitsisunut atuarfinnullu
Suliniummi ilaalluni aallerfik digitaliusoq nutaaq pilersinneqassaaq, taannalu ilinniartitsisut atuartitsinerminni atortussianik aallerlutik iserfigisinnaassavaat. Tassunga atortussiat pioreersut nutaallu pisariaqartillugit aaneqarsinnaapput, linkillu iluaqutaasinnaasut aamma imarissallugit. Pingaarnertut aallerfik ilinniartitsisut atuartitsinissaminnik piareersarnermi allanngorartitsiniarnermilu iluaqutigissavaat – aammali isumaqassappat atuartunit atorneqarsinnaassalluni.
“Siunissami ujaasiffissaq ataasiinnaassaaq. Aallerfik pingaarnertut ilinniartitsisut sakkussaraat – atuartunullu iniussanani atuartitsiviusoq. Ilinniartitsisunut ingerlatsinissannik pitsaaasunik ujaasinermi pisariinnerulissaaq atuartisinerlu assigiinngisitaartoq, atuartunik issiaannartitsinngitsoq, misissuititsisoq, suleqatigiisitsisoq pilersitsisitsisorlu piareersarusiorsinnaalissavaat”, Kaali Olsen, Ilinniartitaanermut Aqutsisoqarfiup pisortaa nassuiaavoq.
Digitaliusut analogiusullu oqimaaqatigiisinneri
Aallerfimmi atortussiat digitaliusumik aaneqarsinnaassapput, atuartitsinerli uummaarissuussaaq, ajornaatsuussalluni assigiinngiiaassallunilu. Meeqqat assatik suli atussavaat, misileraassapput, sanassapput, allassapput, pinngortitamiissapput nunarsuarmilu piviusumik suliaqassallutik. Ingerlatsinerit ilaanni atuartut digitaliusunik suliaqassapput. Filmiliussapput, saqqummiussassaliorlutik annikitsunilluunniit suliaqassallutik, suliassanili allani assatik atorlugit nuanami aqerluusarluunniit atorlugu suliaqassallutik. Tamaasa atorneqassapput – digitalit aamma analogit – suna pineqarnersoq apeqqutaalluni. Atuartitsinermi atortussianut tunngatillugu aamma, digitalit tigussaasullu ingerlaqatigiissapput.
“Imaanngilaq atuakkat taarserneqassasut,” Kaali Olsen erseqqissaavoq. “Atortussiat digitaliusut tigussaasullu atorneri sunik suliaqarnerluni apeqqutaalluni tamaasa atorneqarsinnaapput, atuartitsinermi isumaqartumik atornissaat eqqarsaatigigaanni.”
Ataatsimoorluni alloriaqqinneq
Pinnguarluta Kivitsisa Kivitsisap suliniutaanik ingerlariaqqinneruvoq meeqqallu atuarfiata ataatsimoorluni ineriartortinnerani pissusissamisoorluni alloriaqqinnerulluni. LEGO Foundationip suliniut 18 mio. kr.-ingajannik aningaasalersorpaa, LIFE Fondenillu aallerfiutiminnik, teknikkikkut tunngavigisaminnik atuartitseriaatsimillu katillugit nunatsinni ataaatsimut tunngaveqartitsisussamik tapersiipput. Suliniut ukioq 2030-p tungaanut ingerlassaaq, tassani piginnittuuneq Kivitsisamit Ilinniartitaanermut Aqutsisoqarfimmut ingerlateqqinneqarumaarluni.
| Paasissutissat | Suliniutip naatsumik oqaluttuarinera |
|
Suleqatigiit: Kivitsisa, Ilinniartitaanermut Aqutsisoqarfik, LEGO Foundation, LIFE Fonden Piffissaq: 2026–2030 Missingersuutit: 18 mio. miss. Sullinniakkat: Meeqqat atuarfiini ilinniartitsisut, atuartut, mentorit atuartiillu aqutsisui |
|