Kisitassanik eqqarsaatigisarialinnik kisitsinermi isiginneriaaseq nutaaq
Ukiorpassuarni kisitassanik eqqarsaatigisarialinnik kisitsinermi suliassat atuartut matematikkimi piginnaassusiinut tunngassuteqarnerusarnerinut naleqqiullugu atuartut kisitseriallaqqissusiinut tunnganerusarsimapput. Siornatigut atuartut inernerup kisitsillutik nanisinnaaneranut piginnaassuseqarnerminnik matematikkimilu piginnaassutsimik pigiliussimasaminnik atuillutik suliaqartarnerminnik pingaarnertut misilinneqartarsimapput, matematikkilu ikiorsiullugu suliassat naammassisinnaanissaannut piginnaassutsimik ineriartortitsisinnaanerat pingaartinneqannginnerusimalluni.Suliassiissutinit nutaanit taakkunannga atuartut matematikkimi suliassanik isumaliutiginninnermik inerniliussaminnullu tunngavilersuinertalinnik unammillernarsinnaassunik suliassinneqartalissapput. Suliassanilumi suliassap suliarinertavia suliassap inerneratulli pingaartinneqartigissaaq, inerniliunneqartutullu pingaaruteqartigisumik atuartut suliassiissutigineqartup naammassinissaanut suliaqarnerminnik misilinneqartalissallutik.
Misissuilluni misileraallunilu matematikkerneq
Matematikkip atuartitsissutitut isigineqarnera ukiorpassuarni allanngoriartorsimavoq, pingaartitarlu kisitsinikkut inernerusumit illuarluni kisitsinertavianut pisimalluni – atuartitaanermi misilitsinnermilu. Aammattaaq ilisimatusartut innersuussutigaat nalitsinni matematikkimik atuartitsineq aaqqitassanut sammilersinneqartariaqartoq, atuartullu suliassaminnik naammassinninnissaminnut misissuisinneqarlutillu misileraatinneqartariaqartut. Siunnersuutigineqarportaaq matematikkimik atuartitsinermi paasissutissiineq attaveqaqatigiinnerlu pingaartinneqartariaqartut, atuartullu aaqqiissutigisaminnik toqqaanerminnut tunngavilersuisinnaaneq ilinniassagaat.Atortussanngortitsisarneq ataavartoq
Kisitassanik eqqarsaatigisarialinnik kisitsinermi tunngaviusoq allanngortinniarlugu suliniut 2018-imi aallarnerneqarpoq, suliassallu nutartikkat ataavartumik atortussanngortinneqartarput suliassat ataasiaakkaat ukiut tamaasa naleqqussarneqartarlutik. Tamatuma saniatigut ilinniartitsisut periarfissaqarsimapput atuartitsinerminnut, terminsprøvinut kiisalu matematikkimi oqaluttariarsorluni misilitsinnernut pisassiissutitut misilitsissutaareersimasunik atuinissaminnik, taamaaliornikkullu atuartut suliassanik taamaattunik nutaajusunik sungiussitinniarneqarsimapput.Kisitassanik eqqarsaatigisarialinnik kisitsinermi najoqqutassaq nutaaq 2023-mi inaarutaasumik misilitsinnernut tamakkiisumik atuutilersinneqassaaq.
Paasisaqarneruniartunut attaveqarfissaq:
Atuarfinnut siunnersorti Karla Petrussen
Email: karp@nanoq.gl
Telefon: 34 56 58
