Inatsisartut 2019-imi upernaakkut ataatsimiinnerminni aalajangiuppaat, meeqqat inuusuttullu ilinniartoqarfiini tamani, tassalu ulluunerani paaqqinnittarfinni, meeqqat atuarfiini inuusuttullu ilinniarfiini, pimmatiginnittarneq akiorniarlugu nuna tamakkerlugu periusissiamik ineriartortitsisoqassasoq.
Taamanikkut Naalakkersuisuusimasut kissaatigaat meeqqanut suli atualinngitsunut imikkoortortaqarfinni, meeqqat atuarfianni kiisalu inuusuttut ilinniarfiini tamakkiisumik isiginnittumik periusissiamik suliaqartoqassasoq, pinngitsoornanilu siammasissuussasoq tamatigoortuullunilu. Suliap ingerlanneqarnerani Naalakkersuisut, kommunit allallu susassaqarfiit akimut suleqatigiilluinnarlutik pinissaat pisariaqarpoq, Ilinniartitaanermut Aqutsisoqarfik suliniummut akisussaasoralugu ataqatigiissaarisoralugulu pimmatiginnittarneq akiorniarlugu pitsaaliuinissamik akiornissaanullu suliaqassaaq.
Naalakkersuisut ulloq 10. august 2022-mi ataatsimiinnerminni pimmatiginnittarneq akiorniarlugu nuna tamakkerlugu periusissiamut missingiut siulleq akuersissutigaat. "Pimmatiginninneq akiorniarlugu periusissiaq" Ilinniartitaanermut Aqutsisoqarfiup tamanut saqqummiuppaa, taannalu nuna tamakkerlugu aallartisarneqassaaq.
Periusissiaq pimmatiginnittarneq pillugu ilisimatusarnermit nutaanerpaamit kiisalu nunatsinni meeqqat, inuusuttut inersimasullu akornanni pimmatiginnittarneq pillugu misissuinernit tunngaveqarpoq.
Periusissiami pimmatiginnittarnermik akiuiniarnermik suliaqarneq sammineqarpoq, tamanna inuiaqatigiit ataatsimut susassaralugulu akisussaaffigisaat. Suliamik aallartisaaneq august 2022-miit ingerlanneqalissaaq, ukiunilu pingasuni sivisussuseqassalluni. Ukiut pingasut siulliit suliassat atuutsikkiartuaarneqalerfissaattut isigineqassapput, innersuussutit aallaavigalugit sammisaqartitsilluni suliniutit aallartisarneqassapput, Kalaallit Nunaanni najugaq aallaavigalugu sumiiffinni assigiinngitsuni ingerlanneqalerlutillu ataatsimut aaqqissugaassallutik.
Ilinniartitaanermut, Kultureqarnermut Timersornermut Ilageeqarnermullu Naalakkersuisoq Peter Olsen aamma Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen periusissiaq nutaaq pillugu ima oqaaseqarput: ”Takorloorparput inuiaqatigiit ataqqeqatigiiffiullunilu isummanik assigiinngissutsinik paaseqatigiiffiusoq. Inuiaqatigiinni ataatsimoorfiit pitsaasut isiginiarneqarnissaat pingaaruteqarpoq. Taamaammat suliamik aallartisaanissamut, kiisalu nuna tamakkerlugu piviusunngortitsinissamik suliniuteqarnissamut najugarlu aallaavigalugu suliniutit aallartinnissaannut qilanaarpugut”.
Iserfissat
Paasisaqarnerorusukkuit attavigiuk:
Aqutsisoqarfiup pisortaa Kaali Olsen
Oqarasuaat: (+299) 34 6158
KAOL@nanoq.gl
