Iserasuaat nittartagaq nutaaq

Ilinniartitaanermut, Kultureqarnermut Ilageeqarnermullu Naalakkersuisoqarfik nittartagaq Iserasuaat nutaaq www.iserasuaat.gl ataasinngorneq marsip aappaani saqqummiutissavaa. Taamaalilluni iserasuaat nittartagaq nutaannginneq atorunnaassaaq.

FOIS – Fællesoffentlig IT-styregruppe (Pisortat ataatsimoorussamik IT-mik aqutsisoqatigiivi) aqqutigalugu Naalakkersuinermi Ataqatigiissaarisoqatigiinnik suleqateqarlutik ataatsimoorullugu pisortanut qarasaasiatigut nittartakkanut periusissamik nutaamik Naalakkersuisut suliaqarniarput. Periusissaq pisortat nittartagaanik aalajaallisaassaaq. Maannakkut 40-t sinnerlugit pisortat nittartagaat ikilisinneqarlutillu nutarsarneqassapput, taamaalilluni pisortanut isaarissat ikinnerulissallutik, aammalu imarisat tutsuiginartuuneri, nutarsarsimaneri paasiuminartuunerilu qularnaarneqassallutik.

Maannalu iserasuaat.gl tullinnguulluni. Iserasuaatip nutaanngitsup serveria immikkoorluni inissisimagaluarpoq, maannalu serverimut ataatsimoortumut nuunneqarpoq nittartakkat pisortaqarfinnut tunngasut assigalugit.

Iserasuaat ilinniartitaanermut tunngasunut qarasaasiani isertarfiuvoq, meeqqat atuarfianni majorissani aamma ilinniarnertuunngorniarfinni ilinniartitaanernut tunngasunik tamakkiisunik ataatsimut katersuiffiusimasoq. Iserasuaammi siunertaavoq ilinniartitaanerit pitsaassusii suli annertunerulersinneqarnissaat, ilisimasanik ilinniartitsisut aamma atuartitsisuusartut akornanni paarlaasseqatigiittarnikkut, ilinniarfinni ataasiakkaani namminerni, aammali nunatsinni sumiiffinni assigiinngitsuni, najugaqarfiit akimorlugit. Iserasuaat taakkua saniatigut aamma pisortat ataatsimut isaaffigaat, ilisimasassanut pigineqartunut tamanut atatillugu, Kalaallit Nunaanni ilinniartitaanikkut ingerlatsineq tamaat isigalugu.

Paasisaqarnerunissamut attavissaq:

Inaluk Kleist (Ilinniartitaanermut, Kultureqarnermut Ilageeqarnermullu Naalakkersuisoqarfik)

Toqq/direkte 34 57 55

inkl@nanoq.gl