Coronap nalaani inuusuttuuneq

Ilinniartitaanermut Aqutsisoqarfiup atuartut, ilinniartitsisut atuarfiillu pisortaat "Coronap nalaani inuusuttuuneq" pillugu atuartut suliaannik upernaami 2020-mi nassiussaqarsimasut qutsavigai.

Angajullerni atuartuusut 50-it missaanniittut Kalaallit Nunaanniillu tamarmit pisut allakkanik, assinik, nipinik isiginnaagassiaaqqanillu kalaallisut, qallunaatut tuluttulluunniit oqaasertalersukkanik nassiussisimapput.

Suliat tunniunneqartut tamarmik atuarfinni atuarfiillu avataanni inuusuttut atugaat pillugit ilisimasanik katersuinitsinnut pissarsiaqarfiupput. Paasissutissat pissarsiarisagut Kalaallit Nunaanni suli atualinngitsuni, meeqqat atuarfiini, inuusuttullu ilinniarfiini atugarissaarnermut aamma qinngasaarisarneq pillugu pinaveersaartitsinermut nuna tamakkerlugu periusissiornerup ineriartortinnissaanut tunngavigineqartussanut ilanngunneqassapput.

Immikkut ittumik pissarsiaqarfiusunik ilanngussaqarsimasunut akissarsititsisimavugut, amerlasuullu akissarsitinneqarput. Akissarsisussanik toqqaaniarneq ajornakusoorsimaqaaq, nalilersueqqissaarnerilli kingornatigut uku toqqarsimavagut:
Lea Christensen, Atuarfik Hans Lynge 8.a. Coronap nalaani nikallunganeq mianersoqqissaarnerlu pillugit assimik imartuumik kusanartumillu kiisalu eqqarsaatit misigissutsillu pillugit isumaliutigilluakkanik oqaasertaligaasumik suliaqarsimanera pillugu.
Malu Larsen, Kangaatsiap Atuarfia 8. kl. Allaaserisamik imartuumik taassuminnga atuartup silarsuarmut eqqasuuteqarfiusumut, mattusimaffiusumut, aqqaluartaarnermik nuannaarutiginniffiusumut atuarfimmillu maqaasiffiusumut pulatinneqarfigisaasutullusooq ittumut allassimanera pillugu.
Isajas Hansen, Nanortallip Atuarfia 9.a. Allaaserisamik pitsaasumik suullu tamarmik matoqqaneranni angallannikkut ilungersunartorsiornerup nalaanni nunaqarfeerarmiuulluni/illoqarfeerarmiuulluni naammagisimaarinnittariaqarnermik sukumiisumik allassimanera pillugu.

Aammattaaq klassit pingasut sulilluarsimanerat pillugu koorimik tamulugassanik imalimmik tunineqarput: 10.e Sisimiuni Nalunnguarfiup Atuarfianit, 8.a Nuummi Atuarfik Hans Lyngemit aamma 9.a Nanortalimmi Nanortallip Atuarfianit.