Nuuk Internationale Friskolemi 6. klassimi atuartuusut Micro:Bits atorlugu flippermaskiinaliorput

Flippermaskiinaliornermi qarasaasiaarannguamik programmererneqarsinnaasumik Microbitsimik taaneqartartumik ilanngussilluni projekteqarneq teknikkikkut unammilligassaqaqalunilu nutaaliorluarniarfiusimaqaaq. 6. klassimilu atuartuusut atuarfimmi suliarisartagaannit nalinginnarmit allaaneruvoq ilisimatusarnermut, teknologiimut paasinninnermi, ingeniørit ilusilersortagaannut matematikkimullu tunngasutigut misissuinissamik periarfissaqarfiugami (STEM). 

Taama sulineq piffissamik atuinaraluartoq ilikkagaqarfioqaaq. Atuartullu teknologiip qanoq iliornikkut timitalinngorlugu pilersinneqartarnera misigisaqarfigaat, aammalu eqqarsaatigisarialinnik suliaqartarnerup suleqatigiittarnerullu pingaaruteqassusii ilinniarfigalugit. Atuartitsineruttaaq taassuma ilungersorluni qasusuillunilu sulisarnerup pingaaruteqarnera takutippaa, atuartummi suliaqarnerminni arlariinnik qaangerniagassaqartaraluarlutik suliaminnik ilungersuussilluarsimapput ukkassilluarsimaqalutillu. 

Projekteqarnerup ilungersuunneqarnera naqissuserniarlugu ilinniartitsisuusup atuartut ilaqutaat saaffigai. Sapaammilu angajoqqaat peqatigalugit atuarfimmi aaqqissuussineqarpoq, atuarfiup ilaqutariillu atassuteqarnerulernissaannut periarfissaalluartumik. Ullormi tassani meeqqat inersimasullu ataatsimoorussaminnik anguniagaqarlutik suleqatigiipput, ullormimi tassani flippermaskiinat naammassiniassagamikkik. Suleqatigiinneq iluatsitsiffiulluaqaaq. Angajoqqaammi piginnaasaminnik isummaminnillu ilanngusseriarmata atuartut misigisaqarnermikkut suli pisuunnguallannerupput. Ulloq taanna ilikkagaqarfiuvoq, suleqatigiiffiulluni minnerunngitsumillu nuannisarfioqaluni, inerneralugulumi flippermaskiinat atorluarsinnaasut pitsaviillu arlariit naammassineqarnerat. 

Nuuk Internationale Friskolemi projekteqarneq teknologiimik paasinninnermut tunngasumik atuartitsinermut ilanngussisarnerup meeqqanik isumassarsisitsillunilu kajumilersitsisinnaasarneranut assersuutissatsialaavoq. Tamannalumi sumik ilikkarniagaqarnerup nalaani peqatigiinnissap suleqatigiinnissallu pingaaruteqassusiannik uppernarsaavoq. Tassalu 6. klassimi atuartuusut maanna piginnaasatigut misilittakkatigullu siuariaateqarnermikkut nunarsuarmi teknologiimik atuiffiuneruleraluttuinnartumi sulilernissaminnut piareersarneqarsimanerulerput. 

https://www.dr.dk/skole/ultrabit/mellemtrin/tema/byg-en-flippermaskine 

---

Aamma atuarsinnaavatit