”What does mental health mean to you, and what would strengthen your mental health?”
(Tarnikkut peqqissuseq ilinnut qanoq isumaqarpa, aamma suup tarnikkut peqqissutsit nukittorsassavaa?)
Tassaavoq Aaja Chemnitz Larsenip atuarfeqarfiit issittumiittut peqataaqqullugit qaaqqummagit qulequtaritinneqartoq. Suliniummi inuusuttuaqqat 14-init 16-inut ukiullit – tuluttut oqaasertalimmik allakkiorlutik, podcastiliorlutik, videoliorlutik assigisaannilluunniit suliaqarlutik nassiussisussaasut – peqataasussatut naatsorsuutigineqarsimapput.
Kingusinnerpaamik tunniussisussaapput decembarip ulluisa pingajuanni, maannalu nassiunneqarsimasut tamarmik isumagineqarput.
Allattoqarfimmi pisortaagallartoq Naja Carina Steenholdt allappoq:
”Kalaallit Nunaannit, Sverigep avannaanit Alaskamillu suliniummut ilanngussanik pitsaasunik nassiussarsisimavugut, maanna suliaralugit aallartissimasatsinnik ukiumilu nutaami nangillugit suliariumaakkatsinnik. Nassiunneqarsimasut tarnikkut peqqissuseq pillugu assigiinngitsunik imaqarput, assersuutigalugulu imminut toqunneq, ersineq isumatsassimangaarnerlu (depressioni) sammineqarlutik - kisianni aamma inuusuttut ernummatigisartagaannik imaqarput, soorlu silap pissusiisa allanngoriartornerinut tunngasunik.”
Arctic Parliamentariansip aaqqissugaanik Nuummi septembarip qaammataani 2022-mi ataatsimeersuartitsisoqalerpat suliniummut ilanngunneqartussatut nassiunneqarsimasut tamarmik saqqummiunneqassapput. Atuartut Kangaatsiap Atuarfianeersut Kalaallit Nunaannit suliniummut videoliaminnik ilanngussaqartuupput.
Iserfissat
Arctic Parlamentarians – website
Arctic Parlamentarians – facebook
Annertunerusumik paasisaqarusukkaanni saaffigisassaq:
Allattoqarfimmi pisortaagallartoq Naja Carina Steenholdt
Email: naja.steenholdt@ft.dk
Oqarasuaat: +45 3337 3173
