Nakuuserneq meeqqanik inuusuttunillu eqquisartoq nunami maani suli ajornartorsiutaavoq. 2019-imit 2020-muinnaq inuusuttut akornanni nakuusernerit nalunaarutigineqartut marloriaatinngorsimapput.
Tamannarpiaavorlu peqatigiiffiup Kalaallit Meerartaasa Tassa!-mik suliniuteqarnermigut allannguiffiginiagaa. Tamanna inuusuttut akornanni nakuusernerup pinaveersaartinneqarnissaanik annikillisarneqarnissaanillu suliaqarluni sammisaqartitsisarnertigut atuartitsisarnertigullu pisarpoq, inuusuttut iliuusissatut periarfissaminnik paasissutissinneqartarlutik attaveqarfigisassanullu peqqinnarnerusunut ilaalernissaminnut tapersersorneqartarlutik.
Ullut sammisaqarfiusut oqaloqatigiinnerillu artornartut
pingaaruteqartulli
Tassa! pillugu ullut sammisaqarfiusussat meeqqat atuarfianni
7. klassimit 9. klassimut atuartunut neqeroorutaapput, ullunik pingasunik
sivisussuseqartussat.
- Atuarfeqarfiit sapaatip-akunnerani 43-mi ullunik sammisaqarfeqarnissaat neriuutigaarput. Pingaarnerpaarli tassa atuarfeqarfiit tamatuminnga skemaminnut ilanngussinissaat, Britta-Marie Nielsen Kalaallit Meerartaanni suliniutinut ineriartortitsinermullu siunnersorti oqarpoq.
Suliniummik misileraaneq 2021-mili aallarnerneqarpoq. Peqatigiiffiullu ilinniartitsisut ullunit sammisaqarfiusunit sapinngisamik annerpaamik pissarsilluartarnissaat sulissutigaa.
- Tassa! pillugu ilinniartitsisunit nalunaarutinik pitsaasunik utertitsivigineqarpugut, Britta-Marie Nielsen oqarpoq nangillunilu:
- Atuaqatigiiaani pissutit pitsaanerulersarput, atuartullu sammisat oqallissigissallugit artornartut pillugit ilinniartitsisuminnik oqaloqateqarnissaminnut periarfissarissaarnerulersarlutik.
Ukioq manna sammineqartussaq
Ukioq manna sammineqartussaq suli saqqummiunneqanngilaq.
Qulequttalli soorlu ”Pisinnaatitaaffitit ilisimalikkit” aamma ”Nakuusernerup
kingunipilui” ulluni taakkunani sammineqarumaarput.
Ineriartortitsinermut siunnersortittaaq oqaatigaa Tassa! atuartitsinermi atortussanik amerlasuunik peqareersoq, sulili amerlanerusut pigilerneqarumaarput. Taamalu ilinniartitsisut namminneerlutik atuartitsinermi atortussanik sorlernik suliaqarnissartik toqqarsinnaassavaat.
- Ilinniartitsisut namminneerlutik atuartitsinermi atortussanit ataasiakkaanik suliaqarfiginiakkaminnik toqqaasinnaajumaarput, oqarpoq.
Ima pisarpoq
- Ilinniartitsisut qaqugu ullut sammisaqarfiusut
suliaqarfigissanerlugit namminneerlutik aalajangertarpaat. Pingaaruteqarporlu
ilinniartitsisut tamatuminnga uatsinnut nalunaaruteqartarnissaat, Britta-Marie
Nielsen oqarpoq.
Ullut sammisaqarfiusussat sioqqullugit Tassa! ilinniartitsisunik onlinekkut arlariinnik piareersaatitut pikkorissartitsisarpoq. Tamatuma saniatigut isumaginninnermi siunnersorti, atuartunik paarsisoq (skolefe) imaluunniit pissusilersortarneq, attaveqaqatigiittarneq peqqissuserlu pillugit suliaqartoq (AKT) Tassa!-p pinerata nalaani qisuariaateqarsinnaasunik oqaloqatiginninnissaminnut piffissaqassapput. Atuarfinni ass. isumaginninnermut siunnersorteqartoqanngippat sapaatip-akunnerani pisussami tamannattaaq eqqarsaatigineqassaaq.
Paasisaqarnerugit
Ullut sammisaqarfiusussat pillugit Tassa!-p nittartagaani
paasisaqarnerusinnaavusi, https://www.tassa.gl.
Naggasiullugu Britta-Marie Nielsenip kikkut tamaasa Tassa!-p
ulluinut peqataaqqullugit kajumissaarpai.
- Suliassaq tamanna kisitta suliarisinnaanngilarput. Ilinniartitsisuttaaq kisimiillutik suliarisinnaanngilaat. Peqatigiissutigisariaqarparput ajornartorsiutillu pingaarnertut sammisariaqarlutigit, oqarpoq nangillunilu:
- Akisussaaffik tamanna tamatta akisussaaffigisariaqarparput, apeqqutaatinnagu ilinniartitsisuunersugut, suliffeqarfiunersugut naalakkersuisutiguunngitsut (NGO) imaluunniit oqartussaasuunersugut. Meeqqavut nakuuserfiusumik avatangiiseqaratik peroriartussappata iliuusissatsialaavoq nakuuserneq pillugu oqassagutta TASSA!
